စပါးစိုက်ခင်းရှိ မြက်အမျိုးအစားပေါင်းကို ထိရောက်စွာကာကွယ်နှိမ်နင်းနည်း

စပါးစိုက်ခင်းများတွင် ပေါင်းပင်များသည် အဓိကပြဿနာတစ်ခုဖြစ်ပြီး အထွက်နှုန်းကို များစွာထိခိုက်စေနိုင်ပါသည်။ မြက်၊ မုံညှင်း၊ ရွက်ပြန့်ဟူ၍ ပေါင်းအမျိုးအစားအုပ်စုသုံးခုရှိသည့်အနက် မြက်အမျိုးအစားသည် ပို၍ကာကွယ်နှိမ်နင်းရန် ခက်ခဲကြောင်း သိရှိရပါသည်။

အဆိုပါ ပြဿနာကို ဖြေရှင်းရန်အတွက် တိုက်ရိုက်ကာကွယ်နှိမ်နင်းနည်းတစ်မျိုးဖြစ်သော ပေါင်းသတ်ဆေးအသုံးပြုနှိမ်နင်းခြင်းသည် အရေးပါသော နည်းလမ်းတစ်ခုဖြစ်ပါသည်။

ပေါင်းသတ်ဆေးများကို ထိရောက်စွာ အသုံးပြုနိုင်ရန်အတွက် မှန်ကန်သော ဆေးအမျိုးအစားရွေးချယ်မှုနှင့် အသုံးပြုခြင်းဆိုင်ရာ သိရှိသင့်သည်များကို ဖော်ပြလိုပါသည်။

မြက်အမျိုးအစားပေါင်းအတွက် အကောင်းဆုံးပေါင်းသတ်ဆေးများ

Butachlor (ဘူတာကလို)- နှစ်စဉ်ပေါက်ရောက်သော မြက်များနှင့် အချို့သော ရွက်ပြန့်ပေါင်းများကို ထိရောက်စွာ နှိမ်နင်းနိုင်သော အပင်မပေါက်မီ အသုံးပြုရသည့် ပေါင်းသတ်ဆေးဖြစ်ပါသည်။
Pretilachlor (ပရက်တီလာကလို)- ဤပေါင်းသတ်ဆေးသည်လည်း အပင်မပေါက်မီ အသုံးပြုရသော ဆေးအမျိုးအစားဖြစ်ပြီး ပိုမိုထိရောက်မှုရှိစေရန် Fenclorim (ဖန်ကလိုရင်း) နှင့် ရောစပ်အသုံးပြုလေ့ရှိပါသည်။
Fenoxaprop-P-ethyl (ဖီနိုဆာပရော့ပ်-ပီ-အီသိုင်း)- မြက်အမျိုးအစားပေါင်းများကို ထိရောက်စွာ နှိမ်နင်းနိုင်သော အပင်ပေါက်ပြီးမှ အသုံးပြုရသည့် ပေါင်းသတ်ဆေး ဖြစ်ပါသည်။
Sethoxydim (စက်သိုဇီဒင်)- ဤဆေးသည် သီးနှံမျိုးစုံတွင် ပေါက်ရောက်သော မြက်အမျိုးအစားပေါင်းများကို နှိမ်နင်းရန်အတွက် ရွေးချယ်အသုံးပြုနိုင်သော ပေါင်းသတ်ဆေးဖြစ်ပါသည်။
Cyhalofop-butyl (ဆိုင်ဟာလိုဖော့ပ်-ဘူတိုင်း)- မြက်အမျိုးအစားပေါင်းများကို နှိမ်နင်းရန်အတွက် အပင်ပေါက်ပြီးမှ အသုံးပြုရသည့် ပေါင်းသတ်ဆေးဖြစ်ပါသည်။

ယခုဖော်ပြသော ပေါင်းသတ်ဆေးအမည်များသည် မူရင်းဓာတုပစ္စည်းအမည်များသာ ဖြစ်ပါသည်။ ဈေးကွက်ထဲတွင် ကုန်သွယ်မှုအမည်များဖြင့် ထုတ်လုပ်ရောင်းချနိုင်သည် ဖြစ်သည့်အတွက် ပါဝင်သည့်ဓာတုပစ္စည်းအမည်များကို ကြည့်ရှုဝယ်ယူသုံးစွဲရမည်။

ပေါင်းသတ်ဆေးအသုံးပြုနည်းများ

အပင်မပေါက်မီ အသုံးပြုခြင်း (Pre-emergence Application)- Butachlor (ဘူတာကလို) သို့မဟုတ် Pretilachlor (ပရက်တီလာကလို) ကဲ့သို့သော ပေါင်းသတ်ဆေးများကို ပုံမှန်အားဖြင့် မျိုးစေ့ချပြီးနောက် ၁ - ၃ ရက်အတွင်း မြက်ပင်များ မပေါက်မီ အသုံးပြုပါ။
အပင်ပေါက်ပြီးမှ အသုံးပြုခြင်း (Post-emergence Application)- Fenoxaprop-P-ethyl (ဖီနိုဆာပရော့ပ်-ပီ-အီသိုင်း) သို့မဟုတ် Cyhalofop-butyl (ဆိုင်ဟာလိုဖော့ပ်-ဘူတိုင်း) ကဲ့သို့သော ပေါင်းသတ်ဆေးများကို မြက်ပင်များ ၃ - ၄ ရွက်အရွယ်သို့ ရောက်ရှိချိန်တွင် အသုံးပြုပါ။
စိုက်ခင်းရေထိန်းသိမ်းမှု(Water Management)- ပေါင်းသတ်ဆေးများ၏ အာနိသင်ကို ပိုမိုကောင်းမွန်စေရန်အတွက် စပါးစိုက်ခင်းကို ရေအလွှာ ၂ - ၃ လက်မဖြင့် ဖုံးအုပ် ထားပါ။
ကြိုတင်ပက်ဖျန်းတွက်ချက်ခြင်း (Calibration)- ပေါင်းသတ်ဆေးကို စိုက်ခင်းထဲ ကျရောက်စေလိုသောပမာဏကိုက်ညီစေရန်နှင့် ပြန့်နှံ့စွာ ပက်ဖျန်းနိုင်ရန်အတွက် ဆေးဖျန်းပုံး(သို့မဟုတ်) ဆေးဖျန်းစက်ကို ဆေးမပါသေးဘဲ အစမ်းပက်ဖျန်း တွက်ချက်စနစ်တကျ ချိန်ညှိပါ။
သန့်ရှင်းသောရေ အသုံးပြုခြင်း (Clean Water)- ပေါင်းသတ်ဆေး၏ အာနိသင်မကျဆင်းစေရန်အတွက် ဆေးဖျော်ရာတွင် သန့်ရှင်းသောရေကိုသာ အသုံးပြုပါ။
ဆေးဖျန်းခြင်း(Spraying)-ဆေးဖျန်းခေါင်းသည် ဆေးထွက်အားညီညာရန်လိုပြီး စိုက်ခင်းအထက် လက်မ ၂၀ အမြင့်မှထားရှိ၍ လမ်းလျှောက်နှုန်းမှန်မှန်နှင့် စိုက်ခင်းအနှံ့ တစ်ပြေးညီပြန့်နှံ့အောင် ဖျန်းပါ။
အကာကွယ်အသုံးပြုရေး(Protective Equipment)- ပေါင်းသတ်ဆေးဖျန်းသည့် အခါတိုင်း လက်အိတ်၊ နှာခေါင်းစည်း၊ မျက်မှန်နှင့် ကိုယ်ခန္ဓာကို ဖုံးအုပ်နိုင်သော အဝတ်အစားများကို အမြဲဝတ်ဆင်ပါ။

ဖော်ပြပါအချက်များကို လိုက်နာခြင်းဖြင့် တောင်သူများအားလုံး စပါးစိုက်ခင်းရှိ မြက်အမျိုးအစားပေါင်းများကို ထိရောက်စွာ ကာကွယ်နှိမ်နင်းနိုင်ကြစေလိုပါသည်။

ဆောင်းပါးရှင်ဆရာမှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...