တရုတ်သို့ မြန်မာ့ဒူးရင်းသီး တင်ပို့သွားရန် စီစဉ်နေ

မြန်မာနိုင်ငံက ထွက်ရှိသည့် ဒူးရင်းသီးကို ယခု ၂၀၂၆ - ၂၀၂၇ ဘဏ္ဍာနှစ်တွင် တရုတ်နိုင်ငံသို့ တင်ပို့နိုင်ရန်အတွက် စီစဉ်နေသည်ဟု စိုက်ပျိုးရေးဦးစီးဌာနမှ သိရသည်။

တရုတ်နိုင်ငံသည် ဒူးရင်းသီး ဝယ်လိုအား အမြင့်ဆုံးနိုင်ငံတစ်ခု ဖြစ်သည့်အတွက် မြန်မာ့ဒူးရင်းသီးကို တင်ပို့ပြီး ခိုင်မာသည့် ပြည်ပဈေးကွက် ရရှိအောင် မျှော်မှန်းထားသည်ဟု သိရသည်။

တရုတ်နိုင်ငံသို့ ဒူးရင်းသီး တင်ပို့နိုင်ရေးအတွက် တရုတ်နိုင်ငံ အကောက်ခွန်အထွေထွေ အုပ်ချုပ်မှုအာဏာပိုင်အဖွဲ့ (GACC) တွင် မှတ်ပုံတင်နိုင်ရေး ဆောင်ရွက်သွားမည်ဖြစ်ကြောင်း စိုက်ပျိုးရေးဦးစီးဌာန ညွှန်ကြားရေးမှူးချုပ် ဦးသူရစိုးက မေ ၁၉ ရက်နေ့က ပြုလုပ်ခဲ့သည့် မြန်မာ့ဒူးရင်းပွဲတော် ၂၀၂၆ ဖွင့်ပွဲတွင် ပြောဆိုခဲ့ခြင်း ဖြစ်သည်။

"ပြည်ပဈေးကွက်ရမယ်ဆိုရင် ပိုကောင်းတာပေါ့။ အခုက ပြည်တွင်းစားသုံးမှုပဲ ရှိတာလေ။ ဈေးကလည်း မြင့်တော့ လူတိုင်း အကြိုက်မစားနိုင်တဲ့ အခြေအနေက ရှိတယ်" ဟု ဒူးရင်းသီး ရောင်းချသူတစ်ဦးက ပြောသည်။

လက်ရှိတွင် မြန်မာ့ဒူးရင်းသီးက ပြည်တွင်းစားသုံးမှုသာ အဓိကရှိပြီး ဈေးနှုန်းအနေဖြင့် အသီးအရည်အသွေးပေါ် မူတည်၍ တစ်ကီလိုလျှင် ၆၀,၀၀၀ ကျပ်လောက်အထိ အမြင့်ဆုံး ဈေးပေါက်ပြီး အလုံးလိုက်ဈေးကမူ သိန်းဂဏန်းအထိ ဈေးရှိသည်ဟု သိရသည်။

မြန်မာ့ဒူးရင်းသီးကို အလုံးလိုက်ရောင်းချခြင်း၊ ခွဲပြီး ဒူးရင်းသီးအသားကို ရောင်းချခြင်းအပြင် တန်ဖိုးမြှင့်ထုတ်ကုန် ထုတ်လုပ်နိုင်ရန်အတွက်လည်း ပြည်တွင်း၊ ပြည်ပမှ ရင်းနှီးမြှုပ်နှံသူများကို ဖိတ်ခေါ်သွားရန် ပြင်ဆင်နေသည်ဟု စိုက်ပျိုးရေးဦးစီးဌာနက သိရသည်။

"ဒီနှစ်စပို့နိုင်မယ်ဆိုရင်တောင် ရာသီကုန်မှ စနိုင်ဖို့ များလောက်တယ်။ ဘာလို့ဆို အခုတောင် ဒူးရင်းသီးက စပေါ်နေပြီ၊ ရောင်းနေကြပြီလေ။ ဒူးရင်းသီး အသားမွှာပြီးသားကို ကောင်းရင်ကောင်းသလို ဈေးက အမျိုးမျိုးဖြစ်နေတာပဲ။ အခုကတော့ ဝယ်လိုအားရှိပါတယ်။ ရောင်းသမျှ အကုန်ကုန်တယ်" ဟု ရန်ကုန်မှ ဒူးရင်းသီး ရောင်းချသူတစ်ဦးက ပြောသည်။

ဒူးရင်းသီးကို မြန်မာနိုင်ငံ တောင်ဘက်ပိုင်းဒေသများဖြစ်သည့် မွန်၊ ကရင်၊ တနင်္သာရီဒေသများတွင် အများအပြား စိုက်ပျိုးဖြစ်ထွန်းပြီး စုစုပေါင်း စိုက်ပျိုးဧကအနေဖြင့် သောင်းဂဏန်းအထိ ရှိသည်ဟု သိရသည်။

မြန်မာနိုင်ငံတွင် ဒူးရင်းသီးပေါ်ချိန်ကမူ ယခုမေလကစပြီး ဇွန်၊ ဇူလိုင်လတို့တွင် ဒူးရင်းသီးများ လှိုင်လှိုင်ထွက်ပေါ်ပြီး ဈေးကွက်ထဲ ဝင်ရောက်မှုရှိခြင်း ဖြစ်သည်ဟု သိရသည်။

ဒူးရင်းသီးသည် ကမ္ဘာတစ်ဝှမ်းရှိ အပူပိုင်းဒေသများ အပါအဝင် အရှေ့တောင်အာရှနိုင်ငံများဖြစ်သည့် မလေးရှား၊ အင်ဒိုနီးရှား၊ ထိုင်းနှင့် မြန်မာတို့တွင် အဓိက စိုက်ပျိုးဖြစ်ထွန်းမှု ရှိသည်ဟု သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။