မြေအပူချိန်က ပူရမဲ့ ကိစ္စလား

မြေမှာ အပူချိန်ရှိသလားမေးရင် "ရှိတာပေါ့" နေနဲ့တိုက်ရိုက်ထိတွေ့တဲ့ချိန်မှာဆိုရင် မြေကြီးက မပူဘူးလား၊ နွေးနေတဲ့ မြေတို့ အေးနေတဲ့မြေတို့ကိုလည်း ကိုင်တွယ်ထိတွေ့ဖူးမှာပါပဲ။

ဒီနေ့မှာတော့ အဲ့လို မြေမှာရှိတဲ့ အပူချိန်တွေက အပင်တွေကို ဘယ်လိုတွေ ပါဝင်ပတ်သက်နိုင်သလဲဆိုတာကို လေ့လာကြည့်ရအောင်လားခင်ဗျာ...

မြေအပူချိန်ဆိုတာ မြေနဲ့ အပူရဲ့ ပတ်သက်ဆက်နွယ်မှုပါပဲ။ ဆိုတော့ ဘယ်လိုပတ်သက်ကြသလဲဆိုတော့ အောက်က အကြောင်းအချက်အလက်တွေက စကားပြောပါတယ်။

မြေကြီး အရောင်

အားလုံးသိကြတဲ့အတိုင်း အရောင်တွေက အပူကိုစုပ်ယူနိုင်စွမ်းတွေ မတူညီကြပါဘူး။ အနက်ရောင်ရှိတဲ့ မြေကြီးတွေက ပုံမှန်ထက်ပိုပြီးတော့ အပူကိုစုပ်ယူနိုင်ကြပါတယ်။ ဆိုတော့ အရောင်က နက်မှောင်တဲ့ ဖက်ကိုသွားလေလေ အပူကိုပိုပြီးတော့ စုပ်ယူနိုင်လေလေပါပဲ။

မြေကြီးအဖုံးအကာ

မြေကို ဖုံးအုပ်ထားတာမျိုးရှိရင် မြေကြီးကနေ ရေငွေ့ပျံတာကို ပိတ်ထားသလိုဖြစ်ပြီးတော့ မြေကြီးထဲမှာ အစိုဓာတ်ကိုပိုပြီးတော့များစေပါတယ်။ ဆိုတော့ မြေအစိုဓာတ်များလာပြီးတော့ အပူချိန်ကလည်း လျော့ပါတယ်။ တိုက်ရိုက်အားဖြင့်ဆိုရင်လည်း နေရောင်နဲ့ အပူကို တိုက်ရိုက်မရတာမို့ အပူချိန် သက်သာစေပါတယ်။ အပင်တွေပေါက်နေတာကလည်း မြေကြီးကို ပူလွန်းတာ အေးလွန်းတာကနေ ကာကွယ်ပေးနိုင်ပါတယ်။

အတိမ်းအစောင်း၊ ကုန်းမြင့်

နေရောင်က အပေါ်ကနေကျတာဖြစ်တဲ့အတွက်မို့ တောင်တန်းနဲ့ ကုန်းတက်ကုန်းဆင်းတွေက နေရောင်ရရှိမှုမှာ အပူစုပ်ယူမှုတွေ ကွာခြားသွားနိုင်ပါတယ်။

အော်ဂဲနစ်ပစ္စည်းတွေ ပါဝင်နေမှု

အော်ဂဲနစ်ပစ္စည်းတွေ ပါဝင်တာက ရေစုပ် ရေထိန်းစွမ်းအားကို ပိုကောင်းစေပါတယ်။ အရောင်ကိုလည်း ပိုပြီးတော့ မဲနက်စေပါတယ်၊ ဆိုတော့ အော်ဂဲနစ်ပစ္စည်းတွေပါတာက မြေကြီးရဲ့ အပူစုပ်ယူမှုမှာ ပါဝင်ပတ်သက်နေပါတယ်။

ရေငွေ့ပျံ့ခြင်း

ရေငွေ့ပျံ့တာက နေရောင်ကို တန်ပြန်တဲ့ လုပ်ငန်းစဉ်တစ်ခုလိုဖြစ်နေပြီးတော့ရေငွေ့ပျံ့မှု များရင် မြေကြီးမှာ အပူ မတက်တော့ပါဘူး။

နေရောင်

အဓိက မြေကြီးအပူချိန်ကို ဆုံးဖြတ်ပေးတာကတော့ နေရောင်ပါ။ နေရောင်ထိတွေ့မှုများလေလေ ပူလေလေပါပဲ။

မြေကြီး အပူချိန် အပူချိန် နဲ့ ဘာလို့ပြောနေတာလဲဆိုတော့ မြေကြီး အပူချိန်မြင့်တာ က မြေကြီးရဲ့ အနေအထားကို ဇီဝအားဖြင့်သော်လည်းကောင်း၊ ဓာတုနည်းအားဖြင့်သော်လည်းကောင်း ပါဝင်ပတ်သက်နေလို့ပဲဖြစ်ပါတယ်။

နောက်ထပ်ပြီးတော့လည်း အဲ့မြေကြီးပေါ်မှာရှိနေတဲ့အပင်တွေရဲ့ကြီးထွားမှုမှာလည်း ပါဝင်ပတ်သက်နေပါသေးတယ်။

ဆိုတော့ မြေကြီးရဲ့ ဇီဝဆိုင်ရာကို ဘယ်လိုများ ပတ်သက်နေပါသလဲ?

ဇီဝဆိုင်ရာလှုပ်ရှားမှုတွေ

၁၀ ကနေ ၂၈ ဒီဂရီဆဲလ်စီးယပ်မှာဆိုရင် မြေကြီးအသက်ရှုတယ်လို့ ဆိုလို့ရပါတယ်။ မြေကြီးထဲမှာလည်း အင်ဇိုင်းတွေရှိပြီးတော့ သူတို့လှုပ်ရှားမှုတွေ လုပ်ကြတဲ့အခါမျိုးမှာ မြေဆွေးဖြစ်တဲ့ဖြစ်စဉ်တွေလိုမျိုးဖြစ်ပြီးတော့ မြေထဲမှာရှိတဲ့ ဇီဝသက်ရှိလှုပ်ရှားမှုတွေကိုလည်း အားပေးရာရောက်ပါတယ်။ မြေကြီးကသာ ရေခဲမှတ်အပူချိန်မှာပဲရှိနေတယ်ဆိုရင်တော့ မြေကြီးထဲမှာရှိတဲ့ အနုဇီဝ သက်ရှိလေးတွေအတွက် သတ္တုဓာတ်တွေက လုံလုံလောက်လောက် မရနိုင်လို့ မြေထဲမှာ အာဟာရဓာတ်တွေလည်း ထုတ်လွှတ်ပျော်ဝင်နိုင်စွမ်းတွေမရှိတော့ပါဘူး။ ဒါကြောင့်မို့ ရေခဲတဲ့ ဒေသတွေမှာ ဖန်လုံအိမ်တွေဆောက်ပြီးတော့ စိုက်ပျိုးကြတာဖြစ်ပါတယ်။

မြေကြီးထဲက အနုဇီဝသက်ရှိတွေ

သူတို့အတွက် အကောင်းဆုံး မြေကြီးအပူချိန်ကတော့ ၁၀ ကနေ ၃၅.၆ ဒီဂရီဆဲလ်စီးယပ် ဖြစ်ပါတယ်။ အဲ့အပူချိန်ဟာဆိုရင်တော့ အနုဇီဝသက်ရှိတွေ လှုပ်ရှားနိုင်မှုအတွက် အကောင်းဆုံးဖြစ်ပြီးတော့ အပူချိန်က နည်းလေလေ သူတို့ရဲ့လှုပ်ရှားမှုက နည်းလေလေဖြစ်ပါတယ်။

မြေကြီးထဲက မြင်နိုင်တဲ့ သက်ရှိတွေ

၁၀ ကနေ ၂၄ ဒီဂရီဆဲလ်စီးယပ်မှာဆိုရင်တော့ မြေကြီးထဲမှာရှိတဲ့ မျက်စိနဲ့မြင်နိုင်တဲ့ သက်ရှိသတ္တဝါလေးတွေရဲ့ ဇီဝကမ္မဖြစ်စဉ်တွေက ပိုပြီးတော့ အလုပ် လုပ်နိုင်ကြပါတယ်။ အရမ်းပူသွားတဲ့ အပူချိန် ၅၈ ဒီဂရီဆဲလ်စီးယပ်လိုမျိုး ရောက်သွားတယ်ဆိုရင် သူတို့လေးတွေက သေသွားကြမှာပါ။ အရမ်းအေးရင်တော့ နေနိုင်ပေမဲ့ ပူရင်တော့ ဒီလှုပ်ရှားမှုတွေရှိတော့မှာမဟုတ်ပါဘူး။ တီကောင်တွေ သဲထဲမှာ မနေရတဲ့အကြောင်းရင်းပါပဲ။

အော်ဂဲနစ် ဆွေးမြည့်မှုဖြစ်စဉ်တွေ

အရမ်းအေးနေမယ်၊ ရေခဲမှတ်ရောက်နေတဲ့ မြေကြီးတွေမှာဆိုရင် အော်ဂဲနစ်ပစ္စည်းတွေက ဆွေးမသွားပဲနဲ့ အများကြီး စုပြုံလာနိုင်ပါတယ်။ ဘာလို့လဲဆိုရင် အပေါ်မှာ ပြောခဲ့သလိုမျိုး အနုဇီဝရော မျက်စိနဲ့မြင်နိုင်တဲ့သတ္တဝါလေးတွေရဲ့လှုပ်ရှားနိုင်မှုက လျော့ကျသွားလို့ဖြစ်ပါတယ်။ ၂ ကနေ ၃၈ဒီဂရီဆဲလ်စီးယပ်မှာဆိုရင်အော်ဂဲနစ် ဆွေးမြည့်မှုဖြစ်စဉ်တွေက ပုံမှန်အတိုင်း ကောင်းကောင်းအလုပ်လုပ်မှာပဲဖြစ်ပါတယ်။ မြေထဲက သက်ရှိတွေလည်း သူတို့ ဇီဝကမ္မဖြစ်စဉ်တွေပုံမှန်အတိုင်းဖြစ်ပြီးတော့ သဟဇာတဖြစ်မှုကို ခံစားကြရမှာဖြစ်ပါတယ်။

ဓာတုနည်းအရ မြေကြီးကို အပူချိန်က ဘယ်လို သက်ရောက်နေပါသလဲ။

ဓာတ်ဖို ဖလှယ်နိုင်စွမ်း

မြေအပူချိန်တိုးလာရင် အော်ဂဲနစ်ပစ္စည်းတွေက မြန်မြန်ပြိုကွဲတာကြောင့်မို့ ဒီပြိုကွဲမှုဖြစ်စဉ်မှာ မြေမှုန့်လေးတွေေက သေးသထက်သေးပြီးသွားပါတယ်။ ဒီလိုသေးငယ်သွားတာနဲ့ အပူချိန်ကြောင့် ဓာတ်ဖို ဖလှယ်နိုင်စွမ်းက ကျလာပါတယ်။ ဥပမာဆိုရင် သဲကန္တာရထဲမှာ မြေသြဇာ မရနိုင်တာက ဒီလို ဓာတ်ဖိုဖလှယ်နိုင်စွမ်းတွေ လုံးဝမရှိတာကြောင့်မို့လို့ ဆိုနိုင်ပါတယ်။

မီးစုန်းရရှိနိုင်မှု

မြေအပူချိန်လေး အသင့်အတင့်ရှိတဲ့အချိန်မှာဆိုရင် ရေမှာပျော်ဝင်နိုင်တဲ့ မီးစုန်း (ဖော့စဖရပ်စ်) တွေက စိမ့်ဝင်ပြီး အပင်တွေရရှိမှု ပိုပြီးတော့ လွယ်ကူပါတယ်။ အပူချိန်ကသာ အေးနေခဲ့မယ်ဆိုရင် ဖော့စဖောရပ်စ်တွေက မပြိုကွဲတဲ့ အော်ဂဲနစ်ပစ္စည်းတွေကြားထဲမှာ ပိတ်မိနေမှာဖြစ်ပါတယ်။

မြေချဉ်ငံကိန်း

နောက်တစ်ခုကတော့ မြေချဉ်ငံကိန်းဖြစ်ပါတယ်။

၂၅ ကနေ ၃၉ ဒီဂရီဆဲလ်စီးယပ် လောက်မှာ မြေအပူချိန်က ရှိနေတယ်ဆိုရင် မြေထဲမှာ အော်ဂဲနစ် အက်ဆစ်ပြိုကွဲမှုတွေရှိလာပြီးတော့ မြေချဉ်ငံကိန်းက မြင့်လာမှာပါ။ ပူလေလေ ပြိုကွဲလေလေပါပဲ။

ရုပ်ပိုင်းဆိုင်ရာ ပြောင်းလဲမှုဖြစ်စဉ်တွေဖြစ်တဲ့

မြေသားတည်ဆောက်ပုံ

အပူချိန်များရင် သဲနဲ့ ရွှံ့အချိုးက တဖြည်းဖြည်းမညီမျှမှုတွေဖြစ်လာပါတယ်။ ခြောက်သွေ့မှုတွေကြောင့် သေးသေးလေးတွေပြိုကွဲသွားပြီးတော့ နုန်းအရွယ်အစား အမှုန်လေးတွေ ပိုများလာပါတယ်။ အပူချိန်များတာကြောင့်မို့ ကွဲထွက်လာတာကနေ မြေသားတည်ဆောက်ပုံတွေ ပြောင်းလဲလာကြပါတယ်။

မြေသားတွယ်ကပ်မှု

၃၀ ဒီဂရီဆဲလ်စီးယပ်မှာ မြေသားတွယ်ကပ်မှုက ကောင်းတဲ့ အခြေအနေဖြစ်ပါတယ်။ မြေထဲက အိုင်းယွန်းနဲ့ အလူမီနီယမ် အောက်ဆိုဒ်တွေ အပူချိန်ကြောင့် ပြောင်းလဲတဲ့ဖြစ်စဉ်က ဘိလပ်မြေလို တွယ်ကပ်နိုင်တဲ့ စွမ်းအားတွေ တိုးလာစေပါတယ်။

မြေသားထဲမှာ အစိုဓာတ်ပမာဏ

အပူချိန်များရင် ရေတွယ်ကပ်နိုင်အားနည်းပြီးတော့ အစိုဓာတ်တွေ မြေကြီးကနေ ဆုံးရှုံးပါမယ်။ အပေါ်ကနေ အောက်ကို စီးသွားတတ်ပါတယ်။ နောက်တစ်ခုကတော့ အရိပ်မရှိဘူး နေအပူချိန် ဆက်တိုက်ရနေမယ်ဆိုရင်ကျပြန်တော့လည်း အငွေ့ပျံဆုံးရှုံးတာဖြစ်နိုင်ပါသေးတယ်။

မြေကြီးထဲက လေထု

မြေကြီးထဲက ကာဗွန်ဒိုင်အောက်ဆိုဒ်ပါဝင်မှု ပမာဏက အပူချိန်နဲ့သက်ဆိုင်နေပါတယ်၊ အပူချိန်များတာက အနုဇီဝသက်ရှိတွေ လှုပ်ရှားမှုရှိလာပြီးတော့ ကာဗွန်ဒိုင်အောက်ဆိုဒ် ထုတ်လွှတ်မှုပမာဏကို ပိုကောင်းလားစေပါတယ်။

အပင်တွေမှာ မြေသားအပူချိန်က ဘယ်လိုသက်ရောက်ပါသလဲ

ရေ

မြေသားအပူချိန်နည်းနေရင် ရေစုပ်ယူအား နည်းပါတယ်။ ဘာလို့လဲဆိုတော့ ရေထုရဲ့ တွယ်ကပ်အားက မြင့်နေပြီးတော့ မြေသားအပူချိန်နည်းနေချိန်မှာ မြေသားက ရေစုပ်ယူမှုကလည်း နည်းနေလို့ဖြစ်ပါတယ်။ အဲ့လို ရေစုပ်ယူမှုနည်းရင် အပင်ရဲ့ အစာချက်လုပ်မှုကလည်း ကျသွားမှာဖြစ်ပါတယ်။

အာဟာရတွေ စုပ်ယူမှု

အာဟာရတွေ ရရှိနိုင်မှု သံသရာစက်ဝန်းက မြေကြီးထဲက အနုဇီဝသက်ရှိတွေနဲ့ သက်ရှိတွေရဲ့ သူတို့ ကမ္မဖြစ်စဉ်တွေကြောင့်လည်း လည်ပတ်နေတာဖြစ်ပါတယ်။ သူတို့အတွက် အကောင်းဆုံးအပူချိန်ကလည်းမှာ အာဟာရတွေကို အပင်တွေက ပေါပေါများများ ရနိုင်မှာဖြစ်ပါတယ်၊ နည်းလွန်းရင်လည်း ရေတွယ်ကပ်အားက မြင့်နေပြိးတော့ အာဟာရတွေ မထုတ်ပေးနိုင်တော့ဘူး၊ သက်ရှိတွေကလည်း လှုပ်ရှားမှုတွေနည်းတယ်။ ပူလွန်းရင်လည်း မြေထဲက အနုဇီဝသက်ရှိတွေ လှုပ်ရှားမှုနည်းသလို ရေကလည်း ဆုံးရှုံးပါဦးမယ်။

အမြစ်ကြီးထွားမှု

မြေကြီး အပူချိန် မြင့်တာနဲ့အမျှ အမြစ်ထဲက ဆဲလ်လေးတွေကြီးထွားမှုအား ကောင်းပါတယ်။ မြေကြီးအပူချိန်နည်းတာက အမြစ်တစ်သျှူးလေးတွေထဲက အာဟာရကိုနည်းစေပြီးတော့ အမြစ်ကြီးထွားမှုကို လျော့ကျစေပါတယ်။

ကဲ အဲ့လိုဆိုတော့ သိတဲ့သူတွေကတော့ ရာသီဥတုတွေကို ပြောင်းမရပေမဲ့ ကိုယ်ပြောင်းလဲလို့ရတာတွေကို ပြောင်းလဲပြီးတော့ အောင်မြင်အောင် စိုက်ပျိုးနေကြပါတယ်။

အောင်မြင်ဖြစ်ထွန်းတဲ့ သီးနှံကိုဖန်တီးနိုင်သော လက်များဖြစ်ကြပါစေဗျာ..။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...