ကျွဲ၊ နွား၊ သိုး၊ ဆိတ်များအတွက် အာဟာရဖြည့်စွက်စာ ယူရီးယားသကာတုံးပြုလုပ်နည်း

အာဟာရဖြည့်စွက်စာ ယူရီးယားသကာတုံးမှာ ကျွဲ၊ နွား၊ သိုး၊ ဆိတ်ကဲ့သို့ စားမြုံ့ပြန် သတ္တဝါများအတွက် မရှိမဖြစ်လိုအပ်သော ဖြည့်စွက်စာဖြစ်ပါသည်။

၄င်းသကာတုံးကို ကျွဲ၊ နွား၊ သိုး၊ ဆိတ်များကို ဖြည့်စွက်စာအဖြစ်ကျွေးမွေးပါက အာဟာရဓာတ် ပိုမိုရရှိစေခြင်းကြောင့် ကြီးထွားမှုကို ပိုမိုကောင်းမွန်စေပါသည်။ ပူအိုက်ခြောက်သွေ့သော ရာသီတွင် အာဟာရဓာတ်နည်းပါးသော အစာကြမ်းများကို စားရသော တိရစ္ဆာန်များ၊ လယ်ကွင်းများတွင်ထိန်းကျောင်းမွေးမြူထားသော တိရစ္ဆာန်များအတွက် အထူးလိုအပ်ပါသည်။

ယူရီးယားသကာတုံးကို တစ်နှစ်ပတ်လုံးကျွေးမွေးနိုင်ပါသည်။

ယူရီယားသကာတုံးပြုလုပ်ရာတွင် အခြေခံအားဖြင့် ပါဝင်သောပစ္စည်းများမှာ-

(က) သကာရည် - ၃၅ %

(ခ) ဖွဲနု - ၃၅%

(ဂ) ယူရီးယား(ပုလဲ)မြေသြဇာ - ၁၀%

(ဃ) ဘိလပ်မြေ - ၅%

(င) ထုံး - ၁၀%

(စ) ဆား - ၅% တို့ ဖြစ်ပါသည်။

လိုအပ်သောပစ္စည်းကိရိယာများမှာ -

(က) သကာတုံးပြုလုပ်ရန်အတွက် (သစ်သားခွက်၊ ပလတ်စတစ်ခွက်၊ သံပုံး၊သွပ်ပုံး)။

(ခ) အထက်ပါ ပါဝင်ပစ္စည်းများ။

(ဂ) ရောစပ်ရန်အတွက်ကရိယာများ(ဂေါ်ပြား၊ ဇလားခွက်ကြီး)။

(ဃ) ချိန်ခွင်တို့ ဖြစ်ပါသည်။

ပြုလုပ်နည်းမှာ -

၁။ ဖွဲနု၊ ဘိလပ်မြေ၊ ထုံးတို့ကို အထက်ပါအချိုးအစားတိုင်းချိန်တွယ်၍ သမအောင်မွှေပါ။

၂။ သကာရည်၊ ယူရီးယား၊ ဆားတို့ကိုလည်း အထက်ပါ အချိုးအစားအတိုင်းချိန်တွယ်၍ ဇလုံထဲရောထည့်၍ သမအောင် ရောနယ်ပါ။

၃။ နယ်ပြီးပါက ဖွဲနုအရောထဲသို့ သကာရည်အရောကို လောင်းထည့်ပြီး သမအောင်နယ်ပါ။

၄။ သမသွားသောအခါ အသင့်ပြုလုပ်ထားသောပုံစံခွက်အတွင်းသို့ သတ်မှတ်အလေးချိန်အတိုင်း ထည့်၍ သစ်သားဒင်ဖြင့်ထုထောင်းခြင်း၊ နင်းပြားခံ၍ ခြေထောက်ဖြင့်နင်းသိပ်ခြင်းပြုလုပ်ပါ။

၅။ ပြီးလျှင် ပုံစံခွက်ထဲမှ သကာတုံးကို ထုတ်ယူပြီး(၂၄) နာရီခန့် အရိပ်ထဲတွင် အခြောက်ခံထားပြီးပါက ကျွဲ၊ နွား၊ သိုး၊ ဆိတ်များကို ကျွေးမွေးနိုင်ပြီဖြစ်ပါသည်။

ကျွေးမွေးရန်နှုန်းထားမှာ -

သကာတုံးများထည့်ကျွေးရာတွင် အလေအလွင့်နည်းစေရေးအတွက် သကာတုံးထည့်နိုင်သည့် သစ်သားခွက် (သို့) သတ္တုခွက်တွင်ထည့်၍ အောက်ပါနှုန်းထားအတိုင်းကျွေးမွေးနိုင်ပါသည်။

(က) နွားကြီးများတစ်ရက်လျှင် (၂၀ - ၅၀) ကျပ်သား။

(ခ) (၆) လအထက်ကျွဲနှင့် နွားငယ်များကို တစ်ရက်လျှင် (၉ - ၁၅) ကျပ်သား။

(ဂ) သိုး၊ ဆိတ်များကို တစ်ရက်လျှင်(၄ - ၆ )ကျပ်သား ကျွေးနိုင်ပါသည်။

အကျိုးသက်ရောက်မှုအနေဖြင့် -

ယူရီးယားသကာတုံး(၁)ပိဿာသည် နှမ်းဖတ်(၁)ပိဿာ(သို့) စပ်စာ(၂)ပိဿာ၏ အာဟာရတန်ဖိုးနှင့် ပျမ်းမျှအားဖြင့်တူညီပါသည်။ သကာတုံးကျွေးမွေးခြင်းအားဖြင့် နို့စားနွားမများနို့ထွက် (၂၀)% တိုးခြင်း၊ ဇီးပြန်ရနှုန်းမြန်၍ သားပေါက်နှုန်းကောင်းခြင်း၊ တိရစ္ဆာန်အငယ်များကြီးထွားနှုန်းကောင်း၍ အရွယ်ရောက်စောခြင်း၊ ကျန်းမာဝဖြိုးခြင်း၊ ခိုင်းနွားများ လုပ်ငန်းခွင်စွမ်းအားတိုးတက်လာခြင်း စသည့်အကျိုးသက်ရောက်မှုများ ရရှိနိုင်ပါသည်။

သတိပြုရမည်အချက်များမှာ -

(က) သကာတုံးပြုလုပ်စဉ် ယူရီးယားအခဲနှင့် ဘိလပ်မြေအခဲများ မပါစေရ။

(ခ) သကာရည်ထဲတွင် ပုလဲဓာတ်မြေသြဇာများ ပျော်ဝင်အောင်မွှေပါ။

(ဂ) ပါဝင်သည့်ပစ္စည်းများကို နှံ့စပ်အောင်ရောနှောရပါမည်။

(ဃ) သကာတုံးသည် အာဟာရဖြည့်စွက်စာဖြစ်၍ အစာနု (သို့) အစာကြမ်းနှင့်တွဲဖက်ကျွေးရပါမည်။

(င) ရေလုံလောက်စွာ သောက်နိုင်စေရန်ထားရှိရပါမည်။

(စ) စတင်ကျွေးမွေးချိန်တွင် နည်းနည်းချင်းစတင်ကျွေး၍ တဖြည်းဖြည်းပမာဏ တိုး၍ကျွေးသင့်ပါသည်။

ယူရီးယားအဆိပ်သင့်ခြင်းဖြစ်ပွားပါက အဆိပ်သင့်လက္ခဏာများနှင့် ကုသနည်းများ

အလွန်အကျွံစားမိပါက အဆိပ်အတောက်ဖြစ်တတ်ပါသည်။ လက္ခဏာများမှာ -

(က) ပါးစပ်တဝိုက်အမြှုပ်ထွက်ခြင်း၊

(ခ) ဘယ်ဖက်ဘေးရှိ အစာအိမ်ရောင်ခြင်း၊

(ဂ) အရက်မူးနေသကဲ့သို့ဖြစ်နေခြင်း၊

(ဃ) မအီမသာဖြစ်ပြီး အသက်ရှူကြပ်ခြင်း၊

(င) ဒယီးဒယိုင်ဖြစ်ခြင်း၊

(စ) အကြောဆွဲခြင်းတို့ ဖြစ်ပွားတတ်ပါသည်။

ကုသခြင်း

(က) အဆိပ်သင့်၍ မကျန်းမာသောတိရစ္ဆာန်များကိုသီးခြားစီ ခွဲခြားထားခြင်း။

(ခ) အစာခွက်အတွင်းမှ သကာတုံးများကိုဖယ်ရှားပေးခြင်း။

(ဂ) ရှာလကာရည် (၁)လီတာမှ (၂) လီတာအထိ ရေနှင့်ရော၍ မကျန်းမာသောတိရစ္ဆာန်များကို တိုက်ကျွေးခြင်းတို့ဖြစ်ပါသည်။

ကျွဲ၊ နွား၊ သိုး၊ ဆိတ်များအတွက် အာဟာရဖြည့်စွက်စာ သကာတုံးများကို အလွယ်တကူဝယ်ယူကျွေးမွေးနိုင်သော်လည်း အရည်အသွေးမမှန်ခြင်း၊ လတ်ဆတ်မှုမရှိခြင်း စသောကိစ္စရပ်များနှင့်ကြုံတွေ့နိုင်သဖြင့် အလွယ်တကူရရှိနိုင်သော ကုန်ကြမ်းများဖြင့် ကိုယ်တိုင်ပြုလုပ်နိုင်ပါက ကုန်ကျစရိတ် ပိုမိုသက်သာနိုင်သလို ပိုမိုအကျိုးရှိနိုင်ပါကြောင်း လေ့လာရေးသားတင်ပြလိုက်ရပါသည်။

မှီငြမ်း-မွေးကုဦးစီးဌာနမှ ဖြန့်ဝေသော လက်ကမ်းစာစောင်များ။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟု ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...