ကြက်သား အရိုးမပါ အသားသီးသန့်မှာ ကျပ် ၃၀,၀၀၀ အထက်ရှိနေ

ပြည်တွင်းအသားငါးဈေးကွက်တွင် ကြက်သားဈေး တက်လာနေပြီး ငါးကြင်း၊ ဝက်သားနှင့် အမဲသားတို့မှာ ဈေးငြိမ်နေကြောင်း ဈေးကွက်အတွင်းမှ သိရသည်။

ကြက်သားတစ်ပိဿာလျှင် အရိုးမပါ အသားသီးသန့်မှာ ကျပ် ၃၀,၀၀၀ နှင့် အထက်ရှိနေပြီး၊ ပေါင်လုံး ကျပ် ၂၃,၀၀၀၊ အတောင်ပံ ကျပ် ၂၀,၀၀၀၊ ကြက်ခြေထောက် ကျပ် ၁၅,၀၀၀ နှင့် အရိုးအစုံ အရောအနှောမှာ ကျပ် ၁၄,၀၀၀ ခန့် ရှိလာကြောင်း သိရသည်။

ငါးကြင်းမှာ တစ်ပိဿာလျှင် ကျပ် ၂၆,၀၀၀ ဝန်းကျင်ရှိနေပြီး၊ အမဲသားမှာ ကျပ် ၃၃,၀၀၀ မှ ၃၅,၀၀၀ အထိ၊ ဝက်သားမှာ အသားအမျိုးအစားအလိုက် တစ်ပိဿာလျှင် ကျပ် ၃၀,၀၀၀ မှ ၄၀,၀၀၀ အထိ ရှိနေကြောင်း သိရသည်။

"ကြက်သားက တက်လိုက်ကျလိုက်နဲ့ ဈေးက မမှန်ဘူး။ အခုဆိုရင် ရင်ညွန့်ရိုးပါကို ၂၆,၀၀၀ ရောင်းရတယ်။ ကြက်သားက လူအများစားတာဆိုတော့ ရောင်းအားကတော့ ပုံမှန်ရှိပါတယ်။ ငါးကြင်းကတော့ ဗိုက်သားအဆီနဲ့ အသားအရောကို ၂၆,၀၀၀ ပေါ့။ အသားသီးသန့်ဆိုရင်တော့ ဈေးပိုပါတယ်" ဟု အသားငါးရောင်းချသူတစ်ဦးက ပြောသည်။

လက်ရှိတွင် အခြေခံလူတန်းစားများအနေဖြင့် အလုပ်အကိုင် အခွင့်အလမ်းနည်းပါးပြီး လုပ်ခလစာ ရရှိမှုမှာလည်း နည်းပါးနေသောကြောင့် နေ့စဉ်စားဝတ်နေရေးအတွက် ရုန်းကန်နေကြရသည်။ ထို့ကြောင့် အသားဟင်းကို နေ့စဉ် ဝယ်ယူချက်ပြုတ်စားသောက်ရန် ခဲယဉ်းနေကြောင်း သိရသည်။

ထိုအချက်များကြောင့် ပြည်တွင်းအသားငါးဈေးကွက်တွင် အသားငါးများ ဝယ်လိုအား (ရောင်းအား) လျော့ကျနေသည့် အခြေအနေရှိကြောင်း သိရသည်။

"အရင်လို မစားနိုင်တော့ဘူး။ အရင်က တစ်ရက် ၂၀ သား ချက်ရင် အခုဆို ၁၀ သားကိုပဲ ညရော မနက်ရော လောက်အောင် စားရတာပေါ့။ တချို့ဆို အသားဟင်းတောင် နပ်မမှန်ဘူး။ အသားငါးဈေးတွေကလည်း ၁၀ သားကို ၆၀၀ လောက်ကနေ တက်လာလိုက်တာ အခုဆို မေးလိုက်ရင် ၁၀ သားကို ၂,၀၀၀ အထက်တွေချည်းပဲ" ဟု စားသုံးသူတစ်ဦးက ပြောသည်။

ကြက်သားဈေး တက်ရသည့် အဓိကအကြောင်းရင်းမှာ ဈေးကွက်အတွင်း ကြက်အဝင်နည်းလာသောကြောင့်ဖြစ်ကြောင်း သိရသည်။ဝက်သားနှင့် အမဲသားမှာ ဈေးနှုန်းငြိမ်နေသည်ဆိုသော်လည်း အမြင့်ဈေးတန်းတွင် ရှိနေခြင်း၊ လူမျိုးဘာသာအလိုက် စားသုံးမှု ကန့်သတ်ချက်ရှိခြင်းနှင့် ဈေးနှုန်းကြီးမြင့်ခြင်းတို့ကြောင့် ဝယ်ယူစားသုံးမှု နည်းပါးနေခြင်းဖြစ်ကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။