ဂီတသံစဉ်တွေက အပင်တွေရဲ့ ကြီးထွားမှုအပေါ် သက်ရောက်မှုရှိနေသလား??

ဒီအကြောင်းကိုမပြောခင် အားလုံး သိထားပြီးသားဖြစ်တဲ့ အချက်ကလေးတွေကို ပြန်ပြောကြည့်ကြရအောင်။

အပင်တစ်ပင်ရဲ့ ရှင်သန်ကြီးထွားမှုအပေါ် ပတ်ဝန်းကျင်ကနေ လွှမ်းမိုးနေတဲ့ အချက်တွေက ဘာတွေဖြစ်မလဲ?

ရေ၊ မြေ၊ လေ၊ နေရောင်ခြည်၊ အာဟာရ ရရှိမှု၊ အပူချိန်၊ ရာသီဥတု တွေပဲ ဖြစ်ပါတယ်။ အဲ့ဒါတွေအပြင် ပတ်ဝန်းကျင်မှာ ထွက်ပေါ်နေတဲ့ အသံတွေကလည်း အပင်တစ်ပင်ရဲ့ ရှင်သန်ကြီးထွားမှုအပေါ် လွှမ်းမိုးမှု ရှိနေပါတယ်တဲ့။

ဒီလိုဆိုရင် အပင်တွေဟာ အသံတွေကို ကြားနိုင်စွမ်းရှိနေတာလား? အပင်တွေဟာ ဂီတသံစဉ်တွေကို တစ်ကယ်ပဲ ကြိုက်နှစ်သက်ပါသလား? လေ့လာမှုတွေအရ ဂီတသံစဉ်တွေဟာ အပင်တွေပေါ် သိသာတဲ့ အကျိုးသက်ရောက်မှုတွေ ရှိစေကြောင်း တွေ့ရှိရပါတယ်။

၁၉၆၂ ခုနှစ်တုန်းက အိန္ဒိယနိုင်ငံမှာ ရှိတဲ့ ရုက္ခဗေဒပညာရှင်တစ်ဦးဟာ ဒီကိစ္စနဲ့ ပတ်သက်ပြီး စမ်းသပ်မှုတွေများစွာကို ပြုလုပ်ခဲ့ပါတယ်။ အဲဒီမှာ သူတွေ့ရှိခဲ့တာက ဂီတသံစဉ်တွေနဲ့ ထိတွေ့ထားတဲ့ အပင်တွေဟာ သာမန်အပင်တွေထက် အပင်အမြင့် ရှည်ထွက်မှုနှုန်းက ၂၀% ပိုမြန်နေပြီး အပင်ထုထည်ကြီးထွားမှုနှုန်းဟာလည်း ၇၂% ပိုမိုမြင့်မားနေတယ်ဆိုတဲ့ အချက်ပါပဲ။ ဒီစမ်းသပ်မှုကို စိုက်ပျိုးရေးသီးနှံတွေဖြစ်တဲ့ စပါး၊ မြေပဲ၊ ဆေးရွက်ကြီး တို့မှာလည်း စမ်းသပ်ခဲ့ပြီး တူညီတဲ့ ရလဒ် ထွက်ရှိနေခဲ့တာကို တွေ့ရပါတယ်။

ဂီတသံစဉ်တွေဟာ မျိုးစေ့တွေအပေါ်မှာလည်း သက်ရောက်မှု ရှိနေပါတယ်။ လေ့လာစမ်းသပ်မှုတွေအရ သီချင်းတွေနဲ့ ထိတွေ့စေပြီးမှ မျိုးညှောင့်ဖောက်ထားတဲ့ အပင်မျိုးစေ့တွေဟာ သာမန်မျိုးစေ့တွေထက် ရှင်သန်နိုင်စွမ်း ပိုမြင့်ပြီး အပင်ကြီးထွားတဲ့အခါ အရွယ်အစားလည်း ပိုကြီးသလို အရွက်၊အပွင့်လည်း ဝေဝေဆာဆာ ဖြစ်လာကြောင်း တွေ့ရှိရပါတယ်။ ဒါဟာ အပင်ရဲ့ မျိုးရိုးဗီဇဆိုင်ရာ ခရိုမိုဇုန်းတွေပါ လက်တွေ့ပြောင်းလဲလာတာပဲ ဖြစ်တယ်လို့ ဆိုပါတယ်။

အပင်တွေက ဘယ်လို ဂီတအမျိုးအစားကို ကြိုက်နှစ်သက်ပါသလဲ?

ဒီအချက်အတွက် ကိုလိုရာဒိုက Greenhouse ပိုင်ရှင်တစ်ယောက်ဟာ အပင်အမျိုးအစားပေါင်းများစွာ၊ ဂီတအမျိုးအစားပေါင်းများစွာနဲ့ လေ့လာစမ်းသပ်မှုတွေ ပြုလုပ်ခဲ့ပါတယ်။ အဲ့ဒီ စမ်းသပ်မှုမှာတော့ အပင်တွေဟာ Classical Music လို့ခေါ်တဲ့ ဂန္တဝင်သီချင်းကြီးတွေနဲ့ ထိတွေ့တဲ့အခါ ပိုမိုရှင်သန်နိုင်စွမ်းရှိနေပြီး၊ Rock သီချင်းအမျိုးအစားတွေနဲ့ ထိတွေ့တဲ့အခါ (၂) ပတ်အတွင်း ညှိုးပြီး သေဆုံးသွားကြတာကို တွေ့ရှိခဲ့ရပါတယ်။

လေ့လာမှုတွေအရ Jazz ဂီတနဲ့ ဂန္တဝင်တေးဂီတ (Classical Music) တွေဟာ အပင်တွေ တုံ့ပြန်မှုအကောင်းဆုံး ဂီတအမျိုးအစားတွေပဲ ဖြစ်တယ်လို့ သိရပါတယ်။ ဒါ့အပြင် အိန္ဒိယနိုင်ငံ ရုက္ခဗေဒပညာရှင်တစ်ယောက်ရဲ့ စမ်းသပ်ချက်တစ်ခုမှာ အပင်တွေဟာ တယော တူရိယာကနေ ထွက်တဲ့ ဂီတသံစဉ်ကို အကောင်းဆုံးပြန်လည် တုန့်ပြန်တယ်ဆိုတဲ့ အချက်ကိုလည်း တွေ့ရှိခဲ့ပြန်ပါတယ်။

ဂီတသံစဉ်တွေက အပင်တွေအပေါ် ဘယ်လိုပုံစံနဲ့ သက်ရောက်မှု ရှိနေစေတာလဲ?

ဒီတစ်ခုကလည်း စိတ်ဝင်စားစရာအချက်ပါပဲ။ အပင်တွေကပဲ အသံတွေကို ကြားနိုင်နေတာလား? အပင်တွေမှာ နားရွက်တွေများ ရှိနေသလား?

တစ်ကယ်တော့ အသံဆိုတာထက် အသံလှိုင်းကနေ ဖြစ်ပေါ်လာတဲ့ တုန်ခါမှုတွေကြောင့်ပါပဲ။ အပင်တွေဟာ အသံတွေကို မကြားနိုင်ပါဘူး။ အသံလှိုင်းတုန်ခါမှုတွေကိုသာ ခံစားနိုင်စွမ်းရှိပါတယ်။ အသံလှိုင်းကနေ ထုတ်လွှင့်လိုက်တဲ့ တုန်ခါမှုတွေဟာ အပင်ဆဲလ်တွေရဲ့ လှုပ်ရှားမှုကို အရှိန်မြှင့်လိုက်ပါတယ်။ အဲ့ဒီ အပင်ဆဲလ်တွေကနေ အပင်ကို အာဟာရဓာတ်တွေပိုမိုထုတ်လုပ်ပေးဖို့ လှုံ့ဆော်ပေးကြပါတယ်။ ဒီလိုနဲ့ အသံလှိုင်းတုန်ခါမှုတွေကနေ အပင်ကို သူကိုယ်တိုင် ကြီးထွားရှင်သန်လာစေတာပဲ ဖြစ်ပါတယ်။

အပင်တွေဟာ ကြိမ်နှုန်း 115Hz နဲ့ 250Hz ကြားမှာရှိတဲ့ အသံတွေနဲ့ ထိတွေ့ရင် ပိုမိုရှင်သန်နိုင်စွမ်းရှိတယ်လို့ သိရပါတယ်။ ဒါကြောင့် ဒီကြိမ်နှုန်းကြားမှာရှိတဲ့ သီချင်းတွေကို အပင်တွေအနားမှာ ဖွင့်ပေးထားတဲ့အခါ ကြီးထွားမှုအားပိုကောင်းကြတာ ဖြစ်မယ်လို့ ယူဆရပါတယ်။

မတူညီတဲ့ ဂီတအမျိုးအစားတွေအလိုက် အသံလှိုင်းကြိမ်နှုန်းတွေ၊ ဖိအားနဲ့ တုန်ခါမှုတွေဟာလည်း အမျိုးမျိုး ကွဲပြားကြပါတယ်။ ရော့ခ်သီချင်းလိုမျိုး ကျယ်လောင်တဲ့ ဂီတအမျိုးအစားတွေက ဖိအားပိုများပါတယ်။ ဒါကြောင့်မို့လို့လည်း ကြိမ်နှုန်းမြင့်တဲ့ ရော့ခ်သီချင်းတွေနဲ့ ထိတွေ့တဲ့အခါ တုန်ခါမှုနဲ့ ဖိအားတွေ အရမ်းများသွားတာကြောင့် အပင်က ခံနိုင်ရည်မရှိတော့တာမျိုး ဖြစ်ကောင်းဖြစ်နိုင်ပါတယ်။ လေပြင်းတိုက်ခတ်တဲ့အခါနဲ့ လေပြေကလေးတိုက်ခတ်တဲ့အခါ သက်ရောက်ပုံခြင်း ကွာခြားသလိုပေါ့။

နောက်တစ်ချက်အနေနဲ့ အပင်တွေဟာ သီချင်းသံတွေကို တစ်ရက်မှာ (၃) နာရီထက်ပိုပြီး ထိတွေ့ရတာမျိုးလည်း သဘောမတွေ့ပြန်ပါဘူး။

တချို့သောအသံတွေက အပင်မှာရှိတဲ့ လေရှူပေါက်တွေပွင့်တဲ့အချိန်ကို ပိုကြာစေတယ်လို့လည်း သိရပါတယ်။ လေရှူပေါက်တွေ ကြာကြာပွင့်တဲ့အတွက်ကြောင့် အပင်က လေကိုပိုရရှိပြီး လျင်လျင်မြန်မြန် ကြီးထွားစေတာပဲ ဖြစ်ပါတယ်။ ပညာရှင်တွေတချို့ကတော့ အသံလှိုင်းတုန်ခါမှုတွေဟာ အပင်ဆဲလ်တွေတင်မကဘဲ မြေကြီးထဲမှာရှိတဲ့ အကျိုးပြုအဏုဇီဝသက်ရှိတွေကို ပိုမိုထုတ်လုပ်ပေးဖို့အတွက်ပါ မြေဆီလွှာကို လှုံ့ဆော်ပေးတယ်လို့ ယုံကြည်ထားကြပါတယ်။ ဒါကြောင့် အိမ်မှာ တနိုင်တပိုင်စိုက်တဲ့ အပင်လေးတွေအတွက် သီချင်းအေးအေးလေး ဖွင့်ပေးထားတာကလည်း အရှုံးမရှိတဲ့ စမ်းသပ်မှုတစ်ခုပဲလို့ မြင်မိပါတယ်။

အနှစ်ချုပ်အနေနဲ့ ယခုခေါင်းစဉ်ကို ပြန်လည်သုံးသပ်ရရင် ဂီတသံစဉ်တွေဟာ အပင်တွေရဲ့ ကြီးထွားမှုအပေါ် သက်ရောက်မှုရှိနေတယ်ဆိုတဲ့ အချက်ဟာ အခုချိန်အထိ ပညာရှင်တွေကြားမှာ အငြင်းပွားစရာတစ်ခု ဖြစ်နေဆဲပါပဲ။ ဒီအကြောင်းနဲ့ ပတ်သက်တဲ့ သုတေသနနဲ့ လေ့လာမှုတွေဟာ သိပ္ပံနည်းကျ မှန်ကန်တိကျမှု အားနည်းတယ်ဆိုတဲ့ ဝေဖန်မှုတွေလည်း ရှိနေပါတယ်။ ဒီကိစ္စဟာ ဇီဝဗေဒ သဘောတရားထက် ရူပဗေဒ သဘောတရားပိုဆန်နေတယ်လို့လည်း ဆိုကြပါတယ်။ မည်သို့ပင်ဖြစ်စေ အချို့သော ပညာရှင်တွေကတော့ ဂီတသံစဉ်တွေဟာ အပင်ကြီးထွားမှုအပေါ်အကျိုးသက်ရောက်မှု ရှိနေတယ်လို့ ယုံကြည်နေကြပါတယ်။ လူကြီးမင်းတို့ရော ဘယ်လိုမြင်ပါသလဲ? အသံလှိုင်း တုန်ခါမှုကြောင့် ဆိုတာထက် ဂီတမှာလည်း မမြင်နိုင်တဲ့ စွမ်းအင်တစ်ခုခုများ ရှိမနေနိုင်ဘူးလား?

ဂီတပညာရှင်တွေကတော့ တေးဂီတဟာ ကြီးမားတဲ့ စွမ်းအင်တစ်ခုပဲလို့ ဆိုကြပါတယ်။

စိုက်ပျိုးသူတစ်ယောက်အနေနဲ့တော့ အပင်ကလေးတွေမှာလည်း အသိဉာဏ်နဲ့ အာရုံခံစားမှုတွေရှိနေတယ်လို့ ယုံကြည်ထားပါတယ်။

အိစက်ဝေ

ကိုးကား

https://www.gardeningknowhow.com/garden-how-to/info/how-music-affects-plant-growth.htm

https://dengarden.com/gardening/the-effect-of-music-on-plant-growth

https://www.bhg.com.au/indoor-plants-listen-to-music

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...