"ကကတစ်ငါး Giant Sea perch or Seabass"

   ကကတစ်ငါးများမှာ ရေအောက်ကြမ်းပြင်မှာ နေထိုင်ကျက်စားကြသော (demersal fish ) များ ဖြစ်ကြသည်။ ထိုငါးရဲ့ထူးခြားချက်မှာ လိင်ပြောင်းလဲတတ်သောသဘာဝရှိပြီးကကတစ်ငါးမှာ အသက် (၃-၄) နှစ်အရွယ်ထိ ငါးထီးအဖြစ်ရှိပြီး ထိုမှကျော်လွန်လျှင် ငါးမအဖြစ် အသက် (၅-၆) နှစ်အရွယ်ထိ နေထိုင်နိုင်ကြကြောင်း သိရပါသည်။

   ကကတစ်ငါးမျက်လုံး၂လုံးမှာကြီးမားပြီး မျက်စိလျင်ကြပါသည်။ အမြီးထိပ်ဝိုင်းပြီးဆူးတောင်မှာ မာကျောသည်။ ကကတစ်ငါးအကောင်ကြီးများကို"ကသပေါင်း "ငါးဟုလည်း ခေါ်ကြပါသေးသည်။

   ကကတစ်ငါးများမှာ အသက် (၄-၅) နှစ်တွင် သန္ဓေဆောင်ကြပြီး ကကတစ်အမ အကောင်ကြီးမျိုးများမှာ ဥပေါင်း ၃၂ သန်းထိ ဥဥနိုင်ကြပါသည်။ ကကတစ်သက်တမ်းမှာ (၈-၁၂) နှစ်ခန့် အသက်ရှည်ကြပြီး တချို့မှာ အသက်၂၀ နှစ် ခန့်ထိ နေထိုင်နိုင်ကြပါသည်။

   ကကတစ်ငါးကို ရေငန်ပိုင်းတွင် တွေ့ရများပြီး ရေချိုရေငန်စပ်၊ ရေချိုပိုင်းတွင်လည်း တွေ့ရတတ်သည်။ တန်ဖိုးမြင့်ငါးတစ်မျိုးဖြစ်ပြီး ကကတစ်မွေးမြူရေးလုပ်ငန်းလည်း လုပ်ကိုင်နေကြပါပြီ။ ကကတစ်ငါးများမှာ သူတို့ရဲ့အစာအဖြစ် အခွံမာရေနေသတ္တဝါ crustaceans များ၊ mollusks ခရု၊ ကမာအုပ်စုတွေနှင့် ငါးငယ်များကို စားသုံးကြပါသည်။

ကကတစ်ငါး မှာ-

Phylum-Chordata

Sub-phylum-Vertebrata

Class-Pisces

Order-Percomorphi

Family-Centropomidae

Genus-Lates

Species-Lates calcarifer ဟူ၍ သိရသည်။

ကကတစ်ငါးကို ငါးသံပုရာပေါင်း၊ ချိုချဉ်ကြော်၊ ကကတစ်ငါးခဲပတ်ကင်၊ ကကတစ်အစပ်ဟင်း၊ ငါးပေါင်း၊ ကကတစ်သောက်ဆမ်း စသည့်ဟင်းလျာများမှာ နာမည်ကြီးသည်။ ငါးသံပရာပေါင်းအတွက်ဆို ကကတစ်ငါးက အကောင်းဆုံးဖြစ်ပါသည်။

နှင်းဖြူဖြူ

Source - AQUADAPT-Myanmar