ခရမ်းချဥ်စိုက်မယ်ဆို မြေချဥ် သတိထား

17/05/2022 11:30 AM တွင် ဒို့ဦး​လေး ဒို့ဦး​လေး မှ ရေးသား

မြန်မာနိုင်ငံ ဒေသအသီးသီးမှာ တိုင်ထောင်ခရမ်းချဥ်ကို စိုက်ပျိုးကြတာ တွေ့ရပါတယ်။

မုံရွာ(ခင်မွန်သီး)၊ ကျောက်ပန်းတောင်း( ပုပ္ပားသီး)၊ ရှမ်းတောင်( အင်းသီး) စသဖြင့် စျေးကွက်ကိုချိန်ဆပြီး စိုက်ချိန် လွှဲစိုက်ကြရပါတယ်။

အင်းသီးပေါ်ချိန် တပြိုင်နက်တည်းပေါ်ရင် စျေးကွက်အေးသွားတတ်ပါတယ်။ ခရမ်းချဥ် စိုက်ပျိုးရေးဟာ စျေးကွက်လည်းမိ၊ အထွက်လည်းကောင်းရင် စီးပွားရေးတွက်ခြေအကိုက်ဆုံး သီးနှံဆိုရင် မမှားပါဘူး။

အခြားသူများ  မစိုက်တဲ့အချိန် ကိုယ်စိုက်ထားမှ စျေးကွက်ကောင်း မိလေ့ရှိပါတယ်။

ဒါပေမဲ့ ရာသီဥတု ဆိုးရွားရင်(ပူလွန်း၊ အေးလွန်း၊မိုးများလွန်း) ရောဂါ မနိုင်မနင်း ဖြစ်တတ်ပြီး ဆုံးရှုံးမှုများတတ်ပါတယ်။

ခရမ်းချဥ်ပင်ရဲ့သဘာဝ

""""""""""""""""""""""""""

ခရမ်းချဥ်ပင်ဟာ အချဉ်ဓာတ်ကြိုက်တဲ့ သီးနှံဆိုပေမယ့် မြေချဥ်လွန်းတာကိုတော့ မကြိုက်ပါဘူး။

pH-7 အောက် အက်ဆစ်အခြေအနေဖြစ်တဲ့ pH - ၆ မှ ၆.၈ အတွင်းဟာ အဖြစ်ထွန်းနိုင်ဆုံး အခြေအနေဖြစ်ပါတယ်။

အနိမ့်ဆုံး ၅.၅ မှ အမြင့်ဆုံး ၇.၅ အထိ ရှင်သန်ကြီးထွားနိုင်ပါတယ်။

pH- ၄.၅ အောက် အခြေအနေတွင် ခရမ်းချဥ်စိုက်ပါက အပင်တလသားကျော်အထိ မသိသာသော်လည်း ပန်းပွင့်ချိန် ရောက်လာသည်နှင့် ရောဂါဒဏ်မခံနိုင်တာ တွေ့ရမှာဖြစ်ပါတယ်။

မြေချဥ်ရင်၊ ဘာကြောင့် ရောဂါရစေတာလဲ?

PH-၄.၅ အောက် မြေချဥ်အခြေအနေမှာ မြေတွင်းအာဟာရ စုပ်ယူမှုဖြစ်စဥ်မှာ နိုက်ထြိုဂျင်၊ ဖော့စဖရပ်၊ ပိုတက်စီယံ အပါအဝင်၊ ကယ်လစီယံ၊ မဂ္ဂနီစီယံ၊ ဆာလဖာ စတဲ့ သတ္တုဓာတ်တွေ ချို့တဲ့စေပါတယ်။

ခရမ်းချဥ်အတွက် အရေးကြီးတဲ့ အနည်းလိုအာဟာရဖြစ်တဲ့ သံဓာတ်ဆိုရင် pH - 6.5 ကျော်မှ အပင်ကရရှိနိုင်ပါတယ်။

မြေချဥ်ရင် သံဓာတ်အပါအဝင် အချို့ သောသတ္ထုဓာတ်တွေ အရည်မပျော်နိုင်လို့ အပင်အာဟာရ ချို့တဲ့လာပါတယ်။

“သဗ္ဗေသတ္တာ အာဟာရ ဌိတိကာ” ဆိုသလိုပဲ။ သက်ရှိတို့မည်သည် အာဟာရကိုမှီပြီး ရပ်တည်ကြရပါတယ်။

အာဟာရမရရင် အားနည်းပြီး ရောဂါဒဏ် မခံနိုင်တော့ပါဘူး။

ဒီဖြစ်စဥ်နဲ့ တိုက်ရိုက်ဆက်စပ်တဲ့ လက်တွေ့ အတွေ့အကြုံလေးကို ပြောပြပါရစေ။

ပြီးခဲ့တဲ့နှစ်တွေက   ရှမ်းပြည်တောင်ပိုင်း၊ ကောင်းဘို့ရွာမှာ  ကုမ္ပဏီတာဝန်ထမ်းဆောင်ရင်း သူငယ်ချင်းရဲ့ ခရမ်းချဥ်စိုက်ခြံကို ကွင်းဆင်းအလည်ရောက်ဖြစ်ပါတယ်။

သူလည်း စိုက်ပျိုးရေး ကျောင်းဆင်း ကုမ္ပဏီဝန်ထမ်းပါပဲ။

ရှမ်းပြည်နယ်မှာက သိကြတဲ့အတိုင်း ရာသီဥတုက အမြဲအေးနေတယ်။ ပြီးတော့ ဇွန်၊ဇူလိုင်လမှာ မိုးအရမ်းရွာတယ်။

ခရမ်းချဥ်၊ အာလူးဆိုတာ  late blight (နှောင်းပင်နာကျရောဂါ) လို့ ခေါ်တဲ့ လောင်မဲရောဂါ အခံရဆုံး သီးနှံတွေပါ။

ရာသီဥတုကလည်း လောင်မဲရောဂါကြိုက်တဲ့ အေးပြီး စိုစွတ်တဲ့ ရာသီဥတု။

ဒါကြောင့်လည်း ရှမ်းပြည်နယ်ဟာ မှိုသတ်ဆေး အသုံးအများဆုံးဧရိယာ ဖြစ်နေတာ မဆန်းပါဘူး။

စာရေးသူရဲ့ သူငယ်ချင်းကလည်း လေ့လာရင်း ကုမ္ပဏီရဲ့ ဆေး၊ မြေဆီ စမ်းသပ်ရင်းကိုယ်တိုင် စိုက်ကြည့်တဲ့သဘောပါ။

ခရမ်းချဥ် ၂ ဧကလောက်ရှိမယ်။

ကုမ္ပဏီထုတ်မျိုး။ ကုမ္ပဏီ မြေသြဇာ။ ကုမ္ပဏီ ဆေး။ စနစ်တကျ မှတ်တမ်းနဲ့ လုပ်တာပါပဲ။

ပထမတခေါက် ခြံအလည်ရောက်တုန်းက ခရမ်းချဥ်ပင် တတန်းကျော်တက်ချိန်ပါ။ စိမ်းစို လှပ ဝေဆာလို့ပါပဲ။ ( မြေသြဇာလည်း စိတ်ကြိုက်သုံးနိုင်တာကိုး)။

နောက် နှစ်ပတ်လောက်အကြာ..ဒုတိယ တခေါက်ရောက်တော့ အိုး...အပင်တွေအားလုံး အရွက်တွေ မဲခြောက်နေပြီ။ 

နှောင်းပင်နာကျ ရောဂါဝင်သွားတာ။ ဂရုစိုက်နေတဲ့ ကြားထဲကကို ရောဂါမထိန်းနိုင်တာ နော်။

“ဘယ်လိုဖြစ်တာလဲ...သူငယ်ချင်း:.." လို့ မေးတော့..

“ငါလည်း..မစဥ်းစားတတ်အောင်ပဲ။ မှိုသတ်ဆေးလည်း အလှည့်ကျဝင်ရင်းနဲ့ ဖြစ်သွားတာ"..တဲ့။

ဒီမှာ..စာရေးသူရဲ့ ခံယူချက်လေး ပြောရဦးမယ်။ စာရေးသူက အပင်ပြဿနာနဲ့ တွေ့တိုင်း  မြေကြီးကို အရင် စမ်းသပ်လေ့ရှိတယ်။

ဆရာဝန်တွေ လူနာက်ိုစမ်းသပ်ရင် အရင်ဦးဆုံး သွေးပေါင်အရင်တိုင်းသလိုပေါ့ဗျာ။

"သူငယ်ချင်းကို..ဆရာလုပ်တယ်လို့တော့ မထင်စေချင်ဘူး။ ကိုယ့်အထင်တော့  မြေကြီးမှာ ပြသနာရှိနိုင်တယ်"...လို့ ပြောပြီး..pH မီတာနဲ့  သုံးနေရာ..တိုင်းပြပေးလိုက်တော့..

တွေ့ပါပြီ...ပြဿနာရဲ့ ဇစ်မြစ်။ ပျမ်းမျှ pH - 4.5 ပဲ ရှိတယ်။

ဒါဟာ.... ရောဂါမနိုင်ရခြင်းရဲ့ အဓိကအကြောင်းရင်းပဲလို့  လက်တွေ့ သိရှိခွင့်ရသွားတာပါပဲ။

ခရမ်းချဥ် မစိုက်ခင် မြေကိုပြင်ပါ

"""""""""""""""""""""""""""""""""""""""

ခရမ်းချဥ်ကို စီးပွားဖြစ်စိုက်မယ့် တောင်သူမိတ်ဆွေများအနေနဲ့ မြေကြီးရဲ့ pH ကို အရင်တိုင်းပါ။

- pH ၄.၅ အောက်ဆိုရင် မစိုက်ပါနဲ့။

- pH- ၅ နဲ့ ၆ ကြားဆိုရင် မြေပြင်စဥ်မှာ ကယ်လစီယံကာဘွန်နိတ်၊ မဂ္ဂနီစီယံ ကာဘွန်နိတ် ထုံးတမျိုးမျိုးကို တဧက ၂၅ ကီလို ၁၀ အိတ်နှုန်းထည့်ပါ။

- pH ၆ နဲ့ ၆.၅ ကြားဆိုရင် ကယ်လစီယံ ဆာလဖိတ် ကျောက်မှုန့်ကို တဧက ၂၅ ကီလို ၂ အိတ်နှုန်း ထည့်ပါ။

ဆိုတော့..သီးနှံပင်ကြိုက်နှစ်သက်တဲ့ မြေကြီး pH ကို သိရှိထားပြီး မစိုက်မီကတည်းက စိတ်တိုင်းကျ အချိန်ယူကြိုတင်ပြင်ပြီးမှ သီးနှံစိုက်ပျိုးရေး လုပ်ဆောင်သင့်ပါကြောင်း။

သို့မှသာ ဆုံးရှူံးမှုနည်းပြီး အကျိုးအမြတ် ရရှိနိုင်ပါကြောင်း အတွေ့အကြုံအရ ရေးသားမျှ ဝေလိုက်ရခြင်းဖြစ်ပါတယ်။

စေတနာများစွာဖြင့်....

ပျံလွှား(ပုလဲ)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။  


PROBIO ကြော်ငြာ
ကြက်/ဝက် မွေးမြူရေးလုပ်ငန်းတွေမှာ ပဋိဇီဝဆေး (𝐀𝐧𝐭𝐢𝐛𝐢𝐨𝐭𝐢𝐜𝐬) များအစား၊ ပရိုဘိုင်အိုတစ် (𝐏𝐫𝐨𝐛𝐢𝐨𝐭𝐢𝐜𝐬) များကို ဘာကြောင့်အစားထိုး အသုံးပြုသင့်တာလဲ။ ပဋိဇီဝဆေး (𝐀𝐧𝐭𝐢𝐛𝐢𝐨𝐭𝐢𝐜𝐬) ဆိုတာကတော့ လူ၊ တိရစ္ဆာန်တွေမှာကပ်တွယ်ပြီး ကျန်းမာရေးကို အန္တရာယ်ပြုနိုင်တဲ့ အဏုဇီဝပိုးမွှားတွေကို ကြီးထွားပြန့်ပွားမှု့လျော့ကျအောင် ရှင်းလင်းသုတ်သင်ပေးတဲ့ ဆေးတစ်မျိုးဖြစ်ပြီး အထူးသဖြင့် မွေးမြူရေးကဏ္ဍမှာ ၇၀-၈၀% အထိ အသုံးပြုလျက်ရှိကြပါတယ်။ ကြက်မွေးမြူရေးကဏ္ဍမှာဆိုရင် အဆိုပါ ပဋိဇီဝဆေး (𝐀𝐧𝐭𝐢𝐛𝐢𝐨𝐭𝐢𝐜𝐬) တွေဟာ ကြက်တွေမှာဖြစ်ပွားတတ်တဲ့ အသက်ရှုလမ်းကြောင်းရောဂါ၊ အူလမ်းကြောင်းရောဂါ၊ အခြားသောဘက်တီးရီးယားများကြောင့်ဖြစ်တဲ့ ရောဂါတွေကိုကုသရာမှာ အလွန်ထိရောက်ပါတယ်။ သို့သော်ငြားလည်း ပဋိဇီဝဆေး (𝐀𝐧𝐭𝐢𝐛𝐢𝐨𝐭𝐢𝐜𝐬) တွေကိုအသုံးပြုတဲ့အခါ ဆေးမတိုးတော့တဲ့ အန္တရာယ်ရှိ အဏုဇီဝပိုးမွှားဗီဇပေါ်ထွက်လာနိုင်ပြီး ထိုမှတဆင့် အရေအတွက်အများအပြားအဖြစ်သို့ ပြန်လည်ပွားများလာကာ ပဋိဇီဝဆေးဆေးယဉ်ပါးမှု (𝐀𝐌𝐑) ကိုဦးတည်နိုင်စေပါတယ်။ ဒီနေရာမှာ အဆိုပါ ပဋိဇီဝဆေး (𝐀𝐧𝐭𝐢𝐛𝐢𝐨𝐭𝐢𝐜𝐬) တွေအစား အစားထိုးအသုံးပြုသင့်တဲ့ ပရိုဘိုင်အိုတစ် (𝐏𝐫𝐨𝐛𝐢𝐨𝐭𝐢𝐜𝐬) အကြောင်းကို ထပ်မံအကြံပြုဝေမျှပေးပါရစေ။ ပရိုဘိုင်အိုတစ် (𝐏𝐫𝐨𝐛𝐢𝐨𝐭𝐢𝐜𝐬) ဆိုတာကတော့ မွေးမြူရေးတိရစ္ဆာန်တွေ ကျန်းမာရေးကောင်းမွန်စေဖို့အတွက် ရည်ရွယ်ပြီးထုတ်လုပ်ထားတဲ့ အကျိုးပြု အဏုဇီဝပိုးမွှားများဖြင့် ထုတ်လုပ်ထားတဲ့ဆေး (တနည်းအားဖြင့်) အစာ လို့လည်းဆိုနိုင်ပါတယ်။ ၂၀၀၂ ခုနစ်မှာ 𝐖𝐇𝐎 နဲ့ 𝐅𝐀𝐎 ကနေပြီးတော့မှ ပရိုဘိုင်အိုတစ်ဆိုတာ သက်ရှိအဏုဇီပိုးတွေပါဝင်သောဆေးဖြစ်ပြီး လုံလောက်တဲ့ ပမာဏ အထိ တိုက်ကျွေးမယ်ဆိုရင် ပဋိဇီဝဆေးတိုက်ကျွေးစရာမလိုပဲ မွေးမြူရေးတိရစ္ဆာန်တွေရဲ့ ကျန်းမာရေးကို ကောင်းမွန်စေကြောင်း အကြံပြုထားတာတွေရှိပါတယ်။ ဒါကြောင့် မွေးမြူရေးလုပ်ငန်းတွေမှာ အဆိုပါ ပရိုဘိုင်အိုတစ် (𝐏𝐫𝐨𝐛𝐢𝐨𝐭𝐢𝐜𝐬) ကို ပဋိဇီဝဆေးဝါးများအစား၊ အစားထိုးအသုံးပြုခြင်းက အန္တရာယ်ရှိအဏုဇီဝပိုးမွှားတွေရဲ့ ဆေးယဉ်ပါးမှု (𝐀𝐌𝐑) ဖြစ်ပွားနိုင်ချေ ရာခိုင်နှုန်းကိုလျော့ချနိုင်ပြီး မွေးမြူရေးတိရစ္ဆာန်တွေရဲ့ဇီဝကမ္မဖြစ်စဉ်များကို အနှောက်အယှက်ပြုခြင်းမှ ကာကွယ်နိုင်မှာဖြစ်ပါတယ်။ "စာရေးသားသူဒေါက်တာညွန့်ရွှေ (မွေးမြူ/ဆေးကု) " Myanmar Innovative Life Sciences Co., Ltd မှ ထုတ်လုပ်ဖြန့်ချိပြီး မြန်မာ 𝐅𝐃𝐀 ၏ ခွင့်ပြုချက်လိုင်စင်နဲ့အညီ ပြည်တွင်း၌ထုတ်လုပ်ကာ မြန်မာနိုင်ငံမွေးမြူရေးလုပ်ငန်းရှင်များကို အဆင်သင့်ကူညီပေးမယ့် အရည်အသွေးမြင့် အစာလမ်းကြောင်းအားဖြည့်ဆေး PROBIO က အသင့်ရှိနေပါတယ်။ အခုပဲဒီလင့်မှာ ပြည့်စုံစွာဖောင်ဖြည့်ပြီးဆက်သွယ်လိုက်ပါ- https://tinyurl.com/MILS-PROBIO 𝐏𝐑𝐎𝐁𝐈𝐎 မှ မွေးမြူရေးဆိုင်ရာကျွမ်းကျင်ဝန်ထမ်းတွေကနေ တိုက်ရိုက်ဆက်သွယ်ပြီး အကူအညီပေးမှာဖြစ်ပါတယ်။ 𝐏𝐑𝐎𝐁𝐈𝐎 ဖြန့်ချိရေးနှင့်ကိုယ်စားလှယ်ယူလိုသူများ တိုက်ရိုက်ဆက်သွယ်ရန်ရုံးချုပ်လိပ်စာ- အမှတ် (၁၆၅)၊ အောင်ဇေယျလမ်းသွယ် (၁) ၊ သီရိမင်္ဂလာလမ်း၊ အင်းစိန်မြို့နယ်၊ ရန်ကုန်မြို့။ Hotline: 09 263 709 553, 09 267 287 608, Email: [email protected] #MILS #PROBIO
Read more မွေးမြူရေး အကူအညီရယူရန် နှိပ်ပါ

ဆွေးနွေးချက်များ

ဆွေးနွေးရန်