စိုက်ပျိုးသုတ ဇန်နဝါရီလ

ဆောင်းသီးနှံများအောင်မြင်ဖြစ်ထွန်းရေးအတွက် အရေးကြီးသည့်လ ဖြစ်သည်။ နွေစပါးစိုက်ပျိုးရေးအတွက် စတင်သင့်သည်လလည်း ဖြစ်သည်။ မည်သည့်သီးနှံကို စိုက်ပျိုးသည်ဖြစ်စေ စိုက်ပျိုးသည့်အတိုင်း အောင်မြင်ဖို့လိုသည်။ သီးပွင့်ရင့်မှည့်သမျှလည်း သီးနှံအထွက်ရရှိဖို့လိုသည်။ သို့ဖြစ်၍ ယခုလအတွင်း စိုက်ပျိုးပြုစုထိန်းသိမ်းသင့်သည့် လုပ်ငန်းများကို အလေးထားဆောင်ရွက်ရန် လိုပါသည်။

ဆောင်းသီးနှံများ

စိုက်ချိန်မှန်၊ အစိုဓာတ်ကောင်း၊ မြေဆီလွှာကောင်းလို့ အောင်မြင်ဖြစ်ထွန်းသည့် ဆောင်းသီးနှံများကို ဆက်လက်ပြုစုထိန်းသိမ်းစောင့်ရှောက်ရပါမည်။ ပြည်တွင်းပြည်ပက စိုက်ပျိုးရေးဆေးအမျိုးမျိုးတွေ ယခုအခါအလွယ်တကူ ဝယ်ယူသုံးစွဲ ပက်ဖျန်းနိုင်သည်ကို တွေ့မြင်ရသည်။ အပင်အားကောင်းပြီး ပိုမိုသီးပွင့်အောင်လုပ်ရပါမည်။

ပဲမျိုးစုံသီးနှံများသည် ပွင့်သီးချိန်များတွင် နိုက်ထရိုဂျင်နှင့် ဘိုရွန်အာဟာရဓာတ်များ လိုကြောင်းသိရသည်။ အဆိုပါဓာတ်များသည် ပဲမျိုးစုံအစေ့အဆန်ပြည့်ဝစေရန်နှင့် အပွင့်များမှ ရွက်ကြွေခြင်းများကို ကာကွယ်နိုင်ပါသည်။

သီးနှံပင်များ၏ သီးပွင့်ရင့်မှည့်သမျှမှ အထွက်ရရှိဖို့လိုပါသည်။ သို့ဖြစ်၍ ပိုးမွှားရောဂါကာကွယ်နှိမ်နင်းရေးလုပ်ငန်းများကိုလည်း လုပ်ကိုင်ရပါဦးမည်။

ပဲမျိုးစုံသီးနှံများတွင် အပင်ငယ်စဉ်၌ ပင်စည်ထိုးယင်၊ ပန်းပွင့်ချိန်၊ အသီးသီးချိန်နှင့် ပင်ပိုင်းကြီးထွားချိန်တစ်လျှောက်တွင် ငမြှောင်တောင်၊ ပဲတောင့်ထိုးပိုး စသည့်ပိုးများ ကျရောက်နိုင်ကြောင်း သိရှိရသည်။

စိုက်ပျိုးသီးနှံပင်များတွင် ပိုးမွှားရောဂါသာမက ကြွက်ဖျက်ဆီးမှုအန္တရာယ်လည်း ရှိနိုင်သေးသည်။ ကြွက်ဖျက်ဆီးသဖြင့် သီးနှံအထွက်ဆုံးရှုံးနိုင်သေးသည်။ ကာကွယ်နှိမ်နင်းရေးလုပ်ငန်းများကို လုပ်ကိုင်ရန်လည်း လိုပါသည်။

သို့ဖြစ်၍ ဆောင်ရွက်သင့်သည်များကို ဖေါ်ပြလိုပါသည်။

၁။ သီးနှံပင်၏ အပင်အသွင်အပြင်လက္ခဏာကိုကြည့်ပြီး အာဟာရလိုအပ်မှုရှိမရှိနှင့် လိုအပ်သည့်အာဟာရကိုခန့်မှန်းပါ။ ထို့နောက် လိုအပ်သည့်အာဟာရပါသော မြေသြဇာရည်ကိုသာ ပက်ဖျန်းသုံးစွဲပါ။
၂။ အသင့်စိုက်ပျိုးရေးသုံးဆေးများကို ဝယ်ယူရရှိနိုင်ခြင်းမရှိပါက ပဲမျိုးစုံသီးနှံများတွင် ပန်းပွင့်ချိန်မှစ၍ သီးကင်းစတင်ဝင်ချိန်ထိ နိုက်ထရိုဂျင်အာဟာရရရှိစေရန် ယူရီးယား ဓာတ်မြေသြဇာနှင့် ဘိုရွန်အာဟာရရရှိစေရန် လက်ချားကို တစ်ကြိမ်မှ နှစ်ကြိမ် ဖျန်းပက်ပေးပါ။
၃။ ပိုးမွှားရောဂါနှင့်ပတ်သက်၍ သီးနှံအလိုက် ဒေသအလိုက် ကျရောက်လေ့ရှိသည့် ပိုးမွှားရောဂါကို သီးနှံအပင်ဖြစ်ထွန်းစဉ်တွင် စဥ်ဆက်မပြတ် ကင်းထောက်စစ်ဆေးပါ။ အကယ်၍ ပိုးမွှားရောဂါလက္ခဏာတွေ့ရှိပြီး ဆေးပက်ဖျန်းသင့်ပါက နှိမ်နင်းနည်းစနစ် မှန်စွာဖြင့် ထိထိရောက်ရောက်နှိမ်နင်းပါ။ ကျရောက်သည့်ပိုးမွှားရောဂါအမျိုးအစားနှင့် ကာကွယ်နှိမ်နင်းသည့်ဆေး ကိုက်ညီရေးကို အထူးသတိပြုပါ။
၄။ ရေသွင်းစိုက်ပျိုးသည့် စိုက်ခင်းများတွင် ပန်းစပွင့်ချိန်နှင့် အသီးကင်းဝင်စအချိန်များတွင် အစိုဓာတ်လုံလောက်စွာရရှိရန် ဆောင်ရွက်ပါ။
၅။ ကြွက်ကာကွယ်နှိမ်နင်းရေးသည် တစ်ဦးချင်းဆောင်ရွက်ရုံဖြင့် အောင်မြင်မှုနည်းနိုင်သည်။ လယ်ယာနီးချင်း တောင်သူလယ်သမားများတစ်ချိန်တည်းတစ်ပြိုင်တည်း ကြွက်သတ်ဆေးကို စနစ်တကျသုံးစွဲပြီး ပြိုင်တူဆောင်ရွက်ပါ။

နွေစပါးသီးနှံ

မြန်မာနိုင်ငံအောက်ပိုင်းနှင့် အထက်ပိုင်းဒေသများ နွေစပါးစိုက်ချိန် မတူကြပါ။ အထက်ပိုင်းဒေသများတွင် အချို့က မိုးစပါးကိုရိတ်သိမ်းဆဲဖြစ်သည်။ အချို့က ဆောင်းသီးနှံများကို မိုးစပါးအပြီး စိုက်ထားသည်။ နွေစပါးစိုက်ချိန်မရောက်သေးပါ။ ဆောင်းသီးနှံ စိုက်ပျိုးနိုင်ခြင်းမရှိလျှင်လည်း အချို့ဒေသများတွင် နွေစပါးအတွက် ရာသီဥတုက အေးလွန်းနေသေးသည်။

မုတ်သုန်မိုးစတင်ရွာသွန်းလေ့ရှိသည့် မြန်မာနိုင်ငံအောက်ပိုင်းဒေသများအနေဖြင့် စိုက်ချိန်နောက်မကျရေးသည် အရေးကြီးသည်။ ပုံမှန်စိုက်ပျိုးလေ့ရှိသည့် စပါးမျိုးများမှာ သီးထပ်ရင်၊ ရက်-၉၀၊ ဆင်းသုခ၊ ပခန်းရွှေဝါ၊ မနောသုခ၊ ရွှေသွယ်ရင်၊ ထွန်းသီရိ-စသည့် မျိုးများဖြစ်ကြောင်းနှင့် စိုက်ပျိုးနည်းစနစ်မှာ အများအားဖြင့် တိုက်ရိုက်မျိုးစေ့ချနည်းစနစ်ဖြစ်ကြောင်း သိရသည်။

နွေစပါးစိုက်ပျိုးရေးအတွက် အောက်ပါတို့ကို ဆောင်ရွက်သင့်ပါသည်။

၁။ မြန်မာနိုင်ငံအောက်ပိုင်းဒေသများတွင် ဒီဇင်ဘာလအတွင်းစိုက်ပျိုးခြင်းမပြုရသေး ပါက ဇန်နဝါရီလအတွင်းအပြီး စိုက်ပျိုးပါ။
၂။ ဒေသအလိုက်ဖြစ်ထွန်း စျေးကွက်ကောင်းသည့် မျိုးကောင်းမျိုးသန့်စပါးမျိုးကို ရွေးချယ်စိုက်ပျိုးပါ။
၃။ စိုက်ပျိုးရေချွေတာရေး၊ ကုန်ကျစရိတ်သက်သာ‌စေရေးကို အလေးထားပြီး သင့်တော်သည့်စိုက်ပျိုးနည်းစနစ်ကို အသုံးပြုပါ။
၄။ ပေါင်းမြက်ကာကွယ်နှိမ်နင်းရေးကို အထူးဂရုစိုက်ပါ။

နိုင်ငံတစ်ဝန်းစိုက်ပျိုးထားသည့် ဆောင်းသီးနှံများဖြစ်သော ပဲမျိုးစုံ၊ ဆီထွက်သီးနှံ၊ နှံစားသီးနှံနှင့် အခြားသီးနှံများ အောင်မြင်ဖြစ်ထွန်းခြင်းဖြင့် သီးနှံထုတ်လုပ်မှုတိုးတက်စေလိုပါသည်။ စတင်စိုက်ပျိုးမည့်နွေစပါးသီးနှံများ အောင်မြင်ဖြစ်ထွန်းစေလိုပါသည်။ စိုက်ပျိုးကုန်ကျစရိတ်သက်သာပြီး သီးနှံအထွက်ဝင်ငွေတိုးမြှင့်ရရှိအောင် ဆောင်ရွက်ကြရန် တိုက်တွန်းအပ်ပါသည်။

ဆင်းသီဟ

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...