ဈေးကွက်တွင်း ငရုတ်သီးစုပြုံဝင်ရောက်ခြင်းကိုထိန်းချုပ်ရန် တစ်ချို့ဒေသများတွင် ငရုတ်သီးခူးဆွတ်မှု ရပ်ဆိုင်း

17/01/2022 20:00 PM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား

ဈေးကွက်တွင်း ငရုတ်သီးများ စုပြုံဝင်ရောက်ခြင်းကို အခြေအနေထိန်းချုပ်နိုင်ရန်အတွက် တစ်ချို့ဒေသများတွင် ငရုတ်သီးဆက်လက်မခူးဆွတ်တော့ဘဲ ရပ်ဆိုင်းထားကြောင်း ငရုတ်သီး ကိုယ်တိုင်စိုက်ပျိုးထုတ်လုပ်သူများထံမှ သိရသည်။

"အခုအချိန်မှာက ဧရာဝတီတိုင်းဘက်က ငရုတ်သီးတွေကလည်း ပေါ်နေတယ်။ ထိုင်းနိုင်ငံဘက်က ငရုတ်ခင်းတွေကလည်း အသီးပြန်ပေါ်ချိန်ဖြစ်နေတယ်။ ဗီယက်နမ်ဘက်က ငရုတ်တွေကလည်း တရုတ်နိုင်ငံဘက်ကို ဝင်မရတော့ ထိုင်းနိုင်ငံဘက်ကို လှည့်သွင်းကြတယ်။ ဒီတော့ ငရုတ်သီးတွေက စုပြုံဝင်နေသလို ဖြစ်သွားတယ်။ ဒီလို ဈေးကွက်အနေအထားကို ထိန်းနိုင်ဖို့အတွက် တစ်ချို့တောင်သူတွေက အသီးခူးတာကို ရပ်ပြီး၊ ဈေးကွက်ကောင်းကို စောင့်ဆိုင်းဖို့ လုပ်ကြရပါတယ်။"

ဟု မန္တလေးတိုင်းဒေသကြီးမှ ငရုတ်သီးစီးပွားဖြစ် စိုက်ပျိုးတင်ပို့ရောင်းချသူ ကိုမြင့်ထွန်းဦးက ပြောသည်။

လက်ရှိတွင် ငရုတ်သီးဈေးကွက်အတွင်း ငရုတ်သီးအမှည့်အစို ဝင်ရောက်မှုများပြားနေသည့်အတွက် ဈေးနှုန်းဆက်တိုက်ကျဆင်းနေကြောင်း သိရသည်။

"ငရုတ်သီးဈေးက အရင်လကနဲ့ဆိုရင် လုံးဝ ကွာခြားသွားပါတယ်။ ဈေးက ဆက်တိုက်ကို ကျနေတာတော့ အခုဆိုရင် တစ်ပတ်လောက်ရှိလာပါပြီ။ အရင်လက ငရုတ်သီးအမှည့်အစို တစ်ပိဿာကို ကျပ် ၇၀၀၀ ဝန်းကျင်ရှိနေရာကနေ အခုဆိုရင် ငရုတ်သီးအမှည့်အစို တစ်ပိဿာကို ကျပ် ၁၀၀၀ ကနေ ၁၃၀၀ အတွင်း ဈေးအထိ ကျဆင်းနေပါတယ်။ ငရုတ်သီးအရည်အသွေး မကောင်းလို့ ဈေးကျတာမဟုတ်ပါဘူး။ ငရုတ်သီးတွေက ပေါ်ကာစ အသီးတွေဖြစ်တဲ့အတွက် အရည်အသွေးကောင်း Export Quality ကို ပြည့်မီပါတယ်။"

ဟု ၎င်းက ဆက်လက်ပြောသည်။

မြန်မာနိုင်ငံတွင် ငရုတ်သီးကို မြန်မာနိုင်ငံအလယ်ပိုင်း မကွေးတိုင်းဒေသကြီးနှင့်မန္တလေးတိုင်းဒေသကြီးတို့ရှိ ဒေသများနှင့် ဧရာဝတီတိုင်းဒေသကြီးတို့တွင် အများဆုံးစိုက်ပျိုးထုတ်လုပ်နေပြီး အဓိက ပြည်ပဈေးကွက်အနေဖြင့် ထိုင်းနိုင်ငံနှင့်တရုတ်နိုင်ငံသို့ တင်ပို့ရောင်းချကြသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။


East West Seed Myanmar ကြော်ငြာ

စိုက်ပျိုးထုတ်လုပ်သူ တောင်သူဦးကြီးများခင်ဗျာ...မိမိတို့စိုက်ပျိုးထုတ်လုပ်လိုက်တဲ့ သီးနှံက အရည်အသွေးပြည့်ဝပြီး စျေးကွက်မှာမျက်နှာလှဖို့ ဆိုရင် အဓိက အရေးကြီးတဲ့ မျိုး မှန်ကန်ဖို့လိုအပ်ပါတယ်...ဦးကြီးတို့ စိုက်ပျိုးမယ်ဆို ကျနော်တို့က မျိုး မှန်ကန်မှုကို တာဝန်ယူပါတယ်...East-West Seed (မြားနီ မျိုးစေ့)ဆိုတာ အရည်အသွေးပြည့်ဝတဲ့ မျိုးစေ့များကို သုတေသနပြု စမ်းသပ်ပြီးမှ ထုတ်လုပ်ရောင်းချနေသော ကုမ္ပဏီတစ်ခုဖြစ်ပါတယ်...ဒီတစ်ခါတော့ မြားနီ မျိုးစေ့ အနေနဲ့ အောက်ပါ အရည်အသွေးမြင့်မျိုးစေ့များနဲ့ မိတ်ဆက်ပေးလိုက်ပါတယ် ခင်ဗျာ....
Read more Facebook page သို့သွားရန်

ဆွေးနွေးချက်များ

ဆွေးနွေးရန်