အစိမ်းရောင်လမ်းဘင်္ဂလားပင်လယ်အော်၊ အိန္ဒိယ-ဘင်္ဂလားဒေ့ရှ်နယ်စပ်အနီးပင်လယ်ပြင်မှာ လေဖိအားနည်းရပ်ဝန်းတစ်ခုဖြစ်နေတာနဲ့ တောင်တရုတ်ပင်လယ်မှာ တိုင်ဖွန်းမုန်တိုင်းတစ်လုံး ဖြစ်ပေါ်နေတဲ့အခြေအနေများကြောင့် ဇွန်လအကုန်-ဇူလိုင်လဆန်းပိုင်းမှာ မြန်မာတစ်နိုင်ငံလုံး နေရာအနှံ့အပြားမိုးရွာနိုင်မှာဖြစ်ပြီး တိုင်းနဲ့ပြည်နယ်အချို့မှာတော့ မိုးကြီးမယ့်အခြေအနေများဖြစ်လာနိုင်တယ်လို့ အပြည်ပြည်ဆိုင်ရာမိုးလေဝသစောင့်ကြည့်လေ့လာသူတစ်ဦးဖြစ်သူ ဦးဝင်းနိုင်က ခန့်မှန်းထားပါတယ်။
ဒါကြောင့် လေပြင်းတိုက်ခတ်ပြီး မိုးကြီးမယ့်အန္တရာယ်၊ တောင်ကျချောင်းရေရုတ်တရက်ဆင်းလာနိုင်မယ့်အန္တရာယ်၊ မိုးတိမ်တောင်ကြီးများဖြစ်လာပြီး စိုစွတ်စိုက်ဆင်းလေပြင်းတိုက်ခတ်နိုင်မယ့်အန္တရာယ်နဲ့ မိုးကြိုးအန္တရာယ်တွေရှိနိုင်တယ်လို့ ဦးဝင်းနိုင်က သတိပေးထားပါတယ်။
အဲ့ဒီလို အန္တရာယ်တွေရှိနိုင်တဲ့ ဒေသတွေနဲ့ပတ်သက်လို့ ဦးဝင်းနိုင်ကို Green Way က ဆက်သွယ်မေးမြန်းထားတာကို ဖော်ပြပေးလိုက်ပါတယ်။
“ အလယ်ပိုင်းက ကျွန်တော်တို့ မကွေးတိုင်း၊ မန္တလေးတိုင်းတောင်ပိုင်းရယ်၊ ရှမ်းပြည်နယ်တောင်ပိုင်းနဲ့ ကယားပြည်နယ် အဲ့ဒီနေရာတချို့ကလွဲရင် ကျန်တဲ့တိုင်းနဲ့ပြည်နယ် အကုန်လုံးမှာ မိုးကြီးမယ့်သဘောရှိနေတယ်။ အလယ်ပိုင်းတွေက လုံးဝမရွာမှာမဟုတ်ဘူး။ ရွာမှာ။ သူက မိုးမကြီးမှာပေါ့နော်။ သူ့နေရာမှာ ပုံမှန်အားဖြင့်ဆိုရင် ကျွန်တော်တို့ ၅ ရက်ကနေ ၁၀ ရက်အတွင်းမှာ ၃ လက်မအထိကို ရွာနိုင်တယ်။ ညောင်ဦးလည်း ပါတယ်။ အဲ့ဒီမှာက ၂ လက်မ၊ ၃ လက်မ ရွာမယ်ဆိုရင် သူတို့အရပ်ဒေသအနေနဲ့ဆိုရင် ဒါက မိုးကြီးတယ်လို့ ပြောရမှာပေါ့။ တောင်သူတွေအတွက် လိုအပ်တဲ့မိုးရေဖြစ်မယ်။ နောက်တစ်ခုက မြေဆီလွှာ အစိုဓာတ် ခြောက်နေတဲ့နေရာတွေလည်း ရာနှုန်းပြည့်နီးပါးလောက်ကို ပြန်ဖြစ်လာမယ်။ ဇူလိုင်လဆန်းပိုင်းအတွက်ပေါ့နော်”
“ ရခိုင်ရိုးမ၊ ပဲခူးရိုးမ၊ ချင်းပြည်နယ်၊ ကချင်ပြည်နယ်၊ ရှမ်းပြည်နယ်မြောက်ပိုင်းနဲ့ အရှေ့ပိုင်း၊ ကယားပြည်နယ်တောင်ပိုင်းဆိုတော့ ကရင်ပြည်နယ်ပေါ့၊ နောက် မွန်ပြည်နယ်နဲ့ တနင်္သာရီတစ်ခုလုံးပေါ့။ အဲ့ဒီလို တောင်ထူထပ်တဲ့နေရာတွေမှာဆိုရင် ဟိုး ပြီးခဲ့တဲ့နှစ်တုန်းက ပေါင်မှာ မြေပြိုသလိုအခြေအနေမျိုးတွေ ဖြစ်လာနိုင်တယ်။ တောင်ထူထပ်မယ့်နေရာတွေမှာက မိုးကြီးမယ့် အခြေအနေဖြစ်နေတာကိုး။ အလယ်ပိုင်းဒေသက မကွေးတိုင်းတို့၊ စစ်ကိုင်းတိုင်းအောက်ပိုင်း နည်းနည်းပေါ့။ အဓိကက အဲ့ဒီ မိုးနည်းရေရှားရပ်ဝန်းတစ်ခုကလွဲရင် နောက်တစ်ခုက ရှမ်းပြည်နယ်တောင်ပိုင်းဒေသတချို့ကလွဲရင် ကျန်တဲ့ဒေသတွေအကုန်လုံးက မိုးကြီးမယ့်အနေ အထားဖြစ်နေတယ်”
“ အလယ်ပိုင်းမိုးနည်းရေရှားဒေသကတော့ မိုးကြိုးအန္တရာယ် ပိုများတာပေါ့။ ဘာလို့ဆို သူက ခြောက်သွေ့ထားတဲ့နေရာဖြစ်နေတာကိုး။ ပြောမယ်ဆိုရင်တော့ တစ်နိုင်ငံလုံး ဂရုစိုက်ရမယ့် အနေအထားပဲ။ တောင်ကျချောင်းရေအန္တရာယ်ပါမယ်။ စိုက်ဆင်းလေပြင်းပါမယ်။ နောက်တခု အရေးကြီးတာက မိုးများလာရင် မြစ်ရေတက်လာမယ်။ ကျွန်တော်တို့ ပင်လယ်ဒီရေ အမြင့်ဆုံး တက်နိုင်တဲ့အခြေအနေကတော့ ဇူလိုင် ၁၃၊ ၁၄ လောက်မှာဖြစ်မှာဆိုတော့ အောက်ရေတောင့်ခံမယ့်အနေအထားတော့မရှိသေးဘူး။ သို့သော် အထက်ရေကျလာတာနဲ့ အဲ့ဒီရက်တွေ တိုက်ဆိုင် သွားရင်တော့ မြစ်တွေ ရေကြီးမယ့်အနေအထားဖြစ်မယ် ”
(မိမိဒေသတစ်ခုချင်းစီအလိုက် မိုးလေဝသအခြေအနေများကို ဦးဝင်းနိုင်နဲ့ တိုက်ရိုက်မေးမြန်း လိုသူများအနေနဲ့ Green Way ဆော့ဝဲထဲမှာရှိတဲ့ ‘ မေးကြ၊ ဖြေကြ...ဒေသအလိုက်မိုးလေဝသ’ ဆိုတဲ့ အဖွဲ့လေးမှာ အခမဲ့ဝင်ရောက်ပြီး မေးမြန်းနိုင်ပါတယ်။)
Photo crd_Win Naing FB
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
မာလာမြိုင် ကုမ္ပဏီ ကြော်ငြာ
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ question.title }}