“သံပုရာသီးကို အစိမ်းဈေးကွက်အပြင် Value Added (တန်ဖိုးမြှင့်ထုတ်ကုန်) အဖြစ် ပြောင်းလဲထုတ်လုပ်နိုင်ရန် ဝိုင်းဝန်းကြိုးပမ်းသင့်”

သံပုရာသီးဈေးကွက် တစ်နှစ်ပတ်လည်လုံး ခိုင်မာမှုရရှိနိုင်စေရန်မှာ တောင်သူများအနေဖြင့် ဈေးကွက်သစ်များ ကိုယ်တိုင်ကိုယ်ကျ နားစွင့်ရှာဖွေသင့်ပြီး၊ တန်ဖိုးမြှင့်ထုတ်ကုန်များ ထုတ်လုပ်နိုင်ရန် ဝိုင်းဝန်းကြိုးပမ်းရမည်ဖြစ်ကြောင်း ကိုယ်တိုင်စိုက်ပျိုးထုတ်လုပ်သူများထံမှ သိရသည်။

ကိုဗစ်ကာလဆိုတော့ ဈေးကွက်က နဂိုလောက်တော့မကောင်းဘူး။ အော်ဂဲနစ်အသီးဆိုတော့ ဝယ်ယူသူတော့မပျက်ပါဘူး။ ပုံမှန်ရောင်းနေကြအတိုင်းပဲ ရောင်းရပါတယ်။ လူတိုင်း စားသုံးနိုင်အောင်လို့ ဈေးနှုန်းကိုတော့ တင်မရောင်းပါဘူး။ ရန်ကုန်၊ နေပြည်တော်၊ မန္တလေးမြို့တွေကို တင်ပို့နေပါတယ်။ ဈေးကွက်ပျက်မပျက်ဆိုတာက အဓိကကတော့ ဈေးကွက်ရှာနိုင်တဲ့အပေါ်ပဲ မူတည်ပါတယ်။ ခြံထဲမှာထိုင်နေပြီး အသီးမရောင်းရဘူးဆိုပြီး ညည်းနေတယ်ဆိုရင်တော့ ဘယ်ရောင်းရမလဲ။ ကျွန်တော်တို့တောင်သူတွေလည်း ကိုယ်ကိုယ်တိုင် ဈေးကွက်သစ်တွေ ရှာဖွေသင့်ပါပြီ။ တန်ဖိုးမြှင့်ထုတ်ကုန်အနေနဲ့ ထုတ်လုပ်နိုင်အောင် ဝိုင်းဝန်းကြိုးပမ်းဖို့ လိုအပ်ပါတယ်။ Value Added လုပ်နိုင်ရင် အကျိုးအမြတ်လည်း ပိုရနိုင်ပါတယ်။

ဟု နေပြည်တော်ရှိ ပြည့်ဝအော်ဂဲနစ်သံပုရာခြံမှ စီမံအုပ်ချုပ်သူ ကိုပြည့်ဝက ပြောသည်။

သံပုရာသီးကို အစိမ်းဈေးကွက်အပြင် Value Added (တန်ဖိုးမြှင့်ထုတ်ကုန်) အဖြစ် အရည်အသွေးမြှင့်တင် ထုတ်လုပ်နိုင်ပါက ဈေးကွက်သစ်များပေါ်ပေါက်လာနိုင်ပြီး၊ အသီးထွက်နှုန်းများသည့် ကာလများ၌ ဈေးကွက်ကျဆင်းခြင်းဒဏ်ကို ကာမိနိုင်မည်ဖြစ်သည်။

သံပုရာသီးက အများအားဖြင့်တော့ နွေရာသီ မတ်လ၊ ဧပြီလတွေမှာ ဈေးအမြင့်ဆုံးပေါ့။ ဧပြီလကျော်လာပြီးရင် ဈေးက တဖြည်းဖြည်းပြန်ကျသွားတယ်။ ဇွန်လ၊ ဇူလိုင်လ မိုးတွင်းပိုင်းတွေမှာတော့ အသီးထွက်နှုန်းများလာတဲ့အချိန်ဖြစ်လာတော့ ဈေးက အနိမ့်ဆုံးပြန်ရောက်သွားတာပေါ့။ နှစ်တိုင်းကြုံတွေ့နေရတာပါ။ အခုကတော့ ကိုဗစ်ကာလဆိုတော့ ပိုပြီးတော့ ဆိုးတာပေါ့။ အရောင်းအဝယ်တွေ ကမောက်ကမဖြစ်ပြီး၊ ရောင်းအားဝယ်အား မမျှတော့ ခြံသမားတချို့လည်း ဒုက္ခရောက်တာပေါ့။

ဟု ကရင်ပြည်နယ်၊ ကြာအင်းဆိပ်ကြီးမြို့နယ်မှ သံပုရာရောင်းဝယ်ရေးလုပ်ကိုင်သူ ကိုစိုးကြီးက ပြောသည်။

မြန်မာနိုင်ငံတွင် သံပုရာပင် စီးပွားဖြစ်စိုက်ပျိုးရေးကို ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ နေပြည်တော်၊ ကရင်ပြည်နယ်၊ မွန်ပြည်နယ် အစရှိသည့် ဒေသများ၌ စိုက်ပျိုးထုတ်လုပ်နေသည်။

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။