ဒေါ်နန်းထက်ထက်ချစ်၂၀၂၁ ခုနှစ် ပန်းစိုက်ရာသီအတွင်း ပန်းဈေးကွက်ကျဆင်းမှုကြုံမည်ကို စိုးရိမ်သဖြင့် ရန်ကုန်တိုင်းဒေသကြီး၊ ခရမ်းမြို့နယ်ရှိ ပန်းစိုက်တောင်သူအများစုမှာ ပန်းနှင့်သင်္ဘောပင်များကို မျှတစိုက်ပျိုးခဲ့ကြကြောင်း ဒေသခံများထံမှ သိရသည်။
"နှစ်တိုင်း ကျွန်တော်တို့ဒေသမှာ ဂန္ဓမာပန်းကို အများဆုံးစိုက်တယ်။ သီရိမင်္ဂလာဈေး ပန်းဈေးကွက်မှာဆို ခရမ်းကထွက်တဲ့ပန်းဆိုပြီး နာမည်ရတယ်။ ဒီနှစ်တော့ စိုက်ပျိုးရေးဆေးဖိုးတွေ ဈေးတက်လို့ ပန်းစိုက်တာကို လျှော့စိုက်ဖြစ်ကြတာ။ ပန်းစိုက်တာက ပိုးသတ်ဆေး၊ အပင်အားဆေး စတဲ့ စရိတ်စကတွေ ပိုကုန်တယ်လေ။ ဒီနှစ်မှာ တောင်သူ ၁၀၀ မှာ ၇၀ ဦးလောက်ကို ပန်း လျှော့စိုက်တယ်။ ပန်းပင်ရေ ၂ သောင်းလောက် စိုက်တဲ့သူက ၁ သောင်းလောက် လျှော့စိုက်ပြီး၊ ကျန်တာကို သင်္ဘောပင်တွေနဲ့ မျှစိုက်လိုက်တဲ့သဘောပါ။ လျှော့စိုက်တဲ့နှစ်ကျမှ ပန်းဈေးကွက်ကလည်း ဈေးတအားကောင်းတယ်၊ ဒီလို ဈေးကွက်ကောင်းလိမ့်မယ်လို့ တောင်သူတွေလည်း ကြိုတင်မသိကြဘူးလေ။"
ဟု ရန်ကုန်တိုင်းဒေသကြီး၊ ခရမ်းမြို့နယ်မှ ဒေသခံတောင်သူ ကိုလွှမ်းပိုင်စိုးက ပြောသည်။
ရန်ကုန်တိုင်းဒေသကြီး၊ ခရမ်းမြို့နယ်အတွင်း သင်္ဘောပင်စိုက်ပျိုးရာတွင် မေလမှ စတင်စိုက်ပျိုးပြီး၊ ၈ လ ဝန်းကျင်အကြာတွင် စတင်ခူးဆွတ်လေ့ရှိသည်။
"သင်္ဘောပင်က မြေဆီကျွေးရတာပဲ ရှိတယ်။ ကျန်တဲ့စရိတ် သိပ်မရှိဘူး၊ တစ်နှစ်ပတ်လည်နီးပါး စိုက်ပျိုးရတဲ့အပင်လည်း ဖြစ်တယ်၊ ဈေးကွက်ကလည်း အသီးအမှည့်နဲ့အသီးစိမ်း ဈေးကွက် ၂ မျိုးရှိတော့ ဈေးကွက်ပျက်မှာကို မပူရဘူး။ ကိုဗစ်ကလည်း ဖြစ်ထားတယ်၊ နိုင်ငံရေးအခြေနေကလည်း ရှိနေတယ်၊ ဒါ့အပြင် ဆေးဖိုး မြေဆီဖိုးတွေကလည်း ဈေးအရမ်းတက်တော့ မတော်လို့ ပန်းဈေးကွက်မကောင်းခဲ့ရင် စိုက်ပျိုးစရိတ်တွေ မကာမိမှာ စိုးရိမ်ပြီး၊ ဒီနှစ်မှာ သင်္ဘောပင်နဲ့မျှစိုက်ဖြစ်ကြတာပါ။ လာမယ့်ရာသီမှာတော့ အရင်တုန်းကလိုပဲ ပန်းတွေများများ ပြန်စိုက်ကြဦးမှာပါ။"
ဟု ၎င်းက ဆက်လက်ပြောသည်။
သင်္ဘောပင် ပင်ရေ (၁၅၀) စိုက်ပျိုးပါက စိုက်ပျိုးကုန်ကျစရိတ် စုစုပေါင်း ကျပ်(၇) သိန်း ဝန်းကျင်ကုန်ကျနိုင်သည်။ ပင်ကြားတန်းကြား ၆ပေ*၇ပေ ထားစိုက်ပါက သင်္ဘောပင်ရေ ၄၀၀ ဝန်းကျင် ဝင်ဆံ့ကြောင်း သိရသည်။
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
မာလာမြိုင် ကုမ္ပဏီ ကြော်ငြာ
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ question.title }}