ငါးမြစ်ချင်း စီးပွားဖြစ် အသားတိုး မွေးမြူနည်း

ငါးမြစ်ချင်းသည် စီးပွားဖြစ် ငါးမွေးမြူရေးတွင် အသုံးများသော ရေချိုမွေးမြူရေးငါး ဖြစ်ပါသည်။ အသီးအရွက်စား ငါးအမျိုးအစားဖြစ်သော်လည်း အင်းဆက်ပိုးမွှားများ၏ သားလောင်းများကိုလည်း စားသုံးလေ့ရှိပြီး ရေလယ်လွှာတွင် အဓိကနေထိုင်သော ငါးအမျိုးအစားဖြစ်ပါသည်။ ကြီးထွားမှုကောင်းမွန်ကာ အလျား ၂ပေခွဲခန့် (အလေးချိန် - ၆ ပိဿာ မှ ၉ ပိဿာ)အထိ ကြီးထွားနိုင်ပါသည်။ ရေအပူချိန် ၁ ဒီဂရီစင်တီဂရိတ်မှ ၄၀ ဒီဂရီစင်တီဂရိတ်ခန့်အထိ ကောင်းစွာခံနိုင်ရည်ရှိပါသည်။ ၁၃ ဒီဂရီစင်တီဂရိတ်ခန့်တွင် ကြီးထွားနှုန်းအကောင်းဆုံးဖြစ်ပြီး အပူချိန် ၂၀ ဒီဂရီစင်တီဂရိတ် အထက်တွင်သာ သားပေါက်နိုင်ပါသည်။ ရောဂါဒဏ်ခံနိုင်ရည်ရှိပြီး စျေးကွက်ဝယ်လိုအား ကောင်းမွန်သော ငါးအမျိုးအစားတစ်မျိုးဖြစ်ပါသည်။

ငါးမြစ်ချင်းငါးသည် အသုံးများသော ရေချိုမွေးမြူရေးငါးများ ဖြစ်သော်လည်း ငါးကူးခတ်သွားလာရန်(မွေးမြူရေးအခေါ်အရ ငါးပြေးလမ်း) လိုအပ်သောကြောင့် ကျယ်ဝန်းသောကန်များဖြင့်သာ မွေးမြူသင့်ပြီး အသေးစားငါးမွေးမြူရေးသုံး တစ်နိုင်တစ်ပိုင်ကန်ငယ်များဖြင့် မွေးမြူရန် သင့်လျော်မှု မရှိပါ။ အသေးစား ငါးမွေးမြူရေးအတွက် ၄င်းငါးမျိုးများအား မွေးမြူသင့်သော အသေးငယ်ဆုံးကန်အရွယ်အစားမှာ ၀.၂ ဧက (ဥပမာ- ၈၀ ပေ x ၁၂၀ ပေ အရွယ်အစား)ခန့် ကျယ်ဝန်းသောကန်များ ဖြစ်ပါသည်။

ငါးမြစ်ချင်းငါး အသားတိုးမွေးမြူနည်း

စီးပွားဖြစ် ငါးမြစ်ချင်းငါး မွေးမြူရာတွင် ပြုစုကန်နှင့် အသားတိုးကန် ၂မျိုးဖြင့် မွေးမြူလေ့ရှိကြပြီး မွေးကာလ ၃ နှစ်ခန့် မွေးမြူကြပါသည်။

ပြုစုကန် - ငါးမြစ်ချင်းငါးပြုစုကန်သည် ရေအနက် ၃ပေ ခန့်သာရှိပြီး ကန်အောက်ခြေရေမှော်ပင်များအား ရှင်းလင်းထားသော ရေသွင်းရေထုတ်ပြုလုပ်နိုင်သည့် ကန်များဖြစ်ပြီး အရွယ်အစားအားဖြင့် ၁ ဧက မှ ၂ ဧကခွဲခန့် ကျယ်ဝန်းသောကန်များ ဖြစ်ပါသည်။ ၄င်းကန်များအား ငါးမြစ်ချင်းသားပေါက်များ မထည့်သွင်းမီ သဘာဝသက်ရှိအစားအစာများဖြစ်သော သတ္တမျှောလှေး(zooplankton- rotifer, daphnia)များ ပေါက်ဖွားလာရန် ကောင်းစွာပြုစုထားရန် လိုအပ်ပါသည်။ ငါးသားပေါက်ထည့်သွင်းနှုန်းမှာ ၃ ပေ ပတ်လည်ရှိသော အကျယ်အဝန်းတွင် ငါးမြစ်ချင်းသားပေါက်(ငါးသန်)ကောင်ရေ ၁၀၀ မှ ၄၀၀ ခန့် ထည့်သွင်းမွေးမြူကြပါသည်။ ၄င်းကန်အတွင်း ပြုစုမွေးမြူကြပြီးမွေးမြူရေးကာလအားဖြင့် အချိန် ၄ ပတ်မှ ၆ ပတ်အတွင်း ငါးဖြန်းအရွယ် (၀.၀၁ ကျပ်သားမှ ၀.၀၃ ကျပ်သားအရွယ်)သို့ ရောက်ရှိချိန်တွင် အသားတိုးကန်များအတွင်းသို့ ပြောင်းရွှေ့ပြီးဆက်လက်မွေးမြူကြပါသည်။ ရှင်သန်နှုန်းမှာ ၅၀ ရာခိုင်နှုန်းမှ ၇၀ ရာခိုင်နှုန်းခန့် ရရှိလေ့ရှိပါသည်။

ငါးပြုစုကန်အနေဖြင့် အခြားနည်းလမ်းအားဖြင့် မြေကန်အစား ၅၀ စတုရန်းပေမှ ၁၀၀၀ စတုရန်းပေခန့်အထိ ကျယ်ဝန်းပြီး ကွန်ကရစ်၊ အုတ် သို့မဟုတ် ပလတ်စတစ်များဖြင့် ပြုလုပ်ထားသော ကန်များအတွင်း ထည့်သွင်းမွေးမြူပြီး ၀.၄ လက်မမှ ၀.၈ လက်မခန့်အရွယ် ငါးမြစ်ချင်းသားပေါက်များ ရရှိသည်အထိ ငါးပြုစုခြင်းကိုလည်း ဆောင်ရွက်နိုင်ပါသည်။ ထိုသို့ဆောင်ရွက်ရာတွင် သဘာဝအစားအစာဖြစ်သော သတ္တမျှောလှေးများ သိပ်သည်းစွာ ပေါက်ဖွားလာရန်အတွက်ကွန်ပေါင်းဓာတ်မြေသြဇာ၊ နွားချေး၊ ကြက်ချေး စသော တိရစ္ဆာန်အညစ်အကြေးများအား ထည့်သွင်းပေးရန်လိုအပ်ပါသည်။

ငါးပြုစုရာတွင် ၅ ဧကအထက် မြေသားကန်ကြီးများဖြင့် မွေးမြူပြုစုခြင်းက ပိုမိုကောင်းမွန်ကြောင်း တွေ့ရှိရပါသည်။ အကောင်းဆုံးကြီးထွားမှုကို ရရှိရန် ကန်၏ ရေအပူချိန်သည် ၂၅ ဒီဂရီစင်တီဂရိတ်ရှိရန် လိုအပ်ပြီး ၄င်းအပူချိန်ထက်အေးသော ရေအပူချိန်တွင် ငါး၏ကြီးထွားနှုန်းလျော့နည်းကျဆင်းကြောင်း တွေ့ရပါသည်။ ကန်ရေ၏ အပူချိန်သည် ကြီးထွားနှုန်းအကောင်းဆုံးအခြေအနေကို ရရှိပါက ငါးမြစ်ချင်းသားပေါက်များသည် မွေးကာလ ၆ လ အတွင်း ၃၀ ကျပ်သားအရွယ်သို့ ကြီးထွားနိုင်ပါသည်။

အသားတိုး မွေးမြူခြင်း- အနည်းငယ်တိုးချဲ့မွေးမြူနည်းစနစ်(Extensive system)ဖြင့် အသားတိုး မွေးမြူရာတွင် တစ်ဧကလျှင် စတင်ထည့်သွင်းကုန်ချိန် ၃၀ ပိဿာ မှ ၅၀ ပိဿာ အထိ မွေးကာလတစ်နှစ်အတွင်း စျေးကွက်ဝင်အရွယ် ငါးမြစ်ချင်းကုန်ချိန်ပိဿာ ၁၅၀ မှ ၁၇၅ ပိဿာခန့် ရရှိနိုင်ပါသည်။

မွေးမြူနည်းစနစ် အသေးစိတ်မှာ အောက်ပါအတိုင်းဖြစ်ပါသည်။

သားပေါက်ပြုစုခြင်း - တစ်ဧကကန်တွင် ငါးမြစ်ချင်းသားပေါက်ကောင်ရေ ၄၀,၀၀၀ မှ ၈၀,၀၀၀ အထိ ထည့်သွင်းမွေးမြူနိုင်ပြီး ပိဿာအနေဖြင့် ထည့်သွင်းမည်ဆိုလျှင် ၂၅ ကျပ်သား ထည့်သွင်းနိုင်ပါသည်။ ရှင်သန်မှုမှာ တစ်ဧကတွင် ငါးအကောင်ရေ ၂,၅၀၀ မှ ၁၆,ဝဝဝ ကောင် ရှင်သန်နိုင်ပြီး ရာခိုင်နှုန်းအား ဖြင့် ၅ မှ ၃၀ ရာခိုင်နှုန်း ရှင်သန်မှုရှိပါသည်။ တစ်ဧက ကုန်တက်ပိဿာမှာ ၅၀ မှ ၁၀၀ ပိဿာ အထိ ရှိပါသည်။

ငါးဖြန်းအား ပထမတစ်နှစ်မွေးခြင်း- တစ်ဧကကန်တွင် ငါးဖြန်းကောင်ရေ ၁၆,၀၀၀ မှ ၂၄,၀၀၀ အထိ ထည့်သွင်းနိုင်ပြီး ပိဿာအနေဖြင့် ၂ မှ ၃.၇၅ ပိဿာ ထည့်သွင်းနိုင်ပါသည်။ ရှင်သန်မှုမှာ တစ်ဧကကန်တွင် ငါးဖြန်းကောင်ရေ ၈,၀၀၀ မှ ၁၄,၀၀၀ ကောင်ရှင်သန်နိုင်ပြီး ရာခိုင်နှုန်အားဖြင့် ၅၀ မှ ၆၀ ရာခိုင်နှုန်း ရှင်သန်မှုရှိပါသည်။ တစ်ဧက ကုန်တက်ပိဿာမှာ ၇၅ မှ ၁၇၅ ပိဿာအထိ ရှိပါသည်။

ပထမနှစ်မှ ဒုတိယတစ်နှစ် မွေးမြူခြင်း - တစ်ဧကကန်တွင် ငါးမြစ်ချင်းကောင်ရေ ၂၀၀၀ မှ ၂၈၀၀ ကောင်အထိ ထည့်သွင်းနိုင်ပြီး ပိဿာအနေဖြင့် ၂၅ မှ ၅၀ ပိဿာ ထည့်သွင်းနိုင်ပါသည်။ ရှင်သန်မှုမှာ တစ်ဧကတွင် ငါးမြစ်ချင်းကောင်ရေ ၁၂၀၀ မှ ၁၆၀၀ ကောင်ရှိပြီး ရာခိုင်နှုန်းအားဖြင့် ၅၀ မှ ၇၀ ရာခိုင်နှုန်း ရှင်သန်မှုရှိပါသည်။တစ်ဧက ကုန်တက်ပိဿာမှာ ၁၅၀ မှ ၂၀၀ ပိဿာအထိ ရှိပါသည်။

ဒုတိယနှစ်မှ ကန်ဖော်ဖမ်းဆီးခြင်း - တစ်ဧကကန်တွင် ငါးမြစ်ချင်းကောင်ရေ ၂၄၀ မှ ၃၂၀ ကောင်အထိ ထည့်သွင်းနိုင်ပြီး ပိဿာအနေဖြင့် ၃၀ မှ ၅၀ ပိဿာ အထိ ထည့်သွင်းနိုင်ပါသည်။ရှင်သန်မှုမှာ တစ်ဧကတွင် ငါးမြစ်ချင်းကောင်ရေ ၁၆၀ မှ ၂၀၀ ပိဿာ အထိ ရှင်သန်နိုင်ပြီး ရာခိုင်နှုန်းအားဖြင့် ၅၀ မှ ၇၀ ရာခိုင်နှုန်း ရှင်သန်နိုင်ပါသည်။ တစ်ဧက ကုန်တက်ပိဿာမှာ ၁၅၀ မှ ၁၇၅ ပိဿာ အထိ ရှိပါသည်။

အစာကျွေးခြင်း- ငါးမြစ်ချင်းငါးသည် အစုံစားငါးအမျိုးအစားဖြစ်ပြီး ရေနေအင်းဆက်သားလောင်းများအား နှစ်သက်စွာ စားသုံးပါသည်။သဘာဝအစားအစာကို အားထားမွေးမြူသော်လည်း ကန်၏ သဘာဝအစားအစာထုတ်လုပ်မှု ကျဆင်းသောအခြေအနေများတွင် ငါး၏ကြီးထွားနှုန်းအား မထိခိုက်စေရန်အတွက် ဖြည့်စွက်စာကျွေးမွေးပေးရန် လိုအပ်ပါသည်။ ငါး၏ကြီးထွားနှုန်း အကောင်းဆုံး ဖြစ်စေလိုပါက အာဟာရတန်ဖိုးမြင့်မားသော အရည်အသွေးကောင်းမွန်သည့် အစာအား ဖြည့်စွက်စာအဖြစ် ကျွေးမွေးပေးရန် လိုအပ်ပါသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...