ဒေါ်နန်းထက်ထက်ချစ်
Greenovator
ကောက်ရိုးမှိုစတင်စိုက်ပျိုးမယ့် တောင်သူတိုင်း သိထားသင့်တဲ့ အဓိကသတိပြုရမယ့် အချက်လေးတွေကို မေးမြန်းစူးစမ်း တင်ပြပေးလိုက်ပါတယ်။
ဂရုပြုရမယ့်အချက်လေးတွေကတော့
(၁) နေရာဒေသ၊
(၂) မျိုးရွေးချယ်မှု
(၃) စိုက်ပျိုးပြုစုထိန်းသိမ်းစနစ် ကျွမ်းကျင်နိုင်နင်းမှု
(၄) လုပ်ငန်းစီမံခန့်ခွဲမှု
(၅) စျေးကွက်အနေအထား
(၆) စွန့်ပစ်ပစ္စည်းများ စနစ်တကျပြန်လည်အသုံးချမှု စတာတွေ ဖြစ်ပါတယ်။
ပထမဦးဆုံး စိုက်ပျိုးလုပ်ကိုင်လိုတဲ့ နေရာဒေသကို ရွေးချယ်ပါ။ ကိုယ်စိုက်ပျိုးမယ့် မြေဟာ ကောက်ရိုးမှိုစိုက်ပျိုးဖြစ်ထွန်းမယ့် မြေအမျိုးအစား ဖြစ်ရပါမယ်။ ခြ၊ ပုရွက်ဆိတ်နဲ့ တခြားသက်ရှိပိုးမွှားလေးတွေ ကင်းတဲ့နေရာ၊ အနံအသက်ဆိုးတွေ ကင်းဝေးရာကို ရွေးချယ်ပါ။ ရေစီးရေလာကောင်းပြီး ရေမဝပ်တဲ့နေရာ၊ ရေစုပ်ယူထိန်းသိမ်းထားနိုင်တဲ့ နေရာဖြစ်ရပါမယ်။ စိုက်ပျိုးမြေဟာ မြို့တွင်းနဲ့အလှမ်းမဝေးတဲ့ နေရာမျိုးဖြစ်မှသာ ကုန်ကြမ်းနဲ့ ကုန်ချော သယ်ယူပို့ဆောင်ရာမှာ ကုန်ကျစရိတ်သက်သာပြီး တွက်ချေကိုက်မှာ ဖြစ်ပါတယ်။
ရေကောင်းစွာရရှိတဲ့နေရာ။ လုပ်သားအလွယ်တကူရရှိတဲ့ နေရာ။ ကုန်ကြမ်းအလွယ်တကူရရှိတဲ့ နေရာမျိုးဖြစ်ရပါမယ်။ ဒေသဆိုတာကတော့ ကျွန်တော်တို့နိုင်ငံမှာ အပူပိုင်းဒေသ၊ သမပိုင်းဒေသ၊ အအေးပိုင်းဒေသ ဆိုပြီးရှိတဲ့အနက် ကောက်ရိုးမှိုနဲ့သင့်တော်တာက အပူပိုင်းဒေသနဲ့ သမပိုင်းဒေသ တွေပါ။ ကောက်ရိုးမှိုက အပူချိန်မြင့်ကြိုက်မှိုမို့ အအေးပိုင်းဒေသမှာ စိုက်ပျိုးရင် အခက်အခဲ အနည်းနဲ့အများ ရှိနိုင်ပါတယ်။
ဟု စစ်ကိုင်းတိုင်း မုံရွာမြို့၊ ကံပြားလေးမှိုခြံမှ ကောက်ရိုးမှို စီးပွားဖြစ်စိုက်ပျိုးနေသူ ကိုသိန်းသန်းမောင်မောင်က ရှင်းပြပါတယ်။
ကောက်ရိုးမှိုစိုက်ပျိုးလိုတဲ့ တောင်သူတိုင်းဟာ မိမိဒေသ ရာသီဥတုကို သိရှိနားလည်ပြီး ရာသီအလိုက် စိုက်ပျိုးပြုစုနည်းစနစ်တွေကို နားလည်ရမယ့်အပြင် ကုန်ကြမ်းရွေးချယ်ရာမှာ ဒေသတွင်း ပေါများတဲ့ကုန်ကြမ်းကို ဦးစားပေးသင့်သလို မှိုမျိုးရွေးချယ်ရာမှာ ဒေသရာသီဥတုနဲ့ ကိုက်ညီတဲ့ မျိုးကောင်းမျိုးသန့်ရရှိဖို့လည်း လိုအပ်ပါတယ်။
လုပ်ငန်းစီမံခန့်ခွဲမှုကလည်း အရေးကြီးတယ်။ မှိုလုပ်ငန်းမို့ အဲ့ဒီလောက် မလိုဘူးမထင်ပါနဲ့။ စစိုက်ချိန်ကနေ ခူးဆွတ်ချိန်အထိ နေ့စဉ်လုပ်ငန်းစီမံခန့်ခွဲမှုတွေ လိုပါတယ်။ နောက်ထပ် ဂရုပြုသင့်တာကတော့ စျေးကွက်ပါ။ မှိုစိုက်သူအနေနဲ့ ပြည်ပစျေးကွက်ကို မျှော်လင့်မိမှာဘဲ။ အရမ်းမျှော်လင့်ထားလို့ မရပါဘူး။ အားသာချက်အနေနဲ့ကတော့ ကောက်ရိုးမှိုက ပြည်တွင်းစျေးကွက်မှာကို စျေးကွက်ကောင်းနေပါသေးတယ်။ တခြားသီးနှံတွေလို စျေးအတက်အကျလည်း သိပ်မကြမ်းပါဘူး။
ဟု ကိုသိန်းသန်းမောင်မောင်က ဆက်လက်ပြောပါတယ်။
ကောက်ရိုးမှိုစိုက်ပျိုးရေးလုပ်ငန်းဟာ ''အမှိုက်ထဲကနေ ရွှေ'' ဖြစ်ပါသော်လည်း စိုက်နည်းစနစ်နားမလည်ပဲ စိုက်ပျိုးမိပါက ''ရွှေထဲက အမှိုက်'' ဖြစ်သွားတတ်တာမို့ အထက်ပါ သိရှိလိုက်နာစရာများကိုဖတ်ရှူ့ပြီး မိမိနေထိုင်ရာ မြို့နယ်စျေးကွက်မှာ ကုန်ချိန်ဘယ်လောက် လိုအပ်နေသလဲ? ကိုယ့်ခြံကနေ ဘယ်လောက်ပမာဏထွက်နှုန်းနဲ့ ပုံမှန်စျေးကွက်တင်ပို့နိုင်မလဲ? စတာတွေ စနစ်တကျ တွက်ချက်ပါ။ မှိုထွက်နှုန်းများချိန်မှာ ဖြစ်လေ့ဖြစ်ထရှိတဲ့ စျေးကွက်အနေအထားကို ကြိုတင်လေ့လာပါ။
ဒါ့အပြင် ကောက်ရိုးမှိုစိုက်ပျိုးရေးက စွန့်ထုတ်လိုက်တဲ့ အရာများကို အခြားဥယျာဉ်၊ ခြံစိုက်ပျိုးရေးနဲ့ လယ်ယာကဏ္ဍ တွေမှာ အကျိုးရှိရှိ ပြန်လည်အသုံးချနိုင်တယ် ဆိုတဲ့ အချက်ကလေးကိုလည်း ထပ်လောင်း အသိပေးလိုက်ရပါတယ်။
မှိုစိုက်ပျိုးရင်း စီးပွားဖြစ်ထွန်းနိုင်ကြပါစေရှင်။
နန်းထက်ထက်ချစ်(ABM)
ဗွေဆော်ဦး ကြော်ငြာ
Aqua ဘူစတာ
Aqua ကယ်လဆီယမ်
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ question.title }}