အစိမ်းရောင်လမ်း၂၀၁၇-၁၈ ဘဏ္ဍာနှစ် ကြံသီးနှံ ရာသီအတွက် နိုဝင်ဘာလမှစ၍ သကြားစက်များ စတင်ဖွင့်လှစ် မည်ဖြစ်ပြီး ကြံတစ်တန်လျှင်အနည်းဆုံး ကျပ် ၄၂ဝဝဝ မှ ကျပ် ၆၅ဝဝဝ အထိ ဈေးကောင်းပေး ဝယ်ယူမည်ဖြစ်ကြောင်း မြန်မာနိုင်ငံ၊ သကြား၊ ကြံလုပ်ငန်းရှင်များအသင်းမှ သိရသည်။ ၎င်းအသင်း ဒုတိယဥက္ကဋ္ဌ ဦးဝင်းဌေးက “နိုဝင်ဘာလတော့ စဖွင့်မယ်။ တချို့စက်တွေကတော့မဖွင့်နိုင်သေးတာလည်း ရှိမယ်။ ပျဉ်းမနား၊ ဒဟတ်ကုန်းနဲ့ ရေတာရှည်မှာတော့ စက်ဖွင့်ဖို့ အချင်းချင်း ညှိနှိုင်းပြီးတော့ ဖွင့်ဖြစ်လိမ့်မယ်။ ဥက္ကံနဲ့ နဝဒေးဘက်မှာ ဆိုရင်တော့ တစ်တန်ကို ကျပ် ၄၅ဝဝဝ နဲ့ဝယ်မယ်။ မူဆယ်မှာရှိတဲ့ နန်းအွန် စက်ရုံမှာတော့တရုတ်ဘက်ကို ပို့လို့ တစ်တန်ကို ကျပ် ၆၅ဝဝဝ နဲ့ဝယ်မှာဖြစ်ပါတယ်။ ဂရိတ်ဝေါ စက်ရုံကတော့ သကြားဈေး အလိုက်ပေး ဝယ်မယ်။ သကြား တစ်ပိဿာ ကျပ် ၅၀ တက်တိုင်း ကြံဈေးကို တိုးမြှင့်ပေးဝယ်သွားမှာ ဖြစ်ပါတယ်”ဟု ပြောသည်။ ယခင်ဘဏ္ဍာနှစ်က ကြံတစ်တန်လျှင် အနည်းဆုံး ၅၀ဝဝဝ ကျပ် ရရှိခဲ့ခြင်းကြောင့် ကြံစိုက်ဧက တိုးတက်လာကြောင်း၊လက်ရှိတွင် ပဲစိုက်ပျိုးတောင်သူများမှ ကြံသီးနှံ စိုက်ရန် လိုလားနေကြပြီး အလားအလာ အနေဖြင့်လည်း ကြံစိုက်ဧက တိုးတက်လာနိုင်သည်ဖြစ်၍ ကြံကြိတ်စက်များကို အဆင့်မြှင့်တင်ခြင်း၊ ကြံ့ခိုင်စေရန် ပြုပြင်ထိန်းသိမ်းခြင်းများ ပြုလုပ်ထားသင့်ကြောင်း ၎င်းက ပြောသည်။
“လက်ရှိ ပြည်တွင်းမှာ သကြားတွေ ပုံနေပါတယ်။ ပြန်လည် တင်ပို့ကုန် စနစ်နဲ့ သကြား တင်ပို့ခွင့်ပိတ်လိုက်ပေမယ့် တခြားလိုင်စင်နဲ့ သကြား တင်သွင်းခွင့်တွေ ရှိသေးတယ်။ လုပ်ငန်းလိုင်စင်နဲ့ ဥပမာ-ကော်ဖီမစ်တွေ သုံးဖို့ သကြားတင်သွင်းခွင့် ပေးထားတာတွေ ရှိနေသေးတယ်။ ကြံသီးနှံစိုက်မယ် ဆိုရင်တော့ စိုက်ချင်တိုင်းတော့ စိုက်လို့မရပါဘူး။ အနီးအနားမှာ စက်ရုံတွေရှိရမယ်။ နောက်တောင်သူတွေ အနေနဲ့ ကြံသကာကို ကိုယ်တိုင်ချက် လုပ်တတ်ရင် ပိုအဆင်ပြေနိုင်တယ်။ ကြံသကာ ဈေးကွက်က တရုတ်ဘက် ပို့ရင် ဘာအခွန်အခမှ မပေးရဘူး”ဟု ၎င်းက ပြောသည်။ လက်ရှိတွင်မြန်မာနိုင်ငံတွင် ကြံစိုက်ဧကပေါင်းငါးသိန်း ဝန်းကျင်ရှိနေပြီး ကြံတစ်ဧကလျှင် တန် ၂၀ ထွက်ရှိကြောင်း၊ ကြံစိုက် တောင်သူများ အနေဖြင့် စက်သွင်းကြံ ဈေးမကောင်းပါက ကြံသကာချက် ဈေးကွက်တွင် တရုတ်နှင့်ဂျပန် ဝယ်လိုအားရှိနေခြင်းကြောင့် ဈေးကွက်ပျောက်မည်ကို စိုးရိမ်ရန်မလိုကြောင်း သိရသည်။ ၂၀၁၇-၁၈ဘဏ္ဍာနှစ် ကြံရာသီ ကြိတ်ဝါးမှု လျာထားချက်အခြေအနေမှာ ကြိတ်ဝါးတန် ၈၀ဝဝဝ၊သကြား ထွက်ရှိမှု ၈၄၀ဝ တန်၊ ရာခိုင်နှုန်းအားဖြင့် ၁၀ ဒသမ ၅ ဖြစ်ကြောင်း၊ တင်လဲထွက်ရှိမှု တန် ၃၂၀ဝ၊ ရာခိုင်နှုန်းအားဖြင့်လေးရာခိုင်နှုန်း ရရှိထားကြောင်း သိရသည်။
စက်တင်ဘာလ ၁၂ ရက်နေ့ နေပြည်တော်တွင် ပြုလုပ်ခဲ့သည့် ကြံသီးနှံသတ်မှတ်ရေးအစည်းအဝေးတွင် မြန်မာနိုင်ငံ၊ သကြား၊ကြံလုပ်ငန်းရှင်များ အသင်းမှ ကနဦး တင်ပြဆွေးနွေးချက်များအရ စက်ပိတ်ရက်ကို ဧပြီလအထိလည်းကောင်း၊ ကြိတ်ဝါးရက်အတွက် ၉၅ ရက် သတ်မှတ်ခဲ့ကြောင်း သိရသည်။ နေပြည်တော်၊ ပျဉ်းမနားရှိ ကြံစိုက်တောင်သူ ဦးလင်းကိုက”တောင်သူတွေဘက်ကတော့ သကြားပေါက်ဈေးအတိုင်း ဈေးပေးတာထက် သတ်မှတ်ဈေးနဲ့အညီ ပေးတာကို ပိုကြိုက်ပါတယ်။ စက်စဖွင့်ရက်ကိုလည်း နောက်မကျစေချင်ဘူး။ နောက်ဈေးလည်း အရင်နှစ်ထက်ပိုကောင်းဖို့ဘဲ မျှော်လင့်ပါတယ်” ဟု ပြောသည်။
၂၀၁၃-၁၄ဘဏ္ဍာနှစ်တွင် မူဆယ်နမ်းအွန် ကြံစက်မှ ကြိတ်ဝါးတန် ၁၈ဝဝဝ တန်၊ သကြား ထွက်ရှိမှု ၁၆၂၀ တန်၊ ရာခိုင်နှုန်းအားဖြင့်ကိုးရာခိုင်နှုန်း၊ တင်လဲရည်ထွက်ရှိမှု ၈၄၉ ဒသမ ၆ တန်၊ ၄ ဒသမ ၇၂ ရာခိုင်နှုန်း၊ ၂၀၁၄-၁၅ ဘဏ္ဍာနှစ်တွင် ကြိတ်ဝါးတန် ၅၈ဝဝဝ ၊ သကြားထွက်ရှိမှု ၅၈၀ဝတန်၊ ၁၀ ရာခိုင်နှုန်း၊ တင်လဲရည်ထွက်ရှိမှု ၂၅၅၂ တန်၊ ၄ ဒသမ ၄ ရာခိုင်နှုန်း၊ ၂၀၁၅-၁၆ ဘဏ္ဍာနှစ်တွင် ကြိတ်ဝါးတန် ၆၉၄၀ဝ၊ သကြားထွက်ရှိမှု ၆၉၄၅ တန်၊ ၁၀ ဒသမ ၁၂ ရာခိုင်နှုန်း၊ တင်လဲရည် ၂၉၄၀ တန်၊ ၄ ဒသမ ၁၂ ရာခိုင်နှုန်း၊ ၂၀၁၆-၁၇ ဘဏ္ဍာနှစ်တွင် ကြိတ်ဝါးတန် ၆၁၇၁၀၊ သကြား ထွက်ရှိမှု ၅၈၈၇ ဒသမ ၁၃၄တန်၊ တင်လဲရည်ထွက်ရှိမှု ၂၅၄၂ ဒသမ ၄၅၂ တန်၊ ၄ ဒသမ ၁၂ ရာခိုင်နှုန်း ရှိခဲ့ကြောင်း သိရသည်။
- နီနီအောင်
မြန်မာတောင်သူကြီးများ ဂျာနယ်
အတွဲ(၁၈) အမှတ်(၂၆၈)၊ စက်တင်ဘာ ၁၈ - ၂၄၊ ၂၀၁၇ ခုနှစ်
မာလာမြိုင် ကုမ္ပဏီ ကြော်ငြာ
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ question.title }}