ထိုင်းတွင် ဆေးခြောက်သုံးခွင့်တရားဝင်ခွင့်ပြုလိုက်သော်လည်း အပျော်အဖြစ် သုံးခွင့်ပြုမည်မဟုတ်

ထိုင်းနိုင်ငံဟာ ဆေးခြောက်စိုက်ပျိုးတာနဲ့ ရောင်းချတာကို တရားဝင်ခွင့်ပြုလိုက်တဲ့ အာရှတိုက်ရဲ့ ပထမဦးဆုံးနိုင်ငံ ဖြစ်လာပါတယ်။ ဒီပြောင်းလဲမှုကနေ အမေရိကန်ဒေါ်လာ နှစ်ဘီလျံ တန်ကြေးရှိတဲ့ ဈေးကွက်ကြီးကို စတင်လှုပ်နှိုးနိုင်လိမ့်မယ်လို့ ထိုင်းအစိုးရက မျှော်လင့်နေပါတယ်။

ဒါပေမဲ့ ဆေးခြောက်ကို အပန်းဖြေစရာအဖြစ် သုံးစွဲတာကိုတော့ ပိတ်ပင်ထားဆဲဖြစ်ကြောင်း ထိုင်းနိုင်ငံ ကျန်မာရေးဝန်ကြီး Anutin Charnvirakul က ဥပဒေစတင်အသက်ဝင်မယ့် CNN သတင်းဌာနနဲ့ ပြုလုပ်ခဲ့တဲ့ အင်တာဗျူးတစ်ခုမှာ ပြောဆိုထားပါတယ်။

ထိုင်းနိုင်ငံဟာ ဆေးခြောက်သုံးစွဲမှုကို ၂၀၁၈ ခုနှစ်က စတင်သတ်မှတ်ခဲ့တဲ့အတိုင်း ဆေးကုသရေး ရည်ရွယ်ချက် အတွက်သာ ခွင့်ပြုသွားမယ်လို့ ဆိုပါတယ်။ "ကမ္ဘာလှည့်ခရီးသည်တွေဟာ ဆေးကုသမှုခံယူဖို့ဖြစ်စေ၊ ကျန်းမာရေးထုတ်ကုန် ဝယ်ယူသုံးစွဲဖို့ လာတာဖြစ်စေ ဒါက ပြဿနာမဟုတ်ပါဘူး" လို့ Anutin က ပြောပါတယ်။

"ခရီးသွားတစ်ယောက်ဟာ ဆေးခြောက်လိပ် လွတ်လွတ်လပ်လပ် သောက်ဖို့ ရည်ရွယ်ချက်နဲ့ ထိုင်းနိုင်ငံကို လာမယ်ဆိုရင်တော့ ဒါဟာ မှားယွင်းနေတယ်"လို့ ၎င်းက ဆက်ပြောပါတယ်။ "အဲဒီရည်ရွယ်ချက်နဲ့တော့ မလာခဲ့ပါနဲ့။ ကျွန်တော်တို့ ကြိုဆိုမှာမဟုတ်ပါဘူး" လို့ Anutin က CNN သတင်းဌာနကို ပြောဆိုပါတယ်။

ထိုင်းဥပဒေအရ တစ်စုံတစ်ယောက်ဟာ ဆေးခြောက်ရှူပြီး လူပုံလယ်မှာ ရေချိန်ကိုက်နေမယ်ဆိုရင် အများပြည်သူကို အနှောက်အယှက်ဖြစ်စေတယ်လို့ သတ်မှတ်ပြီး ထောင်ဒဏ် သုံးလဖြစ်စေ၊ ငွေဒဏ် ဒေါ်လာ ၇၂၀ ဖြစ်စေ ကျခံရမှာဖြစ်ကြောင်း Bangkok Post သတင်းဌာနက ရေးသားထားပါတယ်။

"ပြည်သူလူထုကို ဆေးခြောက် အပျော်သုံးစွဲလာစေဖို့ ဒါမှမဟုတ် တစ်ပါးသူ အနှောင့်အယှက် ဖြစ်စေတဲ့ပုံစံနဲ့ သုံးစွဲစေဖို့ အားပေးအားမြှောက် လုပ်သွားမှာမဟုတ်ပါဘူး" လို့ Anutin  က ပြောပါတယ်။

ထိုင်းအစိုးရဟာ ပြည်တွင်း ဆေးခြောက်လုပ်ငန်းကို အားပေးမြှင့်တင်တဲ့အနေနဲ့ ပြည်သူတွေ မိမိတို့နေအိမ်မှာ စိုက်ပျိုးနိုင်အောင် ဆေးခြောက်ပင် တစ်သန်းခန့် အခမဲ့ပေးဝေသွားမယ်လို့ ပြောထားပါတယ်။ ဒါပေမဲ့ ကန့်သတ်ချက်တစ်ခုတော့ ရှိနေပါတယ်။ နိုင်ငံမှာ စိုက်ပျိုးခွင့်ပြုတဲ့ ဆေးခြောက်ပင်တွေအတွင်း THC စိတ်ကြွပစ္စည်းပါဝင်မှု သုည ဒသမ ၂ ရာခိုင်နှုန်းထက် ပိုများလို့မရပါဘူး။

မိမိတို့နေအိမ်မှာ ဆေးခြောက်ပင် စိုက်ပျိုးမယ့် မည်သူမဆို အစားအသောက်နဲ့ ဆေးဝါးကွပ်ကဲရေးဌာန (FDA) မှာ ဖြစ်စေ၊ အစိုးရ ထုတ်ဝေထားတဲ့ "Plant Ganja" အက်ပလီကေးရှင်းကတစ်ဆင့် ဖြစ်စေ မှတ်ပုံတင်ကြရမှာဖြစ်ပါတယ်။ ခွင့်ပြုချက်မရှိဘဲ ဆေးခြောက်ပင် စိုက်ပျိုးတာကို တွေ့ရှိရင် ထောင်ဒဏ် သုံးနှစ် ဒါမှမဟုတ် ငွေဒဏ် ဒေါ်လာ ၈၆၀၀ ကျခံရနိုင်ပါတယ်။

အစိုးရကတော့ နေအိမ်တွေမှာ ဆေးခြောက်ပင် စိုက်ပျိုးနေတာတွေနဲ့ ဘယ်လိုနည်းနဲ့ အသုံးပြုနေကြသလဲဆိုတာတွေကို စစ်ဆေးဖို့ အစီအစဉ် ထုတ်ပြန်ကြေညာထားခြင်းမရှိသေးပါဘူး။

ထိုင်းအစိုးရဟာ ဥပဒေ ပြောင်းလဲမှုအရ ဆေးခြောက်မှုနဲ့ ပြစ်ဒဏ်ချမှတ်ခံထားရတဲ့ အကျဉ်းသား ၃၀၀၀ ဝန်းကျင်းကိုလည်း လွတ်ငြိမ်းခွင့် ပြုလိုက်တာ ဖြစ်ပါတယ်။

ဒါဟာ မူယစ်ဆေးဝါးနဲ့ ပတ်သက်ပြီး ထိုင်းနိုင်ငံရဲ့ ရပ်တည်ချက် ပြောင်းလဲလာမှု ရှေ့ပြေးလည်း ဖြစ်နိုင်ပါတယ်။ ထိုင်းနိုင်ငံဟာ တင်းကျပ်တဲ့ မူးယစ်ဆေးဝါးဥပဒေတွေ နှစ်ပေါင်းများစွာကြာ ပြဋ္ဌာန်းလာခဲ့ပြီး ဘိန်းဖြူ၊ ကိုကင်းနဲ့ မက်သမ်ဖတမင်း ‌မှောင်ခိုရောင်းဝယ်မှုနဲ့ ထုတ်လုပ်မှုတို့ကို ကျူးလွန်ရင် သေဒဏ်နဲ့ တစ်သက်တစ်ကျွန်းပြစ်ဒဏ်တွေအထိ ချမှတ်ခဲ့တာဖြစ်ပါတယ်။

ကြာသပတေးနေ့မှာ ဥပဒေသစ် အသက်မဝင်သေးခင်အထိ ဆေးခြောက်ထုတ်လုပ်မှု ပြုလုပ်ပါက ထောင်ဒဏ် ၁၅ နှစ်ဖြစ်စေ၊ ငွေဒဏ် ဒေါ်လာ ၄၃၀၀၀ အထိဖြစ်စေ ကျခံရဖို့ထိ ရှိနေခဲ့တာ ဖြစ်ပါတယ်။

ဝေယံဟိန်း (B.Ag)

Ref: Thailand Becomes First Country in Asia to Legalize Cannabis - INSIDER

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။ 

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်