ဦးကြီးတို့နေကောင်းကြလား ဗျ ကျန်းမာရေးကို အထူးဂရုစိုက်ကြပါနော်
ခေါင်းစဉ်က ဆီလီကွန်နဲ့ အပင်တွေ ဆိုတော့ကာ အပင်တွေက ခွဲစိတ်တာတွေ ဆီလီကွန်တွေ ထည့်တာမျိုး မဟုတ်ဘူးနော်။
အမှန်တော့ ဆီလီကွန်ဆိုတာကလည်း အပင်တွေအတွက် လိုအပ်တဲ့ အပင်အာဟာရဓာတ်တစ်မျိုးပဲဖြစ်ပြီးတော့ စကြာဝဌာကြီးမှာဆိုရင် (၇)ခုမြောက်အများဆုံး သတ္တုဖြစ်ပါတယ်။ သူက မြေကြီးတွေကြားထဲမှာဆိုရင် (၂၅)ရာခိုင်နှုန်းတောင် ရှိပြီးတော့ အဲ့လိုကြောင့်လည်း အပင်တွေ က ကိုယ့်ဘာသာကိုယ် စုပ်ယူစားသုံးနိုင်ကြပါတယ်တဲ့။ သူတို့ စားသုံးတဲ့ ဆီလီကွန် ပုံစံကတော့ ဆီလီကာနဲ့ ဆီလီကိတ် ဆိုတဲ့ ပုံစံ (၂)မျိုးပဲဖြစ်ပါတယ်။
အပင်အမြစ်တွေကနေပြီးတော့ ဆီလီကွန်တွေကို ဆီလစ် အက်ဆစ် အနေနဲ့ စုပ်ယူပြီးတော့ အပင်တွေရဲ့ ကြီးထွားတဲ့နေရာတွေကို ပို့ဆောင်ပေးပါတယ်။ အဲ့နေရာတွေက အပင်ဆဲလ်တွေ တည်ဆောက်တယ်။ နောက် ဆဲလ်နံရံတွေ ခိုင်မာအောင်လုပ်ဆောင်နေတဲ့ နေရာဖြစ်ပြီးတော့ ဆီလီကွန်က ဆဲလ်နံရံတွေကို ကျန်းမာကြံခိုင်သန်စွမ်းအောင် လုပ်ပေးနိုင်ပါတယ်။
ဒါပဲလားဆိုတော့ မဟုတ်သေးဘူး ကျန်တာတွေကတော့ အောက်မှာ ဆက်ကြည့်ပါ။
(၁) ဟင်းသီးဟင်းရွက်ပင်တွေမှာ အထွက်ကို သိသိသာသာတိုးလာစေပါတယ်။
(၂) အထွက်က တိုးမှာပေါ့။ ကြီးထွားမှုကလည်း ကောင်းလာတာလေ။
(၃) ဆစ်ကြားတွေ လိုတာထက်ပိုပြီး မရှည်အောင် တားဆီးပေးတယ်။
(၄) ပင်စည်နဲ့ ကိုင်းတွေက ပိုပြီး တုတ်ခိုင်ကြီးမားလာတယ်။
(၅) အပင်တွေက လွယ်လွယ်နဲ့ လဲမကျတော့ဘူး။ အရွက်ကလေးတွေဆိုလည်း ပြန့်ကားလို့။
(၆) ဘက်တီးရီးယားနဲ့ မှိုရောဂါတွေကိုလည်း ကာကွယ်ပေးနိုင်စွမ်းရှိတယ်။
(၇) အပင်တွေမှာဖြစ်တတ်တဲ့ အပူချိန်၊ ဆားငန်၊ ဓာတ်အဆိပ်သင့်တာ စတာတွေကိုလည်း ခံနိုင်ရည်ရှိလာအောင် ဆီလီကွန်က လုပ်ပေးပါတယ်။
(၈) အလူမီနီယမ် အဆိပ်သင့်မှုတွေကိုလည်း လျော့ချပေးပါတယ်။
(၉) ပိုတက်စီယမ်၊ ဖော့စဖောရပ်စ်နဲ့ ကယ်လ်စီယမ် စုပ်ယူမှုတွေကိုလည်း အားကောင်းစေပါတယ်။
(၁၀) ရေငတ်တာကိုလည်း ခံနိုင်ရည် တိုးလာစေပါတယ်။
(၁၁) တွေ့ရှိချက်တွေအရဆိုရင် ဆီလီကွန်တွေဟာဆိုရင်တော့ ကြပ်ခိုးမှိုတွေလိုမျိုး၊ အပင်တွေမှာဖြစ်တတ်တဲ့ အနက်ရောင်အစက်အပျောက်တွေနဲ့ မျက်စိနာအကွက်လိုတွေနဲ့ ရောဂါ တစ်ချို့ကိုလည်း သက်သာစေတာကို တွေ့ထားပါတယ်တဲ့။
(၁၂) ရေလုံလုံလောက်လောက်မသွင်းးနိုင်တဲ့ နေရာမျိုးတွေမှာ ဆိုရင်လည်း ဆီလီကွန်ရတဲ့ အပင်တွေက ထုထည်နဲ့ ပမာဏက သူများတွေထက် ပိုများတာကို တွေ့ရမှာပါ။
(၁၃) ဆီလီကွန်ပြည့်ပြည့်ဝဝ ရတဲ့ အမြစ်တွေဟာဆိုရင်လည်း ထိုးဖောက်မှုပိုကောင်းပြီးတော့ ခြောက်သွေ့တဲ့ မြေကြီးမှာတောင် ရှင်သန်မှုပိုမြန်ပါတယ်။
သတိထားစရာတစ်ချက်ကတော့ ဆီလီကွန်တွေကို ပန်းပွင့်ချိန်မှာ မသုံးရပါဘူးတဲ့။ ပန်းပွင့်တွေ ကြွပ်ဆတ်ပြီး အလွယ်တကူ ပဲ့ကြွေနိုင်တာကြောင့်ပါ။ ခုတော့ ဆီလီကွန်မြေသြဇာတွေကို သိပ်မသုံးကြပေမဲ့လို့ လိုအပ်တဲ့နေရာတွေရှိလာပြီဆိုတော့ တင်ဆက်ပေးလိုက်ရပါတယ်နော်။
တောင်သူဦးကြီးများ စီးပွားဥစ္စာများ တိုးတက်ကောင်းမွန်ကြပါစေလို့ ဆုတောင်းပေးလိုက်ရပါတယ်။

ထွန်းဝင်းကျော်
Reference
https://blog.agrivi.com/post/benefits-of-silicon-on-plant-growth