အထွက်နှုန်းကောင်းတဲ့ ပဲလွမ်းမျိုးသစ်များကို တောင်သူများထံဖြန့်ဝေပေးသွားမည်

14/01/2020 11:08 AM တွင် အစိမ်းရောင်လမ်း အစိမ်းရောင်လမ်း မှ ရေးသား ပြီး Greenovator Greenovator မှ ပေးပို့ထားပါသည်။

ပင်ပိုင်းဆိုင်ရာကြီးထွားမှုကောင်းပြီး အထွက်နှုန်းကောင်းတဲ့ ပဲလွမ်းမျိုးသစ်များကို တောင်သူများထံ ဖြန့်ဝေပေးသွားမှာဖြစ်ကြောင်း စိုက်ပျိုးရေးသုတေသနဦးစီးဌာနမှ သိရပါတယ်။

ရှာဖွေတွေ့ရှိထားတဲ့ ပဲလွမ်းမျိုးများကို နောက်တစ်ရာသီမှာ ဆက်လက်သုတေသနပြုဆောင်ရွက်သွားမှာဖြစ်ပြီး ရလဒ်ကောင်းထွက်ရှိလာတဲ့ မျိုးသစ်များကို တောင်သူများထံ ဖြန့်ဝေပေးသွားမှာဖြစ်တယ်လို့ စိုက်ပျိုးရေးသုတေသနဦးစီးဌာနမှ ညွှန်ကြားရေးမှူးချုပ် ဦးနိုင်ကြည်ဝင်းက ပြောပါတယ်။

ထွက်နှုန်းကောင်းတဲ့ ပဲလွမ်းမျိုးတွေကို ရှာဖွေတွေ့ရှိထားတာ အခုဆို ဒုတိယအကြိမ်မြောက်ဖြစ်သွားပါပြီ။ ဆက်လက်ပြီးတော့လည်း နောက်ထပ်တစ်ရာသီမှာ သုတေသနပြုသွားမယ်။ ရလာတဲ့မျိုးသစ်ရဲ့ ရလဒ်ကိုလည်း သေချာပြီဆိုတာနဲ့ တောင်သူတွေထံ ဖြန့်ဝေပေးသွားမှာပါ

ပဲလွမ်းမျိုးများကို အထွက်နှုန်းနဲ့ အရွက်၊ ပင်စည်စတဲ့ပင်ပိုင်းဆိုင်ရာ အလေးချိန်ကောင်းတဲ့ ပဲလွမ်းမျိုးများ ရှာဖွေခြင်းသုတေသနကို (၂၀၁၉ - ၂၀၂၀) ခုနှစ်မှာ သုတေသနအဖြစ် စမ်းသပ်ဆောင်ရွက်သွားမှာဖြစ်ကြောင်း သိရပါတယ်။

ပဲလွမ်းမျိုး(၁၈)မျိုးထဲကမှ ကြီးထွားမှုကောင်းတဲ့ ပဲလွမ်းမျိုး(၇)မျိုးကို ရွေးချယ်နိုင်ခဲ့ပြီး  (၂၀၁၉ - ၂၀ ၂၀)ခုနှစ်မှာ ဆက်လက်သုတေသနဆောင်ရွက်ခဲ့ကာ ပင်ပိုင်းဆိုင်ရာကြီးထွားမှုကောင်းတဲ့ မျိုးများကို ရှာဖွေတွေ့ရှိခဲ့ပြီး တောင်သူများထံ မကြာမီ ဖြန့်ဝေနိုင်တော့မှာဖြစ်ကြောင်း စိုက်ပျိုးရေးသုတေသနဦးစီးဌာနမှ သိရပါတယ်။ 

တိုးတိုးခိုင်(ABM)