မွေးမြူရေးခြံသုံး ပိုးသတ်သန့်စင်ဆေးများနှင့် ၎င်းတို့၏အစွမ်းသတ္တိများ (၂)

13/08/2022 12:30 PM တွင် သက်ခိုင် သက်ခိုင် မှ ရေးသား

မွေးမြူရေးလုပ်ငန်းများတွင် ဇီဝလုံခြုံရေး စီမံခန့်ခွဲမှုအတွက် မရှိမဖြစ်အရေးကြီးသည့် ပိုးသတ်သန့်စင်ဆေးများနှင့်ပတ်သက်၍ ၎င်းတို့၏လုပ်ငန်းလုပ်ဆောင်ပုံ၊ ရွေးချယ်ရာတွင် စဉ်းစားရမည့် အချက်များကို အပိုင်း (၁) တွင် ဖော်ပြပေးခဲ့ပြီးဖြစ်ပါသည်။

ယခု အပိုင်း(၂) တွင် ခြံသုံးပိုးသတ်သန့်စင်ဆေးအုပ်စုတစ်ခုချင်းစီ၏ ပိုးသတ်စွမ်းဆောင်နိုင်စွမ်းနှင့် အားသာချက်၊ အားနည်းချက်များကို ဆက်လက်ဖော်ပြပေးသွားပါမည်။

ခြံသုံးပိုးသတ်သန့်စင်ဆေးအုပ်စုများ

ဖီနောလစ် အုပ်စု (Phenolic) 

  • ကတ္တရာစေးမှ ထွက်ရှိလာသော ဒြပ်ပေါင်းအုပ်စု ဖြစ်ပါသည်။ 
  • ကာဘော်လစ် (Carbolic acid) အုပ်စုဟုလည်း ခေါ်ပါသည်။
  • ဘက်တီးရီးယားများကို အလျင်အမြန်ဖျက်ဆီးပစ်နိုင်စွမ်းရှိပါသည်။ Gram negative ဘက်တီးရီးယားများထက် Gram positive ဘက်တီးရီးယားများအပေါ် ပိုမိုအစွမ်းထက်စွာ ဖျက်ဆီးနိုင်ပါသည်။ 
  • လောင်စားစေတတ်သော သဘောရှိပြီး အသုံးပြုသူအတွက်လည်း အရေပြားကို ထိခိုက်စေနိုင်သည့်အတွက် အသုံးပြုရာတွင် သတိထားရန် လိုအပ်ပါသည်။
  • သြဂဲနစ်အညစ်အကြေးများရှိနေချိန်တွင်ပင် အစွမ်းပြနိုင်သော ပိုးသတ်ဆေးအုပ်စု ဖြစ်ပါသည်။
  • အသုံးပြုပြီးနောက် ဆေးကြွင်းအစွမ်းသတ္တိ (residual effect) အထိုက်အလျောက်ရှိပါသည်။ 
  • Phenol ဒြပ်ပေါင်းအမျိုးမျိုးကို ပေါင်းစပ်ထုတ်လုပ်ထားသည့် Disinfectants များအဖြစ် စျေးကွက်တွင် ဝယ်ယူရရှိနိုင်ပါသည်။

ကွာတာနရီအမိုနီယမ် အုပ်စု(Quaternary ammoniums)

  • ယင်းအုပ်စုအတွက် အထူးသတိပြုရမည့်အချက်မှာ ဆပ်ပြာနှင့် တွဲဖက်အသုံးမပြုနိုင်ခြင်း ဖြစ်သည်။
  • ပိုးမွှားအမျိုးအစား အများအပြားကို ဖျက်ဆီးနိုင်စွမ်းရှိသည့် broad-spectrum disinfectant အမျိုးအစားဖြစ်သည်။ 
  • Phenol ကဲ့သို့ လောင်စားစေခြင်း မရှိသဖြင့် စိတ်ချလက်ချအသုံးပြုနိုင်သကဲ့သို့ တိရစ္ဆာန်များရှိနေချိန်တွင်ပင် အသုံးပြုနိုင်သည့် ပိုးသတ်ဆေး  ဖြစ်သည်။ 
  • ဆေးကြွင်းသတ္တိလည်း အထိုက်အလျောက်ရှိသည့် ဆေးဖြစ်သဖြင့် မွေးမြူရေးခြံများ အားထားရသော အုပ်စုဖြစ်သည်။ 
  • ကြက်ဥဖောက်စက်များတွင် ကြက်ဥများ ဆေးကြောရန်အတွက်လည်းကောင်း၊ မွေးမြူရေးခြံများတွင် အစာခွက်၊ ရေခွက်များ ဆေးကြောရန်အတွက်လည်းကောင်း အသုံးပြုနိုင်ပါသည်။

ဖော်မယ်လ်ဒီဟိုက် အုပ်စု (Formaldehyde) 

  • ဖော်မလင်ဟု လူသိများပြီး အငွေ့ဖြင့် ပိုးသတ်သန့်စင်သည့် ပိုးသတ်ဆေး အုပ်စုဖြစ်သည်။ 
  • ပိုးအုပ်စုအများအပြားကို ဖျက်ဆီးနိုင်ပြီး စပိုးများကိုပင် သတ်ဖြတ်နိုင်သည်။ ထို့ပြင် အငွေ့ဖြင့် ပိုးသတ်ခြင်း ဖြစ်သဖြင့် ပိုးသတ်ဆေးဖြန်းရန် ခက်ခဲသောနေရာများသို့ပင် ရောက်ရှိနိုင်သည်။ 
  • အငွေ့ပျယ်သွားလျှင် ပိုးသတ်နိုင်စွမ်းလည်း ပျောက်ဆုံးသွားသည်။
  • သြဂဲနစ်အညစ်အကြေးများ ရှိနေပါက အစွမ်းမပြနိုင်ပေ။ 
  • သတိပြုရမည့်အချက်မှာ ဓာတ်ငွေ့အဖြစ် ပိုးသတ်စဉ် စနစ်မကျပါက လူကိုပါ အန္တရာယ်ဖြစ်စေနိုင်သည်။ 
  • အပူချိန်နှင့် စိုထိုင်းဆတို့က ဆေး၏အစွမ်းသတ္တိအပေါ် လွှမ်းမိုးနိုင်သည်။

ဟေလိုဂျင်အုပ်စု (Halogens)

  • ယင်းအုပ်စုတွင် Iodine နှင့် Chlorine ကဲ့သို့သော ပိုးသတ်ဆေးများ ပါဝင်သည်။ 
  • အသုံးများသည့် Halogen ပိုးသတ်ဆေးမှာ bleach ဟု လူသိများသည့် sodium hypochlorite ဖြစ်သည်။ 
  • ပိုးအတော်များများကို အလျင်အမြန် ဖျက်ဆီးနိုင်စွမ်းရှိသည်။ 
  • သြဂဲနစ်အညစ်အကြေးများ ရှိနေပါက အစွမ်းမပြနိုင်ပေ။
  • အစွမ်းသတ္တိကို ကြာရှည်လည်း မပြနိုင်ပေ။ 
  • ကောင်းမွန်သည့်အချက်မှာ တိရစ္ဆာန်များရှိနေချိန်တွင်ပင် အသုံးပြုနိုင်ခြင်းဖြစ်သည်။ 
  • သတိပြုရမည့်အချက်မှာ လောင်စားစေတတ်သော အစွမ်းရှိသဖြင့် စတီးလ်ပစ္စည်းများတွင် သံချေးများ တက်လာစေနိုင်ပါသည်။

ခရီဆောလ် အုပ်စု (Cresols)

  • ခရီဆောဟု လူသိများသည့် အုပ်စုဖြစ်ပြီး Gram negative ဗက်တီးရီးယားများကို အများဆုံး ဖျက်ဆီးပစ်နိုင်ပါသည်။ 
  • အသုံးပြုသူ၏ အရေပြားကို ထိခိုက်နိုင်သဖြင့် သတိပြုသုံးစွဲရန် လိုအပ်ပါသည်။ 
  • သြဂဲနစ်အညစ်အကြေးများကို ခံနိုင်ရည်ရှိသဖြင့် သန့်ရှင်းရေးအားနည်းထားသည့် ခြံများတွင် အသုံးပြုရန် အဆင်ပြေပါသည်။
  • ဆေးကြွင်းသတ္တိလည်းကျန်ရှိနိုင်သဖြင့် ခြံကို ပိုးသတ်သန့်စင်ရာတွင်လည်း အသုံးပြုရန် သင့်လျော်သည်။
  • တခါတရံ Phenol ဒြပ်ပေါင်းများနှင့် ပေါင်းစပ်အသုံးပြုလေ့ ရှိပါသည်။ 

အောက်ဆီဒိုက်ဇင်း အုပ်စု (Oxidizing agent)

  • မြန်မာ့မွေးမြူရေးခြံများတွင် အသုံးအများဆုံး Oxidizing agent မှာ ထုံးမှုန့်ဖြူးပေးခြင်း ဖြစ်ပါသည်။ ထုံးမှုန့် (Calcium oxide) မှာ ရေနှင့် ထိတွေ့ပါက အပူနှင့် အောက်ဆီဂျင်ကို ထွက်ပေါ်လာစေပါသည်။ ယင်းအပူက ပိုးမွှားများကို ဖျက်ဆီးပစ်ခြင်း ဖြစ်ပါသည်။ လောင်စားစေတတ်သည့်  သဘောရှိသဖြင့် ထုံးပေါက်ခြင်းကို သတိပြုရန်လိုအပ်ပါသည်။ 
  • Hydrogen peroxide မှာလည်း အသုံးများသည့် oxidizing agent တစ်မျိုးဖြစ်ပါသည်။ ၃-၅% ဖျော်ရည်အဖြစ် အသုံးပြုလေ့ ရှိပါသည်။

အပိုင်း (၁) ဖတ်ရှုလိုပါက - https://greenwaymyanmar.com/posts/Disinfectants_using_in_Animal_Farms

 

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။ 


ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...
Read more Facebook စာမျက်နှာသို့သွားရန်

ဆွေးနွေးချက်များ

ဆွေးနွေးရန်