ပိုးသတ်ဆေးဖျန်းပြီး ငွေဖြုန်းနေကြသူများ

စိုက်ပျိုးသီးနှံစိုက်ပျိုးနေကြသူများအနေဖြင့် မိမိတို့ဆောင်ရွက်နေမှုများသည် မှန်ကန်မှုရှိရဲ့လား၊ မှား ယွင်းနေတာလားဆိုတာကို ပြန်လည်ဆင်ခြင်သုံးသပ်ရန် လိုအပ်လာပြီလို့ ဆိုချင်ပါတယ်။

ဘာတွေမှားယွင်းနေတာလဲ၊ ဘာတွေပြင်ဆင်ရန်လိုတာလဲ ဆိုလာရင်တော့...

ပိုးသတ်ဆေး ပက်ဖျန်းမှုတွင် တွေ့မြင်နေရသော အမှားများလို့ ဆိုရမှာပါ။

မိမိအနေဖြင့် စိုက်ပျိုးရေးကိစ္စရပ်များဖြင့် ခရီးထွက်သည့်အခါ၊ မိမိအား အပ်နှံထားသော မတ်ပဲစိုက်ခင်းများကို သွားသည့်အခါ၊ လမ်းတလျှောက်စိုက်ခင်းများတွင် ပိုးသတ်ဆေး ပက်ဖျန်းနေကြသူများနှင့် ကြုံတွေ့သည့်အချိန်တွင်..

♥အပင်ဘယ်နှစ်ရက်သားရှိနေပြီလဲ၊
♥ဘာမျိုးစိုက်တာလဲ၊
♥ဘာဆေးဖျန်းတာလဲ၊
♥ဆေးကို ဘယ်နှုန်းသုံးတာလဲ၊
♥တစ်ဧက ဆေးဘယ်နှစ်ပုံး ဖျန်းတာလဲ၊

စသည်ဖြင့် မေးမြန်းလေ့ရှိရာ အမြင်မတော်တာတွေ အများကြီး တွေ့ဖြစ်ပါတယ်။

ဘာတွေလဲဆိုတော့...

ကုမ္ပဏီ၊ ဆေးအမည်တို့ကို အစွဲဖြင့် သုံးစွဲနေကြသူများ၊ မိမိကြိုက်သော ဆေးအမျိုးအစားကို တစ်ရာသီအတွင်း ထပ်ခါထပ်ခါ အသုံးပြုနေကြသူများကို တွေ့နေရသည့်အပြင်...

ဆေးသုံးစွဲမှု(ဆေးနှုန်း)။
ဆေးအမယ် အများအပြား ရောစပ်ပက်ဖျန်းခြင်း။
မရောသင့်သည့်ဆေးများ ရောစပ်ပက်ဖျန်းခြင်း။

စသည်တို့တွင် အမှားအယွင်များစွာ ကြုံတွေ့နေရပြီး မိမိတို့ သုံးစွဲချင်သလို ဆေးဖျန်းပုံးအတွင်း ထည့်သွင်းပက်ဖျန်းနေကြခြင်းကို တွေ့ရှိနေရပြီး ထိုကိစ္စများသည် လုပ်ဆောင်သင့်သလားဆိုတာကို ပြန်မလုပ်ဆောင်သင့်သလားလည်း သုံးသပ်ရန်လိုအပ်လာပြီလို့ ဆိုချင်ပါတယ်။

မိမိအနေဖြင့် ကုမ္ပဏီအစွဲ၊ ဆေးအစွဲတို့ကို ရေးသားခဲ့ဖူးပြီးဖြစ်၍ ထပ်မရေးလိုသော်လည်း အချို့ကိစ္စများသည် ရေးသားရန်လိုအပ်လာပြီဖြစ်၍ ရေးသားရပါလျှင်..

♥ဆေးသုံးစွဲမှု(ဆေးနှုန်း)၊
မကြာခဏတွေ့နေရသော အဖြစ်အပျက်လုပ်ရပ်များပါ။

မိမိအနေဖြင့် မိမိထံအပ်နှံထားသော စိုက်ခင်းများသို့ သွားရောက်ကြည့်ရှုရင်း လယ်နီးစပ်တောင်သူ ပိုးသတ်ဆေး ပက်ဖျန်းနေတာကို တွေ့ရတော့ သွားပြီးစပ်စုမိပါတယ်၊ ဘာဆေးတွေ ဖျန်းနေသလဲပေါ့။

ဟက်ဇာဂွန်(Hexaconazole) ဖြန်းနေခြင်းဖြစ်ပြီး စက်ဆေးဖျန်းပုံး တစ်ပုံးလျှင် 75 CC ထည့်သွင်း၍ ပက်ဖျန်းနေခြင်း ဖြစ်ရာ ထိုပဲခင်းအား ကြည့်မိတော့ ဖားဥမှို၊ သံချေး၊ ရွက်ပျောက်ရောဂါ တစ်မျိုးမှ ရှိနေတာ မဟုတ်ဘဲ ကာကွယ်မှုအနေဖြင့် ပက်ဖျန်းနေခြင်းတာလို့ တွေ့ရပါတယ်။

ဒီလိုကာကွယ်မှုအနေနဲ့ပဲဆိုရင် စက်ဆေးဖျန်းပုံး တစ်ပုံးလျှင် 75 CC ထည့်သွင်း၍ ပက်ဖျန်းခြင်းဟာ များလွန်းနေပြီး 25 CC ခန့်သာ သုံးစွဲသင့်ပြီး ကုသလျှင်မူ 40 CC ခန့်သာ သုံးသင့်တာပါ။

ဆေးအမယ် အများအပြား ရောစပ်ပက်ဖျန်းခြင်း

အဆင်အခြင်မဲ့ လုပ်ရပ်တစ်ခုလို့ မြင်နေရပြီး ထိုသို့ ရောစပ်သုံးစွဲမှု အလေ့အကျင့်ကို စတင်တီထွင် ကျင့်သုံးစေခဲ့တာကတော့ ဆေးရောင်းချသူ၊ ကုမ္ပဏီဝန်ထမ်း အချို့ဖြစ်နေကာ သူတို့ရောစပ်ပေးတာကတော့ Ai တစ်မျိုး၊ နှစ်မျိုးသာ ပါတဲ့ဆေးတွေကို အများဆုံး နှစ်မျိုးခန့်သာ ရောစပ်ပက်ဖျန်းစေခဲ့တာမျိုး ဖြစ်ပါတယ်။

ဒါပေမဲ့ ယခုအခါမှာတော့ ဆရာထက် တပည့်လက်စောင်းထက်ဆိုသလို ပိုးသတ်ဆေး၊ မှိုသတ်ဆေးများကို နှစ်မျိုးလောက်တင် ရောစပ်ပက်ဖျန်းခြင်း မဟုတ်တော့ဘဲ သုံးမယ်၊ လေးမယ်အထိ ရောစပ်ပက်ဖျန်းနေကြတာကို စိတ်ပျက်ဖွယ်ရာ တွေ့မြင်လာရပါတယ်။

ထိုသို့ရောစပ်ပက်ဖျန်းနေကြသူများဟာ ပိုးသတ်ဆေးအကြောင်း ဘာမှ ရေရေရာရာ မသိရှိဘဲ ကုမ္ပဏီ တစ်ခုချင်းအလိုက် နာမည်ကြီးသောဆေးများ၊ ကုမ္ပဏီနှစ်ခုတွင် နာမည်ကြီးသောဆေးများကို ရောစပ်ပက်ဖျန်းမှု ပြုနေကြခြင်း ဖြစ်ပါတယ်။

ဒီလို လုပ်ဆောင်သင့်ပါသလားလို့ ဆိုလာလျှင်တော့ အဆင်အခြင်မဲ့လုပ်ရပ်လို့ပဲ ဆိုရမှာဖြစ်၍ မလုပ်ဆောင်သင့်ပါဘူးလို့ ပြောချင်ရေးချင်ပါတယ်။

ယခုလို တောင်သူအချို့ သုံးစွဲနေကြခြင်းဟာ ဘယ်စိုက်ပျိုးရေးပညာရှင်၊ ဘယ်ဆေးဆိုင်ကမှ ရောစပ် ပက်ဖျန်းစေတာမဟုတ်ဘဲ မိမိသဘောနှင့် မိမိ လုပ်ဆောင်နေခြင်းဖြစ်၍ ဆရာမနိုင် နှစ်ဆောင်ပြိုင် လို့ပင် ဆိုရမှာပါ။

သူတို့ရောစပ်လိုတဲ့ ဆေးများကို ဆေးဖျန်းပုံးထဲ တိုက်ရိုက်ရောစပ်ခြင်းဖြစ်လို့ ကြိုတင်၍ ရောစပ်သင့်မသင့် စမ်းသပ်မှုကိုလည်း မလုပ်ဆောင်ကြပါဘူး။

ထိုအလေ့အကျင့်များဟာ တောင်သူလယ်သမားအချို့အနေဖြင့် တတ်သိပညာရှင်များနှင့် တိုင်ပင်ဆွေးနွေး အကြံဉာဏ်ရယူခြင်းမရှိဘဲ စိတ်ထင်ရာလုပ်နေခြင်းဖြစ်ရာ ဘယ်လိုမှ အကျိုးရှိစရာ လမ်းမမြင်ပါဘူး။

ဘယ်လောက်တောင်မှ မဆင်မခြင် လုပ်ဆောင်နေသလဲဆိုတော့ စက်ဆေးဖြန်းပုံး 25 လီတာ တစ်ပုံးလျှင်..

♥အီသာပလတ် တစ်ဇွန်း

♥ယကၡ 40 CC

♥ငှက်ကြီးတောင် 20 CC

♥လန္ဘရာ 40 CC

စတဲ့ တန်ဖိုးကြီးဆေးပြင်းများကို ထည့်သွင်းပက်ဖျန်းခြင်းပြုရာ ပုံမှန်ပက်ဖျန်းသူထက် သုံးဆမျှ ပိုကုန်နေတာကို တွေ့ရှိနေရပါတယ်။

ထိုသို့လုပ်ဆောင်ခြင်းကြောင့် ~

အပင်အတွက် ရာခိုင်နှုန်းပြည့် အကျိုးမရှိနိုင်ခြင်း။

♥ကုန်ကျစရိတ်များပြားခြင်း။

ဆိုတာတွေကတော့ ကျိန်းသေဖြစ်နေမှာပါ။ ဒါတောင်အခြားဆိုးကျိုးများ ထည့်မတွက်သေးပါဘူး။

♥မရောသင့်သည့်ဆေးများ ရောစပ်ပက်ဖြန်းခြင်း

... ကတော့ နေရာတကာမှာ တွေ့နေမြင်နေရတာဖြစ်ပါတယ်။

သူများက ဒီဆေးကောင်းတယ်ဆိုရင် လိုက်ဝယ်တတ်ကြပြီး မိမိအိမ်တွင် ရှိနေသော ဆေးများကိုပါ လက်ကျန်ဖြတ် ရောစပ်ပက်ဖြန်းနေကြခြင်းပါ။

ဒီထက်ဆိုးဝါးခြင်းက..

ဆေးပက်ခ သက်သာရန်၊ တခါတည်းပြီးရန် ဆိုပြီး မှိုသတ်ဆေး၊ ပိုးသတ်ဆေး၊ ရွက်ဖြန်းအားဆေး တို့ကို ရောစပ်ပက်ဖျန်းနေခြင်းဖြစ်ပြီး ထိုစိုက်ခင်းဟာ ရောဂါနှင့် ပိုး ဆိုးဝါးစွာ ကျရောက်နေသော အကွက်ဆိုပါလျင် ဘယ်အထိရှိနိုင်တော့မလဲမသိပါ။

တွေ့ခဲ့မြင်ခဲ့ဖူးပါတယ်...

♥စိုက်ခင်းမှာ အပင်သေနေတယ် ပြောမိလို့ ဆိုင်မှပေးလိုက်တဲ့ ဖော့စတိုင်း အလူမီနီယမ်(Fosetyl - Aluminium)

♥အခင်းနီးနားက မင်းအခင်းမှာ ဘက်တီးရီးယားရွက်ခြောက် ဖြစ်နေတယ် ငါဝယ်လာတဲ့ ဆေးသုံးဆိုလို့ ယူသုံးရတဲ့ ကော့ပါးအောက်စီကလိုရိုဒ်( Copper Oxychloride) တို့အပြင်

♥ဆိုင်မှလာပို့ထားတဲ့.. ပိုးသတ်ဆေးနှှင့် ရွက်ဖျန်းအားဆေး..

♥ကုလားမျက်စိ၊ တောနှမ်း ပေါင်းရှိလို့ဆိုပြီး အိမ်မှာဝယ်ထားတဲ့ ရွက်ပြန့်ပေါင်းသတ်ဆေး ဖော်မီဆာဖန်( Formesulfan)

တွေကို ကုန်ကျစရိတ်သက်သာအောင်၊ တစ်ခါတည်းပြီးသွားအောင် အလုပ်သမားကို ရောပက်ခိုင်းလိုက်တယ် ဆိုတဲ့ တောင်သူကို တွေဖူး ကြုံဖူးခဲ့ပါတယ်။

ဒီလိုလုပ်ရပ်တွေကို သစ်ပင်အတွက် အကျိုးရှိအောင်လုပ်တဲ့ လုပ်ရပ်လို့ ဆိုနိုင်ပါမည်လား။

ဆေးတစ်မျိုးတည်း ပက်ဖျန်းလျင်ပင် လုံလောက်နေသည်ကို ဆေး (၄) မျိုးကို ရောစပ်ပက်ဖျန်းတယ်ဆိုတော့ အကျိုးမရှိသော ငွေဖြုန်းတီးသည့်လုပ်ရပ်လို့ ဆိုရမှာပါ။

မိမိသုံးစွဲလိုက်သည့် ကုန်ကျစရိတ်သည် မိမိစိုက်ခင်းအတွက် အကျိုးမရှိစေသည့်အပြင် ဆိုကျိုးကိုသာ ဖြစ်ပေါ်စေလျှင် ထိုဖြုန်းတီးမှုကို ဆိုးဝါးလွန်းသည့် အဖြုန်းလို့ ဆိုရမှာပါ။

တောင်သူလယ်သမားများအနေဖြင့် မစဉ်းစားမဆင်ခြင်ဘဲ ဆေးဘူးတွင် ပါရှိသည့် အညွှန်းထက် ဆေးပိုသုံးခြင်း၊ မိမိနားလည်သိရှိခြင်းလည်းမရှိ၊ ပညာရှင်တစ်ဦးတစ်ယောက်ကမှ အကြံပြု ညွှန်ကြားထားခြင်းမရှိသည့် ဆေးအမယ်များစွာ ရောစပ်ပက်ဖျန်းခြင်း၊ ရောစပ်သုံးစွဲခင်းများအား မလုပ်ဆောင်သင့်ဘူး။

စိုက်ပျိုးသူများအနေဖြင့်..

ယခုလို စိုက်ပျိုးရေးသွင်းအားစုများ စျေးနှုန်းမြင့်တက်နေပြီး ရာသီဥတု ဖောက်ပြန်မှုကြောင့် ပိုးမွားရောဂါကျရောက်မှု ဆိုးဝါးနေချိန်တွင် မလိုအပ်သည့်အသုံးစရိတ်များလျှော့၍ ကုန်သင့်ကုန်ထိုက်သည်များကို စနစ်တကျ သုံးစွဲရန် လိုအပ်နေရာ အထက်တွင် ရေးသားထားသလို စဉ်းစားဆင်ခြင်မှု နည်းပါးစွာဖြင့် ဆေးဝါးသုံးစွဲမှုများကို မလုပ်ပါနှင့်တော့လို့ အကြံပြုအပ်ပါတယ်။

ချမ်းမြေ့ပါစေ..

ဦးသက်လွင်(ထန်းညီနောင်ပျိုးဥယျာဉ်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...