ကြက်အရှင်ဖမ်းစျေး တစ်ပိဿာကို ၅,၀၀၀ နီးပါး ဈေးပြန်ကျ

စျေးနှုန်းဆက်တိုက်မြင့်တက်ခဲ့သော အသားတိုးကြက်အရှင်ဖမ်းစျေးကွက်သည် ယခု နိုဝင်ဘာလ တတိယပတ်မှစပြီး ဈေးပြန်ကျသွားကြောင်း မွေးမြူရေးနှင့် ကြက်သားပေါက် ရောင်းဝယ်ရေး လုပ်ကိုင်သူများဆီက သိရသည်။

အသားစျေးကွက်ထဲကို အသားတိုးကြက် ဝင်ရောက်မှု ပြန်များလာသည့်အတွက် ကြက်အရှင်ဖမ်းစျေး ပြန်လည်ကျဆင်းသွားခြင်းဖြစ်ကြောင်း သိရသည်။

ကြက်အရှင်စျေးနှုန်းမှာ နယ်မြေဒေသအလိုက် တစ်ပိဿာကို ၃,၀၀၀ ကျပ်မှ ၅,၀၀၀ ကျပ်လောက်အထိ ဈေးပြန်ကျသွားခြင်းဖြစ်သည်ဟု စျေးကွက်အရ သိရသည်။

"ကြက်ကြီးတွေ စျေးကွက် ပြန်ဝင်တာများလာလို့ ဈေးပြန်ကျသွားတာပါ။ ကြက်တွေငယ်စဉ်မှာ ရောဂါတွေဝင်လို့ သေတာတွေ ရှိနေရင်းပဲ ကျန်တဲ့ကြက်တွေက ကြီးလာပြီး စျေးကွက်ထဲ ထုတ်ကြတော့ အဝင်ပြန်များလာတာပါ" ဟု ကြက်ပေါက်နှင့် မွေးမြူရေးအစာ ရောင်းဝယ်ရေး လုပ်ကိုင်သူ တစ်ဦးက ပြောသည်။

အသားတိုးကြက် အရှင်စျေးနှုန်းသည် ယခင် အောက်တိုဘာလမှစ၍ နိုဝင်ဘာလ ဒုတိယပတ်လောက်အထိ ဈေးဆက်တိုက် မြင့်တက်ခဲ့ပြီးနောက် ယခုလက်ရှိမှာတော့ ဈေးပြန်ကျဆင်းသွားခြင်းဖြစ်သည်။

စျေးကွက်ထဲကို ကြက်ကြီးဝင်ရောက်မှုများပြီး ဈေးပြန်ကျသွားသည့်အတွက် မွေးမြူရေးလုပ်ကိုင်သူများမှာ တွက်ချေမကိုက်ကြောင်း၊ ယခုအထိ ကြက်ခြံတွေမှာ ရောဂါပိုးဝင်ရောက်မှုရှိနေပြီး ကြက်ငယ်သေဆုံးမှုများနေဆဲဖြစ်လို့ ကြက်ကြီးအရှင်ဖမ်းစျေး ကျဆင်းတာ မွေးမြူသူတွေအတွက် အဆင်မပြေခဲ့ကြောင်း မွေးမြူရေး လုပ်ကိုင်သူများက ပြောသည်။

"ကြက်ခြံတွေမှာ ရောဂါပိုးဝင်နေတော့ အချိန်မီ မကုသနိုင်ရင် သေတယ်။ တချို့ဆို ခြံလိုက် ပြုတ်တာရှိတယ်။ ဒါပေမဲ့ အခုကြက်ခြံဖမ်းစျေးက ပြန်ကျသွားတော့ အဆင်မပြေတော့ဘူး" ဟု ကြက်မွေးမြူရေး လုပ်ကိုင်သူတစ်ဦးက ပြောသည်။

လက်ရှိ အသားတိုးကြက် မွေးမြူရေးခြံများတွင် ကြက်များ ရောဂါဖြစ်ပွားမှုရှိပြီး ကြက်ပေါက်ရက်သားကာလမှာပင် သေဆုံးမှု ရှိနေဆဲဖြစ်သည်ဟု သိရသည်။ ကြက်အရှင်စျေးနှုန်းကတော့ နေရာဒေသအလိုက် စျေးနှုန်းကွာခြားမှုရှိနေပြီး လက်ရှိ အမြင့်ဆုံးစျေးနှုန်းကတော့ တစ်ပိဿာကို ၁၅,၅၀၀ ကျပ်ဝန်းကျင်သာ ဖြစ်သည်ဟု သိရသည်။

ကြက်အရှင် ဈေးနှုန်းသည် စစ်ကိုင်းစျေးကွက်မှာ အောက်တိုဘာလ ပထမပတ်က တစ်ပိဿာကို ၁၃,၅၀၀ ကျပ်သာ ရှိခဲ့ပြီး နိုဝင်ဘာလ ၁၁ ရက်တွင် အမြင့်ဆုံး တစ်ပိဿာကို ၁၉,၅၀၀ ကျပ်အထိရှိကာ လက်ရှိ နိုဝင်ဘာ ၂၄ ရက်မှာတော့ အမြင့်ဆုံးစျေးနှုန်း တစ်ပိဿာကို ၁၅,၅၀၀ ကျပ်အထိ ပြန်ကျသွားခြင်းဖြစ်သည်။ မန္တလေးစျေးကွက်မှာတော့ ကြက်အရှင်ဖမ်းစျေး ၁၄,၀၀၀ ကျပ်ဝန်းကျင်ရှိပြီး မော်လမြိုင်မှာ ၁၂,၇၀၀ ကျပ်၊ ဘားအံမှာ ၁၃,၀၀၀ ကျပ်၊ သထုံနှင့် ကျိုက်ထိုမှာ ၁၃,၁၀၀ ကနေ ၁၃,၂၀၀ ကျပ်ရှိပြီး ကျောက်ဆည်မှာ ၁၄,၀၀၀ ကျပ်၊ မိတ္တီလာမှာလည်း ၁၄,၀၀၀ ကျပ်ဝန်းကျင်သာ ဈေးရှိသည်ဟု သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...