ဘဝကို အပင်လေးတွေနဲ့ ရှင်သန်နေတဲ့ ပဒေသာဥယျာဉ်မှူး

10/06/2022 15:00 PM တွင် ဆုမြတ်နိုး ဆုမြတ်နိုး မှ ရေးသား

အသက် ၁၂ နှစ်အရွယ်ခန့်ကတည်းက အပင်လေးတွေကို ပြုစုရင်း ကြီးပြင်းလာတဲ့အမျိုးသမီးငယ်လေးတစ်ယောက်ဟာ အခုဆို အသက် ၆၅ နှစ်ကျော်လာပါပြီ။ အခုထိလည်း အပင်လေးတွေကိုပြုစုရင်း၊ ဒီအပင်လေးတွေကနေ ရတဲ့ဝင်ငွေတွေနဲ့ပဲ ဘဝကိုရှင်သန်ရင်း ရပ်တည်နေဆဲပါပဲ..။ 

သူဆိုတာကတော့ ပဒေသာ ပျိုးဥယျာဉ်ရဲ့ ပိုင်ရှင်ဥယျာဉ်မှူး အန်တီဒေါ်တင်တင်သိန်းပါ..။ 

အန်တီဒေါ်တင်တင်သိန်းတို့က မိဘတွေလက်ထက်ကတည်းက ဒီပျိုးဥယျာဉ်အလုပ်နဲ့ရှင်သန်ရပ်တည်လာသူတွေပါ။ ဒီ့အတွက် အန်တီဟာလည်း ငယ်စဉ်ကတည်းက အပင်တွေအကြောင်း နားလည်သိကျွမ်းခဲ့ပြီး စီးပွားရေး တစ်ခုအနေနဲ့ လုပ်ကိုင်ခဲ့တာပါ။

“ တီတီက ၁၂ နှစ်သမီးတည်းက အပင်လေးတွေနဲ့ ရင်းနှီးကျွမ်းဝင်ခဲ့တာ။ မယ်တော်ကြီးဂမုန်းကို ထိုင်းနိုင်ငံကို တင်သွင်းတဲ့ အလုပ်လုပ်ခဲ့တယ်။ အန်တီတို့ငယ်ငယ်တုန်းက အောင်ဇေယျ သင်္ဘောကြီးနဲ့ ယိုးဒယားကို မယ်တော်ကြီး ဂမုန်းတွေတင်သွင်းတဲ့ အလုပ်လုပ်ခဲ့တာပေါ့” လို့ အန်တီက သူ့ရဲ့ ငယ်ဘဝအကြောင်းကို ပြောပြပါတယ်။

နောက်ပိုင်းမှာတော့ အကြောင်းအမျိုးမျိုးကြောင့် ဒီမယ်တော်ကြီးဂမုန်းတင်ပို့တာကို အန်တီ မလုပ်ဖြစ်တော့ပါဘူး။

အန်တီဟာ သူ့အပင်လေးတွေကို တော်တော်တန်ဖိုးထားပါတယ်။ ရေပေးတာ၊ အပူချိန်ထိန်းတာတွေကအစ စနစ်တကျလုပ်ထားတာ တွေ့ရပါတယ်။ အပင်တွေကထွက်သမျှ၊ မီးဖိုချောင်ကထွက်သမျှတွေကို အပင်အာဟာရတွေအဖြစ် ကိုယ်တိုင်ပြုလုပ်ပြီး အပင်လေးတွေကို ပြန်ကျွေးတာမျိုးလုပ်နေတယ်လို့ ရှင်းပြပါတယ်။

“ တီတီက သဘာဝနည်းနဲ့ပဲ မြေစပ်ပြီးအပင်လေးတွေကိုပျိုးတာ။ သဲကြမ်း၊ ဖွဲပြာ၊ အုန်းဆံမှုန့်၊ မြေကြီး၊ နွားချေးတို့ကိုရောပြီးမြေဩဇာအနေနဲ့သုံးတယ်။ စဉ့်အိုးထဲမှာ တီတီက ဒီခြံထဲကထွက်တဲ့ သစ်ရွက်ရော၊ အသီးအနှံစုံရော၊ မီးဖိုချောင်ကထွက်တဲ့ စွန့်ပစ်ပစ္စည်းတွေရော အကုန်ထည့်တယ်။ ခွေးမွေးထားတဲ့အတွက် အမဲသားဆေးရည်၊ ဆန်ဆေးရည်၊ ကြက်သွန်ခွံ၊ အချိုမှုန့်၊ သကြား၊ ငပိရည်၊ ဘီယာဖတ်၊ နှမ်းဖတ် အကုန်ထည့်တယ်။ နှစ်ပတ်ကြာတဲ့အခါ အရွက်တွေကို နုတ်နုတ်စင်းပြီး စပ်မြေထဲမှာ စဉ်းအိုးထဲကအရည်တွေပါထည့်စပ်တယ်။ ပန်းအိုးထဲမှာတော့ မီးတောင်ကျောက်တို့ မော့ကျောက်လိုမျိုးတို့ ထည့်ထားတယ်”

ပိုးတွေ၊ ရောဂါတွေနဲ့ပတ်သက်လို့ သူထိန်းသိမ်းတဲ့အနေအထားတွေကိုလည်း အန်တီက အခုလို ရှင်းပြပါတယ်။

“ ပန်းပင်လေးတွေကို  မှိုဆေး၊ ပိုးသတ်ဆေးတွေ တစ်လှည့်စီပေးတယ်။ ပိုးသတ်ဆေးကတော့ ဆေးတစ်ထုပ်ကို ကန်ထဲထည့်ပြီး ရေနဲ့ ဖျန်းပေးတာပါ။ မိုးတွင်းဘက်လောက်ပဲ ဖျန်းဖြစ်တာ။ ကျန်တဲ့ အချိန်တွေတော့ သိပ်မလောင်းဘူး” 

အန်တီ့ရဲ့ ပဒေသာခြံထဲက အိမ်တွင်းစိုက်အပင်လေးတွေရဲ့တန်ဖိုးတွေကတော့ မြင့်ပါတယ်။ ဈေးနှုန်းတွေကိုမေးကြည့်တော့ အမျိုးအစားအလိုက် သောင်းဂဏန်းကနေ သိန်းရာချီအထိရှိနေတယ်လို့ ဆိုပါတယ်။

ဒီအပင်တွေအတွက် ဝယ်လက်ကလည်း သူ့အလွှာနဲ့သူရှိနေတာပါပဲ။ ရုပ်ရှင်မင်းသား၊ မင်းသမီးတွေကစလို့ ငွေကြေးတတ်နိုင်တဲ့အပင်ချစ်သူတွေက ဈေးနှုန်းထက် သူတို့တန်ဖိုးထားမှုအပေါ် မူတည်ပြီး ဝယ်ယူတာတွေ ပြုလုပ်ကြပါတယ်တဲ့..။ 

ရန်ကုန်မြို့၊ ပုလဲမြို့သစ်မှာရှိနေတဲ့ အန်တီ့ရဲ့ ပျိုးဥယျာဉ်ကြီးကလည်း အတော်လေးကျယ်ပြီး ၂ ဧကလောက်ကို ရှိတာပါ။ အပင်ချစ်သူတွေကို ဈေးသက်သက်သာသာနဲ့ ပြန်ရောင်းပေးချင်လို့ ဒီခြံလေးကို ဖန်တီးဖြစ်ခဲ့တာလို့ အန်တီက ဆိုပါတယ်။

“ တီတီက ယိုးဒယားကနေ ပန်းပင်တွေကို ဈေးကြီးကြီးနဲ့ ပေးဝယ်၊ ပြန်ပွားပြီး ကိုယ့်လိုပဲ အပင်လေးတွေကိုမြတ်နိုးတဲ့ သူတွေကို ဈေးသက်သက်သာသာနဲ့ ပြန်ရောင်းပေးချင်တာ” 

အပင်တွေကို အရမ်းချစ်မြတ်နိုးတဲ့ အန်တီကတော့ အခုလို အပင်တွေနဲ့ရှင်သန်နေရတဲ့ သူ့ဘဝကို ကြိုက်နှစ်သက်နေပါတယ်..။ နောက်ဘဝ လူဖြစ်ရင်တောင် သစ်ပင်လေးတွေပဲ စိုက်ချင်တယ်တဲ့..။ 

“ တီတီဒီဘဝမှာ လူဖြစ်ကျိုးနပ်တယ်။ ကိုယ်စိုက်ချင်တဲ့ ဝါသနာပါတဲ့ အပင်လေးတွေစိုက်နေရတာ တီတီပျော်တယ်။ တီတီ့ မိတ်ဆွေ တွေကတောင် ‘စ’ ကြတယ်။ သေရင် ရုက္ခစိုးဖြစ်မယ်လို့။ နောင်ဘဝလူပြန်ဖြစ်ရင် သစ်ပင်လေးတွေပဲ စိုက်ချင်တယ်” 

“တီတီက ဓာတုမြေဩဇာ သိပ်မကျွေးဘူး။ ဖေ့စ်ဘုတ်ပေါ်ကပြောကြတဲ့ သဘာဝနည်းတွေနဲ့ အကုန်ရောပြီး မြေဩဇာပေးတာ။ အပင်လေးတွေကိုတော့ သေချာဂရုစိုက်ကြည့်နေတာ။ နေကျတဲ့ဘက်က အပင်တွေကို အကုန်လိုက်ရွှေ့နေတာ၊ နေအထိမခံဘူး။ နည်းနည်းတော့ အလုပ်ရှုပ်ပေမယ့် အန်တီကချစ်တာကိုး”

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။


S&Z International Co., Ltd ကြော်ငြာ
မြေကောင်း အမြစ်သန် ပင်သီးပွင့်ဝေ "ဟူးမစ်ကေ" See More စိုက်ပျိုးမြေတွေက တစ်နှစ်ထက်တစ်နှစ် အဆီအနှစ်တွေခမ်း‌ ခြောက်လာနေလို့ စိတ်ညစ်နေကြပြီလား.. ? မြေဩဇာတွေ ပေါပေါမသုံးနိုင်တော့ အထွက်တွေ မတက်လို့ ခက်နေပြီလား.. ? အဲ့ဒါတွေအားလုံးကို "ဟူးမစ် ကေ" ကို သုံးပေးလိုက်ရုံနဲ့ ဖြေရှင်းနိုင်ပါတယ် ခင်ဗျာ .. "ဟူးမစ်-ကေ"မှာ "ဟူးမစ်အက်စစ်- ၇၀ % ၊ ဖူးဗစ်အက်စစ် -၆-၁၅ % နဲ့ ပိုတက်ဆီယမ် -၁၀-၁၅%" ပါဝင်ပါတယ်..။ အဲ့ဒါတွေက ဘာတွေကောင်းစေတာလဲဆိုတော့… အဲ့ဒီဓာတ်တွေက နှစ်စဉ်ဆုံးရှုံးသွားတဲ့ မြေဆီမြေနှစ်တွေကို ပြန်လည်အားဖြည့်ပေးပြီး မြေဩဇာကို ရေရှည် အကျိုးပြု ထက်သန်စေတာပါပဲ.. မြေကိုဘယ်လိုအားဖြည့်ပေးတာလဲဆိုတော့ "ဟူးမစ်-ကေ" ကို ထည့်ပေးလိုက်တာနဲ့.. မြေသားဖွဲ့စည်းမှုကို ထိန်းညှိကောင်းမွန်စေတာ၊ မြေစေးတာ ဖွယ်တာတွေကို ထိန်းညှိပေးတာ၊ မြေဆီလွှာ အတွင်းက အကျိုးပြုအဏုဇီဝပိုးတွေကို ပွားများရှင်သန်စေတာ၊ မြေဆီလွှာအတွင်း အာဟာရဓာတ်တွေရဲ့ ဖလှယ်နိုင်မှုကို တိုးတက်ကောင်းမွန်စေတာ မြေချဉ်ငံဓါတ်ကိုလဲထိန်းညှိမျှတစေတာ နဲ့မြေဆီလွှာအတွင်း လေဝင်လေထွက် မျှတစေပြီး အစိုဓာတ်ထိန်းသိမ်းမှုကို မျှတစေတာ စတဲ့အကျိုးကျေးဇူးတွေ အများကြီး ရစေတာမို့ပါပဲ... သူ့ချည်းသာလော.. ဆိုရင်တော့ ပိုသေးသဗျ .. သီးနှံပင်တွေကို အမြစ်အားကောင်းစေပြီး အပင်သန်မာကြီးထွားစေ အထွက်နှုန်းတိုးစေတာလေးပါ အဆစ်ပါသေးဆိုတော့.. ကဲ..တောင်သူဦးကြီးတို့ရဲ့ ပျက်စီးနေတဲ့မြေဆီလွှာတွေကို "ဟူးမစ်-ကေ" နဲ့ အထူးဖြစ်နေအောင် ပြုပြင်လိုက်ကြ ပါစို့ဗျာ.. "ဟူးမစ်-ကေ" ကို သူ့ချည်းသက်သက်မသုံးဘဲ ပုလဲ၊ တီစူပါ၊ ပိုတက်အပြင် တခြား ကွန်ပေါင်းဓာတ်မြေဩဇာတွေနဲ့ လူးနယ်ကြဲပက်အသုံးပြုမယ်ဆိုရင်လည်း ဓါမြေဩဇာများအားလေလွင့်ဆုံးရှုံးမှုမှ ကာကွယ်ပေးပြီး ပိုမိုထူးခြားကောင်းမွန်တဲ့ အကျိုးအာနိသင်ကို ရရှိစေနိုင်မှာဖြစ်ပါတယ်ဗျာ..။ ဪ တစ်ခုကျန်သေးသဗျ ရေပျော်စွမ်းအား ၉၉.၉ % ရှိပြီး ရွက်ဖျန်းအားဆေး များဖြင့်လည်းရာစပ်ပက်ဖျန်း ပင်သီးပွင့် ဝေ စေဖို့ အသုံးပြုနိုင် ပါတယ် ခင်ဗျာ။ အသေးစိတ်သိရှိလိုပါက ဆက်သွယ်ရန်- S & Z International Co.,ltd အမှတ်(၁၆)၊ပျဥ်းကတိုးလမ်း၊(၃၄) ရပ်ကွက်၊ဒဂုံမြို့သစ်မြောက်ပိုင်း၊ရန်ကုန် Ph No-09797944994
Read more S&Z facebook စာမျက်နှာသို့သွားရန်

ဆွေးနွေးချက်များ

ဆွေးနွေးရန်